Author: ДАМЖИНГИЙН БАТТОГТОХ

Categories
мэдээ нийгэм онцлох-нийтлэл туслах-ангилал

Дорноговь аймаг дахь хилийн боомтын захиргааны дарга Б.Баярням: Нийт 1300 машин зогсож байна, 2000 хүрэхгүй DNN.mn

Замын-Үүдийн ачаа тээврийн боомтыг тасралтгүй 24 цагийн үйл ажиллагаатай болгоно хэмээн Ерөнхий сайд БНХАУ-д айлчлал хийх үеэрээ тохирсон. Тэгвэл энэхүү үйл ажиллагаа сэргэсэн эсэх болон ачаа тээврийн бусад асуудлаар “Борхойн тал” авто тээвэрчдийн холбооны удирдах зөвлөлийн гишүүн Ч.Эрдэнэбаттай ярилцлаа.

-Ерөнхий сайд БНХАУ-д айлчлах үеэрээ Замын-Үүд-Эрээн боомтын үйл ажиллагааг тасралтгүй 24 цагийнх болгоно гэсэн тохиролцоо хийсэн. Энэхүү үйл ажиллагаа нь эхэлсэн үү?-Хэрэгжилт нь эхлээгүй байгаа. Нэг л их эхлүүлчихсэн аятай сүртэй мэдээлэл л хийгээд байсан. Эхэлсэн юм одоогоор алга. Уг нь 24 цагийн тасралтгүй үйл ажиллагаатай болчихвол хэрэгтэй л дээ. Манайханд ашигтай шүү дээ.

-Ачаа тээврийн машинуудын очер дараалал хэвийн болсон уу?

-Үгүй шүү дээ. Улам ихэссэн. Одоо 2000-гаад машины очер болж нэмэгдсэн, улам л нэмэгдээд байгаа. Уг нь манайхан Хятадын талтай тохироод өдөрт 50 машин нэмж гаргахаар болсон юм билээ. Тэглээ ч гэсэн энэ очер дараалал ер багасаагүй. Аргагүй шүү дээ. Ингээд нэгэнт хуралдчихсан юм чинь тийм амар багасахгүй.

-Наадмын өдрүүдээр боомт амардаг байх аа?

-Долдугаар сарын 11-16-ныг хүртэл амарна. Тэгэхээр нөгөөх очер дараалал нь дахиад л нэмэгдэх байх даа.

-Жижиг тэрэг явж байгаа юу?

-Хэрэв та бүхэн санаж байгаа бол би урьд нь ярьж байсан. Манай аймгаас сонгогдсон УИХ-ын хоёр гишүүн сар гаруйн өмнө бидэнтэй ирж уулзаад, жижиг тэргийг явуулна гээд мэдэгдэл хийгээд явсан. Гэвч тэрхүү шийдвэр нь одоог хүртэл хэрэгжиж эхлээгүй. Өнөөдөр (өчигдөр) уг нь 25 жижиг тэрэг явуулна гэсэн юм билээ. Гэвч Хятадын тал оруулахгүй буцаачихсан.

-Яагаад?

-Хятадын тал оруулахыг зөвшөөрөөгүй л гэсэн. Яг нарийн ширийн асуудлыг нь би сайн мэдэхгүй байна.

-Замын-Үүдийн жолооч тээвэрчдийн Wechat группүүд байдаг юм аа даа. Түүн дээр “Энэ их очерын хажуугаар зарим нэг машин ямар ч дараалалгүй шууд ороод байна. Асуухаар нэг сая төгрөг өгөөд очер дараалалгүй орчих юм” гэсэн утгатай чат байна лээ. Энэ хэр үнэн бодит мэдээлэл вэ?

-Бодитой шүү дээ. Танил тал, найз нөхөд, мөнгө төгрөгний тохиролцоон дээр наадуул чинь шууд оруулаад байгаа. Замын-Үүдийн жолооч нар бүгд мэддэг. Энд дөрвөн хүний бүрэлдэхүүнтэй ажлын хэсэг гараад шалгаж байгаа. Гэвч мэдээлэл нь хаагдмал. Ямар ч мэдээлэл өгдөггүй. Аргаа бараад наад ажлын хэсэгтээ жолооч тээвэрчдээс эсвэл иргэний хяналт тавих хүн оруулаач гэхээр оруулдаггүй. Их будилаантай зүйл яваад байгаа юм.

Замын-Үүдийн жолоочдын төлөөлөл ингэж ярив. Тэгвэл жижиг тээвэр яагаад явуулахгүй байгаа талаар Замын-Үүдийн иргэн Т.Нэргүйгээс тодруулга авлаа.

-Замын-Үүдийн боомтоор яагаад жижиг тээвэр гаргахгүй байгаа вэ?

-Автобустай л холбоотой. Авто тээврийн хэлэлцээр урагшаа хийж ирээд автобусаа нэмье гэсэн санал оруулж байгаатай холбоотой жижиг тээвэр явахгүй байгаа.

-Дорноговь аймгаас сонгогдсон УИХ-ын хоёр гишүүн хилээр жижиг тээвэр гаргана гэж мэдэгдэж байсан. Гэтэл яагаад одоог хүртэл явахгүй байна вэ?

-Одоо ерөөсөө Хятадын тал дээр л гацчихаад байна гээд байгаа.

-Хятад улс талаас л асуудал байгаа юм уу. Монгол Улсын талаас асуудал бий юу?

-Манай талаас ямар нэгэн асуудал байхгүй. Монгол Улсын талаас дарга нар нь ч хөөцөлдөж байна. Хятад талаас ерөөсөө жижиг машин авахгүй гээд гааль нь хориг тавьчихаад байгаа гэсэн хариулт өгөөд байгаа юм.

-Та энэхүү асуудлаар хаана хандсан бэ?

-Энэ асуудлаар Хятад руу ч хандаж үзсэн. Консулаар дамжуулж өргөх бичиг өргөсөн. УИХ-ын гишүүдэд хандаж үзсэн. Би Зам тээврийн яам, Гадаад харилцааны яамдад ямар нэгэн учир байна уу л гэж бодоод байгаа. Хоорондоо үгсэн хуйвалдаад байна уу л гэж сэрдэж байна.

-Зам тээврийн яам, Гадаад харилцааны яамтай холбогдож үзсэн үү?

-Үзсэн. Бид мэдэхгүй, Хятад л авахгүй байгаа гэдэг хариу өгдөг.

