Ардын уран зохиолч Т.Галсангийн шүлэг, Төрийн шагналт, Урлагийн гавьяат зүтгэлтэн Б.Шаравын аялгуу “Аав ээж хоёр минь” дуунд зориулсан хөшөөний нээлтийг өнөөдөр хийлээ. Энэхүү хөшөөг Байгалийн түүхийн музейн урд, Төрийн тусгай албан хаагчдын эмнэлгийн зүүн талд байрлуулжээ.
Хөшөөний нээлтийн ёслолд Ардын уран зохиолч Т.Галсан, Төрийн шагналт, Урлагийн гавьяат зүтгэлтэн Б.Шарав, Хууль зүй, дотоод хэргийн сайд Ц.Нямдорж тэргүүтэй хүмүүс оролцсон байна. Мөн энэхүү хөшөөний нээлтэд зориулсан тоглолт Дуурь, бүжгийн эрдмийн театрт болжээ.
“Аав, ээж хоёр минь” дуу төрснөөс хойш 35 жилийн хугацаа өнгөрчсөн аж.
Энэхүү ойд зориулан хөшөө босгох санаачилгыг Хууль зүй, дотоод хэргийн сайд Ц.Нямдорж анх гаргасан юм байна. Монгол ард түмний дуулах дуртай энэхүү сайхан дууг олон алдартай дуучид дуулж амилуулсан байдаг. Урлагийн гавьяат зүтгэлтэн Б.Шарав тус дуугаа Соёлын тэргүүний ажилтан, дуучин Б.Отгонжаргалаар дуулуулах хүсэлт тавьжээ. “Аав, ээж хоёр минь” дууг түүний дуулсан хувилбараар удахгүй сонсох юм байна.
