Украины Мелитополь хот эзлэгдсэний дараа орос цэргүүд тус хотод байдаг Америкийн “John Deere” компанийн хөдөө аж ахуйн машин техникүүдийг дээрэмдэж, нутаг руугаа ачуулжээ. Мелитополь хот дахь тус компанийн гэрээт борлуулагч Агротекийн төлөөлөгч нийтдээ 5 сая ам.долларын үнэ бүхий хөдөө аж ахуйн машин техникүүдийг дээрэмдсэний ихэнх нь Чечень рүү ачигдсан гэсэн байна. Нийт 27 техник ачигдсанаас зөвхөн нэг комбайны үнэ нь 300,000 ам.доллар хүрдэг ажээ. Машин техникүүдийг ОХУ руу ачих ажиллагаа Оросын цэргийн бүлэглэлүүд хоорондоо өрсөлдөн өөр өөрийн нутаг руу ачуулж өрсөлдөөнтэй бас нэлээд зохион байгуулалттай байсныг Агротекийн төлөөлөгч мэдээлсэн байна.
Тэд Оросын зэвсэгт хүчний “Z” тэмдэглэгээ бүхий машинд эдгээр техникийг ачиж тээвэрлэсэн байна. “John Deere” компанийн техникүүд газар зүйн байрлал тодорхойлох “GPS” системтэй байдаг тул хаана хаана очсоныг нь тодорхойлж чаджээ. Хамгийн хол нь Чечений Захан Юрт тосгонд очсон байгааг Агротек компанийн төлөөлөгч мэдээлсэн байна. Тэрээр эдгээр техникүүдийг зайнаас ажиллагаагүй болгож чадсан тухай мэдээлжээ.
Одоо дээрэмдсэн техникүүдийг задалж зарах замаар ашиг олох ганц боломж байгааг Агротекийн төлөөлөгч ярьсан байна. Зөвхөн машин техникээр тогтохгүй Мелитополь орчмын зоорь агуулахуудаас олон зуун мянган тонн үр тариаг Орос руу ачуулсан тухай гэрчүүд мэдээлж байна.