-Өөр тулгамдаж буй асуудал юу байна вэ?

-Эгч нь үнэндээ цөхөрч, аргаа бараад байна. Одоо тэгээд автобус л явуулна гээд байгаа. Автобус, ачаа тээвэр рүү дайрч байна. Замын-Үүдийн иргэд үнэхээр хүнд нөхцөлд орсон. Манай сум чинь үйлдвэрлэгч буюу ажлын байр дутмаг сум шүү дээ. Хятад үйлдвэрлэгч улс болохоор адаглаад ард иргэдээ ажлын байраар хангачихна. Манай суманд онцлог нь тийм зүйл байхгүй. Тиймээс жижиг машин тээврээр амьдардаг. Гэтэл цар тахал гээд хил гааль хааснаас хойш ямар ч орлогогүй, амьдрах аргагүй болоод байна шүү дээ. Үүнийг ойлгож хүлээж авч байгаа газар ч алга.

Иргэн жижиг оврын машины тээвэрлэлтийн талаар ийм мэдээлэл өгсөн юм. Харин саяхан Замын-Үүд-Эрээн боомтоор иргэн Б.Гантулга ачаа тээврийн зорилгоор зорчихоор очжээ. Зургадугаар сарын 29-ний өдөр Замын-Үүд боомтод очсон боловч өдийг хүртэл боомтоор хил давж чадаагүй байгаа аж. Энэ талаар түүнтэй ярилцлаа.

-Таныг очиход боомтын нөхцөл байдал ямар байна вэ?

-Маш их очертой машин урагшаа гарч байгаа үгүй нь мэдэгдэхгүй л байна.

-Зургадугаар сарын 29-ний өдрөөс эхэлж дараалалд орж зогсоод урагшилж байгаа зүйл байна уу?

-Урд маш их машин байгаа учраас шалган дээр яг юу болоод байгаа нь мэдэгдэхгүй юм. Эндэхийн зохицуулах ёстой ажилчид нь гэж амнаас нь алт унах гэж байгаа аятай дуугарч ядсан, юм асуухаар юу ч хэлдэггүй. Тэгээд пээдэлзсэн, гараа халаасандаа хийчихээд, чухал царайлсан хүмүүс л байх юм. Цуваа яагаад явахгүй байна, яагаад урагшлахгүй байгаа талаар асуухаар ер хэлдэггүй. Ямар ч мэдээлэл алга. Тэгсэн хэрнээ жолооч нарын группээр цувааны хажуугаар маш их машин ямар ч очер дараалалгүй орж байна гээд бичээд байгаа. Тэр нь мэдээлэлд ойр танил талтай хүмүүс л бололтой. Тэгж урдуур ороход нэг удаадаа 1 сая төгрөг төлдөг гэсэн ч зүйлүүд бичигдсэн байна. Хэзээ хил давах нь мэдэгдэхгүй ингэж очерлож зогсож байхаар түүнийг нь төлөөд бушуухан гараад явчихмаар бодол төрөөд л сууж байна.

-Тэгээд та бараг долоо хоноход ер урагшилж чадаагүй хэрэг үү?

-Чадаагүй, бараг автоматаар арагшаа яваад байх шиг байна шүү дээ. Үүнийг нь хянаж зохицуулдаг төрийн алба ч гэж алга. Яах гэж цалин авч энд суугааг мэдэхгүй юм. Тэгээд асуухаар юу ч хэлэхгүй. Нилээн мөнгө угаалтын ажил энд явагдаад байх шиг байна л гэж хардаж байна.

-Та ямар ажлаар хил гарах гэж байгаа вэ?

-Би жаахан түүхий эд гаргаад, буцаагаад барилгын материал ачиж оруулж ирэх зорилготой. Гэвч энэ очерт хамаг цаг зав барагдаж байна. удах тусам л урсгал зардал хоол унд гээд зардал мөнгө нь их гарна шүү дээ. ер урагшлахгүй байгааг л гайхаад байна.

Иргэдийн байр суурь ийм байгаа бол Замын-Үүд боомтын албаныхантай холбогдсон юм. Замын-Үүдийн хилийн цэргийн газрын дарга н.Ганбат “Манайх тус асуудалтай хамааралгүй. Өөр газар хариуцдаг” гэсэн шалтгаанаар тодруулга өгөхөөс татгалзлаа. Дорноговь аймаг дахь хилийн боомтын захиргааны дарга Б.Баярнямаас тодруулаа.

-Замын-Үүд боомтод 2000-гаад ачаа тээврийн машины очер үүссэн гэх мэдээлэл байна. Та энэ тал дээр тайлбар өгөөч?

-Шороон зам дээр очерлосон машин 1-33 эгнээний нэг эгнээндээ 50-60 машин байгаа. Нийт 1300 машин зогсож байна. 2000 машин хүрэхгүй. Үүнийг хоёр өдөртөө нэг удаа бүртгэдэг. Бүртгэсэн машинуудаа өглөө болгон хилийн цэрэг, авто тээвэр, шалган, төрийн байгууллагууд ажиллаад, хоёр, хоёр албан хаагчдаа гаргаад өглөө 08:00 цаг гэхэд эхний 150 машиныг шалгалт хийн гаргадаг. Өдөртөө 300 машин татна. Наадмын урт амралтаар долоо хоногийн бөөгнөрөл үүснэ шүү дээ. Түүнээс наана ямар арга хэмжээ авах вэ гэдгээ ярилцаж байгаа. Цахим болгож, цахимаар бүртгэл явуулбал ямар давуу тал болон дутагдалтай тал гарах вэ гэдгийг судалж байна.

-Ерөнхий сайд Хятад Улсад айлчлаад Замын-Үүд боомтын үйл ажиллагааг 24 цагаар явуулна гээд байгаа. Тэр шийдвэр хэзээнээс эхэлж хэрэгжих вэ. Ямар нэгэн мэдэгдэл албан журмаар ирсэн зүйл байгаа болов уу?

-Албан журмаар ирсэн мэдээ манайд байхгүй. Ямар ч байсан Ерөнхий сайд албан айлчлал хийсэн. Боомтын сайд бас айлчлалд нь хамт явсан. Тэгээд хоёр талаасаа 24 цагийн асуудлыг ярилцсан. Хятадын тал 24 цаг болгоё гэсэн манай талын саналыг хүлээж аваад, бэлтгэл ажил хийгдэж, хэрэгжүүлж явна. Хүн хүч, хүний нөөцийн асуудал гээд олон бэлтгэх ажил байгаа. Албан ёсны ирсэн хариу одоогоор алга. Бид энэ мэдээг сонсчихоод дор бүрнээ хуралдаад, хаана, ямар тулгамдсан асуудал байгаа, 24 цаг болгоход бэлэн байдалтай байх талаарх асуудал яригдаж эхэлсэн.

