ЭМЯ–ны Гадаад харилцаа, хамтын ажиллагааны хэлтсийн дарга Б.Янжмаа, “АНУ-д халдварын тохиолдол 140 000 гаруйд хүрч, 2,400 орчим хүн нас баржээ. Тус улсын Харшил, халдварт өвчний хүрээлэнгийн захирал ард иргэддээ хандаж “АНУ-д халдварын оргил үе хараахан болоогүй. Ирэх долоо хоногт халдварын тоо болон нас баралтын тоо оргилдоо хүрэх магадлалтай байна. Мөн математик тооцооллын дагуу тус улсад хэдэн сая хүн халдвар авч нас баралт 100 мянгад хүрэх тооцоолол байгаа” тухай мэдэгдсэн байна. АНУ-ын холбооны Засгийн газраас энэ сарын 31-нийг хүртэл тогтоосон хязгаарлалтаа ирэх сарын 30-ныг хүртэл сунгаж мөрдүүлэхээр болсон. Испани улсад өнгөрсөн 24 цагийн хугацаанд 838 нас баралт бүртгэгдсэн нь халдвар анх гарснаас хойших хамгийн өндөр үзүүлэлт юм. Японд 48 000 гаруй лабораторийн шинжилгээ хийж, нийт 1,700 гаруй халдварын тохиолдлыг илрүүлжээ. Сүүлийн өдрүүдэд Токио хотод эх уурхай нь тодорхойгүй өвчлөл гарч, халдварын тохиолдол нэмэгдэж байгаа талаар эх сурвалжууд мэдээлж байна. Өнгөрсөн хоногт БНСУ-д шинээр 78 тохиолдол илрүүлснээс 13 нь гаднаас зөөвөрлөгдсөн, 31 нь Сөүл хот орчмын бүсээс, 14 нь Дэгү хотод бүртгэгджээ” гэв.