“Утааны эсрэг ээж аавууд” ТББ хоёр дахь жилдээ жагсаж байна. Энэ нь тус байгууллагын гурав дахь удаагийн жагсаал юм. Тэд нийслэлийн удирдлагуудад 13 шаардлагыг хүргүүлсэн аж. Үндсэн хоёр шаардлага нь утааг бууруулах, хүүхдийн нэгдсэн эмнэлгийн тоог нэмэх юм. Энэхүү шаардлагуудыг иргэдээс ирсэн санал хүсэлтээс үндэслэн гаргасан ажээ.
-ТЭД АГААРЫН БОХИРДЛЫГ БУУРУУЛАХ ЧИГ ҮҮРЭГТЭЙ ТӨРИЙН БАЙГУУЛЛАГУУДЫН ГАДАА ГУРВАН УДАА ЖАГСААЛ ХИЙХЭЭР ТӨЛӨВЛӨЖЭЭ-
“Нэг удаа жагсаад бидний тэмцэл дуусахгүй” гэж жагсаалыг зохион байгуулагид хэлсэн юм. Тэд дараа долоо хоногоос Агаарын бохирдлыг бууруулах газрын үүдэн дээр жагсах бөгөөд тэрний дараа долоо хоногт Хүний эрхийн комиссын гадаа жагсахаар төлөвлөжээ.
-ЭЭЖ ААВУУД ХЭВЛЭЛ МЭДЭЭЛЭЛ БОЛОН ФЭЙСБҮҮК ГРУППЭЭР МЭДЭЭЛЭЛ АВЧ ЖАГСААЛД НЭГДСЭН АЖ-
Цуглаанд оролцогч бүр шүгэл үлээж тэмцлээ илэрхийлж байсан юм. Энэ талаар жагсаалыг зохион байгуулагч нарын нэг Г.Мартагаас тодруулахад “Ер нь Аливаа нийгэмд тулгарч буй асуудал бүрийг шүгэл үлээж тэмцдэг. Тэр утгаараа иргэд агаарын бохирдлын эсрэг шүгэл үлээж тэмцэж байна” гэв.
Мөн түүнээс өнгөрсөн жилийн жагсаал хэр үр дүнд хүрсэн талаар асуухад “Жагсаалын үр дүн гэвэл үндэсний хөтөлбөртэй болсон. Хамгийн дажгүй үр дүн нь цахилгаан халаагуур юм. Гэвч ард иргэд шөнө цахилгаанаа хангалттай хэрэглэж чадахгүй байна. Яагаад гэвэл килобатын хязгаарлалттай. Мөн анхлан авч байгаа хүмүүст маш их хэмжээний мөнгө хэрэг болдог” гэв.
Б.АМАРТҮВШИН