-Бага оврын суудлын тэргийг зорчуулахгүй байна гэх жолооч нар хандаж байна. Бага оврын машин тээврийн асуудал юу болж байгаа вэ?

-Манай боомтын талаас чиглэл чиглэлийнхээ байгууллагуудад бичгээ өгсөн. Урд тал жижиг тээврийн асуудлыг огт шийдэж өгөхгүй байгаа. Хоёр талын Засгийн газар хоорондын уулзалтаар суудлын жижиг тээвэр явуулах асуудлыг даацтай ярилцсан гэсэн. Манай орон нутгийн УИХ-ын гишүүн Б.Дэлгэрсайхан, Т.Энхтүвшин нар энэ тал дээр өдөр болгон бидэнтэй уялдаа холбоотой ажиллаж байна. Хятад улсын Эрээн хотоос эхний ээлжинд 50 жижиг тэрэг явуулъя гэдэг шийдвэр гаргасан. Б.Дэлгэрсайхан гишүүн сая айлчлалаар явахдаа намын хорооны дарга нартай уулзаад, эхний ээлжинд 50 машин явуулаад, түүн дээр бага багаар нэмэгдэж явуулсаар 300 машин хүргэе гэсэн тохиролцоо хийсэн. Манай тал шууд 500-гаар нь явуулсан ч болно. Хэзээ ч явуулсан бэлэн байгаа шүү дээ. Харин Хятадын тал энийг хүлээж авахгүй байгаад хамаг учир байна. Энэ долоо хоногтоо 50 машин гаргачих байх.

-Жолооч нарын дунд “WeChat” групп байдаг юм байна. Түүн дээр очер ерөөсөө урагшаа явахгүй, дунд нь ямар ч очергүй машин ороод байна. Нэг машинаас 1 сая төгрөгийн хахууль авдаг гэсэн мэдээллүүд гадуур яваад байна л даа. Энэ талаар та тайлбар өгч болох уу?

-Албан бус хүмүүс янз бүрээр л ярьж байдаг юм. Хамгийн гол нь нотлох баримтаа аваад ирвэл бид шалгахад бэлэн. Ер нь тэгж авах боломж байхгүй. Гурван байгууллага бүртгэл, бичлэг хийгээд явуулдаг. Бид энэ асуудлыг сонсож байсан. Яг энэ асуудлаар ямар хүн ийм хэрэг гаргаад байна, “Сая төгрөгөөр машин татах хүн байна уу, нэг машин оруулаад өгөөч” гэж зохиомол хүн явуулж, шалгалт хийх маягаар цэвэрлэгээ хийсэн. Олдохгүй байна лээ. Тийм болохоор наадах чинь зүгээр ам яриа л байх гэж бодож байна.

Categories
мэдээ нийгэм

Нийт 80 тоо толгой тарвага нутагшуулжээ DNN.mn

“Монголын унаган байгалийн хүлцэл, тогтворжилтыг хангах нь” төслийн хүрээнд ШУА-ийн Биологийн хүрээлэнгийн эрдэмтэн судлаачид Тарвагатайн нурууны БЦГ-ын хамгаалалтын захиргааны судалгаа хариуцсан мэргэжилтнүүдийн бүрэлдэхүүнтэй судалгааны баг тарвага сэргээн нутагшуулах ажлыг Архангай аймгийн Өлзийт, Батцэнгэл, Тарвагатайн нурууны тусгай хамгаалалттай газрын Завхан аймгийн Тосонцэнгэл, Их-Уул сумдын нутагт гүйцэтгэж, нийт 80 тоо толгой тарвага нутагшуулан сум орон нутгийн захиргаа, байгаль хамгаалагч, нутгийн иргэдэд хүлээлгэн өгчээ.

Архангай аймагт нутагшуулсан тарвагыг Хустай нуруунаас, Завхан аймагт нутагшуулсан тарвагыг Завханы Яруу сумын тарваганы тархац, нөөц бүхий газраас барьж сэлгэн нутагшуулж байна.

Энэ судалгааны ажлыг дөрөв дэх жилдээ явуулж байгаа юм. Анх 2020 онд нутагшуулсан тарваганы популяцийн нутагшилт сайн, тархац нутгаа тэлсэн, өсөлт сайн, нутгийн иргэдийн хамтын оролцоотой хамгааллын ажил үр дүнгээ өгч байгааг эрдэмтэд дүгнэлээ.

Categories
мэдээ нийгэм

НААДАМ-2023: Үндэсний их баяр наадмын хөтөлбөр DNN.mn

Тулгар төрийн 2232, Их Монгол Улсын 817, Үндэсний эрх чөлөө, тусгаар тогтнолоо сэргээн мандуулсны 112, Ардын хувьсгалын 102 жилийн ой, Үндэсний их баяр наадмын хөтөлбөр болон энэ үеэр нийслэлд болох урлаг, соёлын арга хэмжээ, үзвэрийн талаарх мэдээллийг хүргэж байна. Энэ жилийн наадмыг “Эв мөнхийн тусгаар Монгол” нэрийн дор зохион байгуулах юм.

Тулгар төрийн 2232, Их Монгол Улсын 817, Үндэсний эрх чөлөө, тусгаар тогтнолоо сэргээн мандуулсны 112, Ардын хувьсгалын 102 жилийн ой, Үндэсний их баяр наадмын хөтөлбөр

Долоодугаар сарын 6, Пүрэв гараг

08:00 – 20:00 Үндэсний шагайн харвааны ахмадын болон өсвөрийн багийн харвааны эхний  хэсгийн тоглолт /Шагайн харвааны төв асар/

Долоодугаар сарын 7, Баасан гараг

08:00 – 20:00 Үндэсний шагайн харвааны ахмадын  болон өсвөрийн багийн харвааны хагас шигшээ тоглолт /Шагайн харвааны төв асар/

08:00 – 20:00 Урианхай сурын харваа /Сурын талбай/

11:40 – 13:00 “Монгол бахархал” гэрэл зургийн  үзэсгэлэнгийн нээлт /Чингис хааны музей/

