Аж үйлдвэрийн сайд Д.Эрдэнэбат өчигдөр
Сэлэнгэ аймагт ажиллах үеэрээ тус аймгийн Дулаан ханы дөрвөн уулзвараас
Хүдэр сум хүртэл тавьж байгаа хатуу хучилттай авто замын ажил байдалтай
танилцаж үүрэг өглөө. Тодруулбал, ирэх зургадугаар сарын 22-н гэхэд
дээрх чиглэлд тавьж буй авто замын эхний 30 км замыг барьж дуусган
ашиглалтад оруулахыг үүрэг болгосон юм. Уг зам ашиглалтад орсон нөхцөлд
Ерөө сумтай хатуу хучилттай авто замаар холбогдох юм байна.
Дулаан ханы дөрвөн уулзвараас Хүдэр сум хүртэл нийт 104.5 км авто зам баригдах аж.
Уг замыг барих ажил концессын гэрээний
дагуу хийгдэж байна. Аж үйлдвэрийн сайдын эрхлэх асуудлын хүрээнд
концессоор гүйцэтгэх ажил багтдаг юм.
Зам барих ажлын гүйцэтгэгчээр нь “Пик
девелопменть” компани ажиллаж байгаа бол хөрөнгө оруулагч нь “Кью эф си”
аж. Гэрээнд зааснаар авто замыг барьж ашиглалтад оруулах хугацаа ирэх
аравдугаар сарын 22-ний өдөр юм байна. Ажил одоогоор хэвийн үргэлжилж
байгаа, нийтдээ 500 гаруй хүн ажиллаж байна гэсэн мэдээллийг гүйцэтгэгч
компанийн инженер Аж үйлдвэрийн сайдад уламжиллаа. Мөн Хүдэр хүртэл авто
замыг барихад ирэх өдрүүдэд зам хаах шаардлага үүсэж байгааг онцолсон.
Энэ асуудалд сайд Д.Эрдэнэбат орон нутгийн удирдлагуудтайгаа урьдчилан
ярьж, ойлголцохыг анхааруулсан юм.