Долоодугаар сарын 8, Бямба гараг

08:00 – 19:00 Буриад сурын харваа /Сурын талбай/

Долоодугаар сарын 9, Ням гараг

08:00 – 20:00 Үндэсний шагайн харвааны тэмцээний  насанд хүрэгчдийн эхний хэсгийн тоглолт /Шагайн харвааны төв асар/

09:00 – 19:00 Өсвөр үе, балчир насны хүүхдийн харваа /Сурын талбай/

11:00 – 17:00 Үндэсний хувцасны өдөр “Дээлтэй Монгол” наадам /Жанжин Д.Сүхбаатарын талбай/

Долоодугаар сарын 10, Даваа гараг

07:00 – 11:00 Хязаалан насны морьдын уралдаан /Хүй долоон худаг/

08:00 – 20:00 Үндэсний шагайн харвааны тэмцээний насанд хүрэгчдийн хоёр, гурав дахь тойргийн тоглолт  /Шагайн харвааны төв асар/

08:30 – 14:30 Үндэсний сурын хана харвааны эхэн өрөг /Сурын талбай/

10:00 Монгол Улсын төрийн далбааны өдөрт зориулсан Цэргийн хүндэтгэлийн  ёслолын жагсаал /Жанжин Д.Сүхбаатарын талбай/

11:00 – 12:00 “Монголын сайхан орон” уран зургийн  үзэсгэлэнгийн нээлт /Монголын урчуудын эвлэлийн үзэсгэлэнгийн танхим/

12:00 – 15:00 Шүдлэн насны морьдын уралдаан /Хүй долоон худаг/

14:00 Жанжин Д.Сүхбаатарын хөшөөнд цэцэг  өргөх, Их эзэн Чингис хааны хөшөөнд  хүндэтгэл үзүүлэх ёслол /Жанжин Д.Сүхбаатарын талбай/

14:30 – 20:30 Үндэсний сурын хана харвааны дунд өрөг /Сурын талбай/

15:00 – 17:00 Төрийн хүндэтгэлийн концерт /Соёлын төв өргөө/

19:00 Монгол Улсын Төрийн тугийг цэнгүүлэх /Жанжин Д.Сүхбаатарын талбай/

21:00 – 23:00 Төрийн хүндэтгэлийн концерт /Жанжин Д.Сүхбаатарын талбай/

Долоодугаар сарын 11, Мягмар гараг

07:00 – 11:00 Азарганы уралдаан /Хүй долоон худаг/

08:00 – 19:00 Үндэсний шагайн харвааны хагас шигшээ тоглолт (32 баг) /Шагайн харвааны төв асар/

09:30 Монгол Улсын Төрийн тугийг Төрийн ордноос Төв цэнгэлдэх хүрээлэн рүү  залах ёслол /Төв цэнгэлдэх хүрээлэн/

11:10 Монгол Улсын Ерөнхийлөгч У.Хүрэлсүх Тулгар төрийн 2232, Их Монгол  Улсын 817, Үндэсний эрх чөлөө, тусгаар тогтнолоо сэргээн мандуулсны 112, Ардын хувьсгалын 102 жилийн ой,  Үндэсний их баяр наадмыг нээж үг хэлнэ. /Төв цэнгэлдэх хүрээлэн/

11:20 -12:40 Үндэсний их баяр наадмын нээлтийн арга  хэмжээ (Тусгай хөтөлбөрөөр) /Төв цэнгэлдэх хүрээлэн/

12:00 – 16:00 Их насны морьдын уралдаан /Хүй долоон худаг/

13:00 – 17:30 Хүчит бөхийн барилдааны нэгийн даваа /Төв цэнгэлдэх хүрээлэн/

13:00 – 19:00 “Хөхүүрийн айраг” арга хэмжээ /Хүй долоон худаг/

13:00 – 16:00 Өсвөрийн бөхийн барилдааны нэгийн даваа /Төв цэнгэлдэх хүрээлэн/

14:00 – 14:30 Үндэсний сурын харвааны нээлт /Сурын талбай/

14:00 “Соёлын наадам”-ын нээлт (Тусгай хөтөлбөрөөр) / Хүй долоон худаг/

14:30 – 17:30 Үндэсний сурын хана харвааны адаг өрөг /Сурын талбай/

15:00 – 20:00 Үндэсний шагайн харвааны хагас шигшээ тоглолт /Шагайн харвааны төв асар/

17:00 – 19:00 Өсвөрийн бөхийн барилдааны хоёрын даваа /Төв цэнгэлдэх хүрээлэн/

17:30 – 21:30 Үндэсний сурын хасаа харвааны эхэн өрөг /Сурын талбай/

17:30 – 20:00 Хүчит бөхийн барилдааны хоёрын даваа /Төв цэнгэлдэх хүрээлэн/

21:00 – 24:00 “Улаанбаатарын үдэш 2023” үдшийн шоу тоглолт /Жанжин Д.Сүхбаатарын талбай/

24:00 Баяр наадмын ёслолын буудлага /Жанжин Д.Сүхбаатарын талбай, Монголын хүүхдийн ордон/

Долоодугаар сарын 12, Лхагва гараг

07:00 – 11:00 Соёолон насны морьдын уралдаан /Хүй долоон худаг/

08:00 – 11:00 Үндэсний шагайн харвааны насанд  хүрэгчид, ахмад, өсвөрийн багийн  шигшээ дөрвөн багийн тоглолт /Шагайн харвааны төв асар/

08:00 – 12:00 Үндэсний сурын хасаа харвааны дунд өрөг /Сурын талбай/

09:00 – 11:00 Хүчит бөхийн барилдааны гурвын даваа /Төв цэнгэлдэх хүрээлэн/

09:00 – 10:30 Өсвөрийн бөхийн барилдааны гурвын даваа /Төв цэнгэлдэх хүрээлэн/

10:00 – 14:00 “Соёлын наадам” /Хүй долоон худаг/

11:00 – 12:30 Хүчит бөхийн барилдааны дөрвийн даваа /Төв цэнгэлдэх хүрээлэн/

11:00 – 12:00 Өсвөрийн бөхийн барилдааны дөрвийн  даваа /Төв цэнгэлдэх хүрээлэн/

12:00 – 12:30 Шагналт 4-8 дугаар байрт шалгарсан баг  харваачдад шагнал гардуулах /Шагайн харвааны төв асар/

12:00 – 14:00 Дааганы уралдаан /Хүй долоон худаг/

12:00 – 14:00 Үндэсний сурын хасаа харвааны адаг өрөг /Сурын талбай/

12:00 – 13:00 “Хөхүүрийн айраг” арга хэмжээний шилдгүүдэд шагнал гардуулах /Хүй долоон худаг/

12:30 – 13:00 Түрүү, үзүүр болон гуравдугаар байрт шалгарсан баг харваачдад шагнал  гардуулах /Шагайн харвааны төв асар/

13:00 – 14:30 Хүчит бөхийн барилдааны тавын даваа /Төв цэнгэлдэх хүрээлэн/

13:30 – 15:00 Өсвөрийн бөхийн барилдааны тавын даваа /Төв цэнгэлдэх хүрээлэн/

14:10 – 15:00 Үндэсний сурын түрүү тодруулах 16  харваачийн шигшээ харваа /Сурын талбай/

14:30 – 16:00 Хүчит бөхийн барилдааны зургаагийн даваа /Төв цэнгэлдэх хүрээлэн/

14:30 – 15:30 Өсвөрийн бөхийн барилдааны зургаагийн  даваа /Төв цэнгэлдэх хүрээлэн/

15:10 – 15:30 Монгол Улсын Ерөнхийлөгч У. Хүрэлсүх Үндэсний сур, шагайн харваанд түрүүлсэн харваачдад шагнал гардуулна. Улсын цолны болзол хангасан сурын  харваачдад цол олгож, үнэмлэх, энгэрийн  тэмдэг гардуулна. /Төв цэнгэлдэх хүрээлэн/

16:00 – 17:00 Хүчит бөхийн барилдааны долоогийн  даваа /Төв цэнгэлдэх хүрээлэн/

16:00 – 17:00 Өсвөрийн бөхийн барилдааны долоогийн  даваа /Төв цэнгэлдэх хүрээлэн/

17:00 – 18:00 Түрүүлж айрагдсан морьдын цол дуудаж,  шагнал гардуулна. Монгол Улсын  Ерөнхийлөгч У. Хүрэлсүх хурдан  морь унаач хүүхдүүдэд бэлэг гардуулна. /Төв цэнгэлдэх хүрээлэн/

17:00 – 17:30 Монгол Улсын Ерөнхийлөгч У.Хүрэлсүх “Улсын начин”, “Улсын харцага” цолны болзол биелүүлсэн бөхчүүдэд цолны үнэмлэх, энгэрийн тэмдэг  гардуулна. /Төв цэнгэлдэх хүрээлэн/

17:30 – 18:00 Дархан аваргуудад хүндэтгэл үзүүлнэ. /Төв цэнгэлдэх хүрээлэн/

19:00 – 20:00 Хүчит бөхийн барилдааны наймын даваа /Төв цэнгэлдэх хүрээлэн/

20:00 – 20:30 Монгол Улсын Ерөнхийлөгч У.Хүрэлсүх “Улсын заан” цолны болзол биелүүлсэн бөхчүүдэд цолны үнэмлэх,  энгэрийн тэмдэг гардуулна. /Төв цэнгэлдэх хүрээлэн/

20:30 – 21:30 Хүчит бөхийн барилдааны есийн даваа /Төв цэнгэлдэх хүрээлэн/

21:30 – 21:50 Түрүүлж, үзүүрлэсэн бөхчүүдэд цолны үнэмлэх, энгэрийн тэмдэг гардуулна. /Төв цэнгэлдэх хүрээлэн/

21:50 Үндэсний их баяр наадмын хаалтын арга  хэмжээ /Төв цэнгэлдэх хүрээлэн/

Монгол Улсын Ерөнхийлөгч У.Хүрэлсүх Тулгар төрийн 2232, Их Монгол Улсын 817, Үндэсний эрх чөлөө, тусгаар тогтнолоо сэргээн мандуулсны 112, Ардын хувьсгалын 102 жилийн ой, Үндэсний их баяр наадмын ажиллагааг хааж үг хэлнэ.
Хаалтын тоглолт (Тусгай хөтөлбөрөөр)
Монгол Улсын төрийн тугийг Төв цэнгэлдэх хүрээлэнгээс Төрийн ордон руу залах ёслол

Долоодугаар сарын 13, Пүрэв гараг

07:00 – 08:30 Сонгомол дээд насны морьдын уралдаан /Хүй долоон худаг/

09:00 – 11:30 Сонгомол дунд насны морьдын уралдаан  /Хүй долоон худаг/

11:00 – 13:00 Жороо морьдын уралдаан /Хүй долоон худаг/

12:00 – 12:10 Монгол Улсын Шадар сайд, Үндэсний их баяр наадмыг зохион байгуулах хорооны дарга С.Амарсайхан уяачдын наадмыг нээнэ. /Хүй долоон худаг/

12:10 – 12:30 Уяачдын наадмын нээлтэд зориулсан урлагийн тоглолт (тусгай хөтөлбөрөөр) /Хүй долоон худаг/

12:00 – 15:00 Сонгомол бага насны морьдын уралдаан /Хүй долоон худаг/

12:30 – 14:30 Хүчит бөхийн барилдааны нэгийн даваа /Хүй долоон худаг/

14:30 – 14:50 Үндэсний их баяр наадамд түрүүлсэн,  үзүүрлэсэн, шөвгөрсөн бөхчүүдэд бай  шагнал, цолны чимэг хүртсэн бөхчүүдэд  үнэмлэх гардуулна. /Хүй долоон худаг/

14:50 – 15:50 Хүчит бөхийн барилдааны хоёрын даваа /Хүй долоон худаг/

15:50 – 16:00 Урлагийн тоглолт /Хүй долоон худаг/

16:00 – 17:00 Хүчит бөхийн барилдааны гурав, дөрвийн даваа /Хүй долоон худаг/

17:00 – 17:10 Урлагийн тоглолт /Хүй долоон худаг/

17:10 – 17:30 Хүчит бөхийн барилдааны тавын даваа /Хүй долоон худаг/

17:30 – 17:50 Түрүүлж, айрагдсан морьдын цол дуудаж  шагнал гардуулна.  /Хүй долоон худаг/

17:50 – 18:10 Хүчит бөхийн барилдааны зургаагийн даваа /Хүй долоон худаг/

18:10 – 18:30 Хүчит бөхийн барилдааны долоогийн даваа /Хүй долоон худаг/

18:30 – 18:50 Хүчит бөхийн барилдаанд түрүүлсэн,  үзүүрлэсэн, шөвгөрсөн бөхчүүдэд шагнал гардуулна. /Хүй долоон худаг/

18:50 – 19:00 Батлан хамгаалах яамны Төрийн нарийн  бичгийн дарга, Үндэсний их баяр наадмыг зохион байгуулах хорооны Хурдан морины салбар хорооны дарга,  Бригадын генерал Д.Ганхуяг Уяачдын наадмыг хаана. /Хүй долоон худаг/

ҮНДЭСНИЙ ИХ БАЯР НААДМЫН СОЁЛ,  УРЛАГИЙН ҮЗВЭР, ҮЙЛЧИЛГЭЭНИЙ ХӨТӨЛБӨР УРЛАГИЙН ТОГЛОЛТ

СОЁЛЫН ТӨВ ӨРГӨӨ

Долоодугаар сарын 10

15:00-17:00 Үндэсний их баяр  наадмын Хүндэтгэлийн  концерт

Долоодугаар сарын 11,12

20:00 Харанга хамтлагийн “Зөвхөн Монголдоо” тоглолт

ҮНДЭСНИЙ УРЛАГИЙН ИХ ТЕАТР

Долоодугаар сарын 10

20:00 “Ардын дуу мину” тоглолт

Долоодугаар сарын 11

20:00 “Наадмын үдэш” тоглолт

УЛСЫН ДУУРЬ, БҮЖГИЙН  ЭРДМИЙН ТЕАТР

Долоодугаар сарын 11-15

17:00 “Монголын сайхан орон”  ҮУИТ-ын тоглолт

Долоодугаар сарын 11

20:00 “Монгол бүжгийн гайхамшиг” ҮУИТ-ын тоглолт

УЛСЫН ДРАМЫН ЭРДМИЙН ТЕАТР

Долоодугаар сарын 9

18:00-19:00 “The Mongol Khan” тоглолт

“ГАН ЗАМ” ПАЛАС

Зургаадугаар сарын 28-наас долоодугаар сарын 20

18:00 “Nomadic Legend” ардын урлаг, өв соёлын тоглолт

“СЭРТЭН МОРЬТОН”  ЦОГЦОЛБОР

Долоодугаар сарын 9-13

11:00, 11:40, 15:00 “Чэрү Андури” морьтон циркийн  жүжигчилсэн тоглолт

“МОНГОЛ ШИЛТГЭЭН” ЦОГЦОЛБОР

Долоодугаар сарын 6

14:00-02:00 “Плэйтайм” хөгжмийн наадам

Долоодугаар сарын 7-8

09:00-02:00 “Плэйтайм” хөгжмийн наадам

МУЗЕЙ, ГАЛЕРЕЙН ҮЗЭСГЭЛЭН

МОНГОЛЫН УРЧУУДЫН ЭВЛЭЛИЙН АРТ ГАЛЕРЕЙ ҮЗЭСГЭЛЭНГИЙН  ТАНХИМ

Долоодугаар сарын 10-24

11:00-12:00 “Монголын сайхан орон”  уран зургийн үзэсгэлэн

МОНГОЛЫН УРАН ЗУРГИЙН  ГАЛЕРЕЙ

Долоодугаар сарын 9-15

09:00-18:00 “Монголын аж байдал”  үзэсгэлэн /Хосгүй үнэт хүндэтгэлийн танхим/

Долоодугаар сарын 19

09:00-18:00 “Модернизм Монголын дүрслэх урлагт”  үзэсгэлэн /Модерн танхим/

Долоодугаар сарын 1-нээс наймдугаар сарын 1

09:00-18:00  Lee Woo Seung “Zero Equal Zero”  үзэсгэлэн

ЧИНГИС ХААНЫ МУЗЕЙ

Долоодугаар сарын 11-15

11:40-13:00 “Монгол бахархал” гэрэл  зургийн үзэсгэлэн

Долоодугаар сарын 11-наас наймдугаар сарын 7

09:00-18:00 Говийн ноён хутагт Данзанравжаагийн мэндэлсний 220 жилийн  ойд зориулсан тусгай  үзэсгэлэн

Долоодугаар сарын 9-13

09:00-18:00 “Чингис хааны өв” үзэсгэлэн

МОНГОЛЫН ҮНДЭСНИЙ МУЗЕЙ

Долоодугаар сарын 15

1.07:00-21:00 ”Өглөөний музей”,  “Үдшийн музей”

Долоодугаар сарын 1-13

07:00-21:00 “Монгол наадам” “Монгол бөх” тусгай үзэсгэлэн

Долоодугаар сарын 1-17

10:00-17:00 “Ухаант Цэцэнхүүгийн музейн аялал” музейн боловсролын хөтөлбөр

БАЙГАЛИЙН ТҮҮХИЙН МУЗЕЙ

Долоодугаар сарын 9-13

09:00-18:00 “Монголын үндэстний байгалийн бахархалт өв”  түр үзэсгэлэн

Г.ЗАНАБАЗАРЫН НЭРЭМЖИТ  ДҮРСЛЭХ УРЛАГИЙН МУЗЕЙ

Долоодугаар сарын 9-13

09:00-18:00 Б.Шарав “Үрс гарч байгаа  нь” тусгай үзэсгэлэн

ЧОЙЖИН ЛАМЫН СҮМ МУЗЕЙ

Долоодугаар сарын 9-13

19:00-00:00 “Үдшийн музей-2023”

09:00-18:00 “Хосгүй үнэт бүтээлүүд”  түр үзэсгэлэн

УЛААНБААТАР ХОТЫН МУЗЕЙ

Долоодугаар сарын 9- 13

“Ардын хувьсгал” – үзэсгэлэн

БОГД ХААНЫ ОРДОН МУЗЕЙ

Долоодугаар сарын 9-13

09:00-21:00 Үндэсний Их Баяр наадамд зориулсан  “Цэнгэлийн манлай” сэдэвчилсэн үзэсгэлэн

Categories
мэдээ нийгэм цаг-үе

“Натур”-ын болон Нарны зам, Энхтайваны гүүрний нүхэн гарц, Бага тойруу дахь хөдөлгөөн хэвийн боллоо DNN.mn

Улаанбаатар хотод бороо үргэлжлэн орсны улмаас үерийн эрсдэл үүссэн тул зарим байршилд зам хаасан.

Тэгвэл “Буян”-гийн зам буюу Сэлбэ голын баруун болон зүүн талаас бусад замын зорчих хөдөлгөөнийг нээсэн тухай НЗДТГ-ын хэвлэл мэдээлэл, олон нийттэй харилцах хэлтсээс мэдээлэв.

Тодруулбал

  • Бага тойруу
  • “Натур”-ын зам,
  • Энхтайваны гүүрний нүхэн гарц
  • “Говь”-ийн зам
  • “Баянмонгол” хорооллын зам
  • Нарны замын хөдөлгөөн хэвийн боллоо.
Categories
гадаад мэдээ

Цаг хугацаа өөрчлөгддөг DNN.mn

Сиднейн их сургуулийн одон орон судлаачид их тэсрэлтээр Орчлон ертөнц үүссэн эхэн үед цаг хугацаа одоогийнхоос тав дахин удаан байсан гэж дүгнэжээ. Уг дүгнэлтийг Орчлон ертөнц үүссэн үеийн радио долгионы хоёр зуу орчим квазар хэмжээтэй, дэлхийд ирж буй цацрагийн өөрчлөлтийг судалсны үндсэн дээр хийсэн гэж Сиднейн их сургуулийн хэвлэлийн алба мэдээлсэн байна. “Эйнштейний ачаар бид цаг хугацаа, орон зай хоорондоо салшгүй холбоотой гэдгийг мэднэ. Орчлон ертөнц байнга тэлж байдаг бөгөөд энэ нь онолын хувьд бидэнд Орчлон ертөнцийн үүслийн эхэн үед тэнд болж байсан үйл явдлуудын цаг хугацаа өнөөдөр хэрхэн өөрчлөгдөж байгааг судлах боломж олгосон. Их тэсрэлтээс хойших эхний тэрбум жилд цаг хугацаа үнэхээр өнөөдрийнхөөс хамаагүй удаан урсаж байсныг бид нотолсон” гэж Сиднейн их сургуулийн профессор Герайнт Льюис мэдэгджээ. Судлаачид галактикуудын төв дэх маш идэвхтэй, хэт масстай хар нүхнүүдийг болон дэлхийн үүслийн үеийн радио долгионы нийт 190 квазар хэмжээтэй дэлхийд ирж буй долгионыг 20 жилийн турш судалж энэхүү дүгнэлтэнд хүрсэн байна. Судалгааны явцад эрдэмтэд квазаруудын цацаргалтын урсгалын гажуудлын давтамжийг хэмжиж, харьцуулжээ. Энэ нь Орчлон ертөнц үүссэн цагаас хойш янз бүрийн хугацаанд цаг хугацаа удаан өнгөрдөг байсан гэдгийг батлах боломжийг олгосон аж.

Тухайлбал, гурван тэрбум жилийн өмнө цаг хугацаа өнөөдрийнхөөс 1.2 дахин удаан, 12 тэрбум жилийн өмнө тав дахин удаан урсдаг байсан гэнэ. Эрдэмтдийн хийсэн хэмжилтүүд нь харьцангуй ойр, мөн алс хол бүртгэгдсэн супернова гэх хүчтэй дэлбэрэлтэд хийсэн ажиглалтын үр дүнг баталж байгаа аж. Энэхүү ажиглалтын үеэр одон орон судлаачид цаг хугацааны урсгал хурдассаныг харуулсан ижил төстэй хэмжээсүүдийг бүртгэжээ. Энэ нь квазаруудыг цаг хугацааны хурдыг найдвартай, үнэн зөв хэмжих хэрэгсэл болгон ашиглаж болохыг харуулсан гэж эрдэмтэд “Nature Astronomy” сэтгүүлд нийтлэгдсэн өгүүлэлдээ бичжээ. Өнгөрсөн зууны сүүлчээр одон орон судлаачид супернова дэлбэрэлтийг ажиглаж явцдаа Орчлон ертөнц хурдацтай тэлж байгааг тогтоосон билээ. Харин өнөө үед физикчид тэлэлт улам хурдассаар байгаагийн шалтгааныг хар энергитэй холбоотой гэж үзэж байна.Харин хар энерги гэдэг нь одоогоор бидэнд огт ойлгомжгүй байгаа энерги гэсэн утгатай үг юм.

Г.Амарсанаа

Categories
мэдээ нийгэм цаг-үе

Наадмын өдрүүдэд зах, худалдааны төв болон сүлжээ дэлгүүрүүдийн ажиллах хуваарь DNN.mn

Тулгар төрийн 2232, Их Монгол Улс байгуулагдсаны 817, Үндэсний эрх чөлөө, тусгаар тогтнолоо сэргээн мандуулсны 112, Ардын хувьсгалын 102 жилийн ойн үндэсний их баяр наадам долдугаар сарын 10-15-нд болно.

Эдгээр өдөр ажиллах томоохон зах, худалдааны төв болон сүлжээ дэлгүүрүүдийн ажиллах цагийн хуваарийг танилцуулж байна.

Томоохон зах, худалдааны төвүүд ихэвчлэн долдугаар сарын 11-нээс амрах хуваарьтай байна. “Нарантуул” олон улсын худалдааны төв долдугаар сарын 11-18-нд амарч, 19-нөөс хэвийн цагийн хуваарийн дагуу ажиллана.

Хархорин худалдааны төв долдугаар сарын 11-17-нд амран, 18-наас хэвийн цагийн хуваарьтаа шилжинэ.

Харин сүлжээ дэлгүүрүүд наадмын өдрүүдэд тусгай цагийн хуваариар ажиллахаар байна.

Categories
мэдээ нийгэм цаг-үе

Наадмаар аймаг, нийслэлийн 150 гаруй байцаагч хяналт тавьж ажиллана DNN.mn

Үндэсний их баяр наадам тэмдэглэн өнгөрүүлэхтэй холбогдуулан хоол, хүнсээр дамжин хүн амын дунд хоолны хордлого, хордлогот халдвар тархах, үүсэж болзошгүй эрсдэлээс урьдчилан сэргийлэх зорилгоор аймаг, нийслэлийн Хүнс, хөдөө аж ахуйн газар болон Мал эмнэлгийн газрын дарга, хүнсний чанар, стандарт, ургамал хамгаалал, мал эмнэлгийн хяналтын 150 гаруй улсын байцаагчид чиглэл өгч, мэргэжил арга зүйгээр хангах цахим сургалтыг Хүнс, хөдөө аж ахуй, хөнгөн үйлдвэрийн яамны Салбарын хяналтын газраас зохион байгууллаа.

Мөн “Нийтийг хамарсан баяр ёслол, цаг үеийн шаардлагаар зохион байгуулж буй арга хэмжээнд урьдчилан сэргийлэх хяналт шалгалт хийх тухай” удирдамжийн дагуу хүнсний чиглэлийн үйл ажиллагаа эрхлэгчдийн үйл ажиллагаанд хяналт шалгалт хийж, хүний амь нас, эрүүл мэнд, хүнсний аюулгүй байдалд учирч болзошгүй эрсдэл, хууль бус үйлдлээс урьдчилан сэргийлэх, илрүүлэх, таслан зогсоох, илэрсэн зөрчлийг арилгуулах, холбогдох хуулийн дагуу арга хэмжээ авах, зөвлөмж, зөвлөгөө өгөх чиглэлээр хяналт шалгалтыг чангатгаж ажиллах талаар үүрэг өгөв.

Categories
мэдээ улс-төр

УИХ: Боловсролын хуулийг анх удаа багцаар нь өөрчилж, батлав DNN.mn

УИХ-ын чуулганы нэгдсэн хуралдаан эхэллээ. Өнөөдрийн хуралдаанаар хуулийн төслүүдийг эцэслэн баталж, хаврын чуулган хаалтаа хийнэ.

Боловсролын ерөнхий хууль болон хамт өргөн мэдүүлсэн Сургуулийн өмнөх, Дээд боловсролын, Мэргэжлийн болон техникийн боловсрол сургалтын тухай хуулийн төслийг эцэслэн батлав.

Тус хуулийн төслийн эцсийн хэлэлцүүлгийг өчигдөр УИХ явуулах үеэр төслийн 6.1 дэх хэсгийг “Монгол Улсад боловсрол эзэмшүүлэх сургалтыг төрийн албан ёсны хэлээр явуулна. Сургалтын үндсэн гадаад хэл нь англи хэл байх бөгөөд эх хэлээрээ суралцах болон бусад гадаад хэл суралцах эрхийг үл хөндөнө” гэж өөрчлөхийг гишүүдийн 78.7 хувь нь дэмжсэн юм.

Боловсролын ерөнхий хууль болон хамт өргөн мэдүүлсэн хуулийн төслүүдийг ийнхүү эцэслэн баталсан нь Боловсролын хуулийг багцаар нь өөрчилж байгаа анхны тохиолдол аж.

Түүнчлэн Үндэсний их баяр наадмын тухай, УИХ-ын сонгуулийн тухай хуулийн төслийг эцэслэн баталлаа.

Categories
мэдээ цаг-үе

Улаанбаатарт өдөртөө дуу цахилгаантай аадар бороо орно DNN.mn

УЛААНБААТАР ХОТ ОРЧМООР: Үүлэрхэг. Шөнөдөө бага зэргийн бороо, өдөртөө дуу цахилгаантай аадар бороо орно. Салхи баруун хойноос секундэд 5-10 метр. Шөнөдөө +11…+13 градус, өдөртөө +20…+22 градус дулаан байна.

Хур тунадас: Нутгийн зүүн хагаст үүлэрхэг. Шөнөдөө баруун аймгуудын нутгийн баруун хойд хэсэг, говь болон төвийн аймгуудын нутгийн зарим газар, зүүн аймгуудын ихэнх нутгаар, өдөртөө Хэнтийн уулархаг нутаг, Орхон, Сэлэнгэ, Хараа, Ерөө, Хэрлэн, Туул, Тэрэлж, Халх голын сав газар, Дорнод, Дарьгангын тал нутгаар бороо, дуу цахилгаантай аадар бороо орно. Бусад нутгаар солигдмол үүлтэй. Бороо орохгүй.

Салхи: Ихэнх нутгаар баруун хойноос секундэд 6-11 метр.

Агаарын температур: Шөнөдөө Монгол-Алтайн уулархаг нутаг, Завхан голын эх, Хүрэнбэлчир орчмоор +3…+8 градус, Алтайн өвөр говиор +17…+22 градус, Их нууруудын хотгор, говийн бүс нутаг, Орхон, Сэлэнгэ, Хараа, Ерөө, Онон, Улз, Халх голын хөндий, Дорнод, Дарьгангын тал нутгаар +13…+18 градус, бусад нутгаар +8…+13 градус, өдөртөө баруун аймгуудын нутгаар дулаарч Хангай, Хөвсгөл, Хэнтийн уулархаг нутаг, Орхон, Сэлэнгийн сав газар, Хараа, Ерөө, Туул, Тэрэлж голын хөндийгөөр +16…+21 градус, Их нууруудын хотгороор +27…+32 градус, Алтайн өвөр говиор +31…+36, бусад нутгаар +20…+25 градус дулаан байна.

БАГАНУУР ОРЧМООР: Үүлэрхэг. Шөнөдөө бороо орохгүй, өдөртөө дуу цахилгаантай бага зэргийн аадар бороо орно. Салхи баруун хойноос секундэд 6-11 метр. Шөнөдөө +10…+12 градус, өдөртөө +20…+22 градус дулаан байна.

ТЭРЭЛЖ ОРЧМООР: Үүлэрхэг. Шөнөдөө бага зэргийн аадар бороо, өдөртөө дуу цахилгаантай аадар бороо орно. Салхи баруун хойноос секундэд 5-10 метр. Шөнөдөө +8…+10 градус, өдөртөө +18…+20 градус дулаан байна.

Categories
мэдээ цаг-үе

Баяр наадмын өдрүүдэд хилийн боомтуудын ажиллах цагийн хуваарь DNN.mn

Тулгар төрийн 2232, Их Монгол Улс байгуулагдсаны 817, Үндэсний эрх чөлөө, тусгаар тогтнолоо сэргээн мандуулсны 112, Ардын хувьсгалын 102 жилийн ойн үндэсний их баяр наадам долдугаар сарын 10-15-нд болно.

Эдгээр өдөр хилийн боомтуудын ажиллах цагийн хуваарийг Гаалийн Ерөнхий Газраас танилцууллаа.

Баяр амралтын өдрүүдэд ОХУ, БНХАУ-тай хиллэдэг төмөр замын боомтууд ердийн цагийн хуваариараа ажиллана. Чингис хаан олон улсын нисэх буудал нислэгийн цагийн хуваарийн дагуу ажиллах бол авто замын ихэнх боомт долдугаар сарын 11-15-нд амрахаар байна.