Өнөөдөр олон улсын ахмадын баярын өдөр тохиож байна. Анх 1992 онд НҮБ-аас жил бүрийн аравдугаар сарын 1-ний өдрийг олон улсын ахмадын баяр болгон тэмдэглэхийг дэлхий даяар зарласан. Тэгэхээр өнөө жил ахмадын баярыг албан ёсоор 25 дахь жилээ тэмдэглэж буй юм. Эл өдөр залуучууд аав, ээж, азай бурлуудынхаа замнал түүхээр бахархаж, сургаал үгийг нь сонсонх учиртай сайхан өдөр.
Манайхан ахмадын баярыг тэмдэглэх гэдэг ойлголтыг нэг иймэрхүү байдлаар хүлээн авдаг болсон хэрэг. Ганц нэг бэлэг, торго, сүү өгнө. Мөн ахмадуудаа хүлээн авч, “Та бүхэндээ баярлаж явдаг шүү” хэмээнэ. Яахав жилдээ нэг удаа ч болов ахмадуудтайгаа уулзаад, баярласан, талархсан сэтгэлээ илэрхийлж байгаа нь сайн хэрэг. Гэхдээ үнэхээр л ахмадуудаа баярлуулъя гэж байгаа бол үүнээс илүү ихийг хийх ёстой гэдэг нь мэдээжийн асуудал биз ээ. Өөрөөр хэлбэл, нэг удаадаа баярлуулаад өнгөрөх бус ахмадуудынхаа нийгмийн асуудалд анхаарч цаашдын амьдралд нь хэрэг болох ажлыг хийх хэрэгтэй байна. Тэгэхгүй болохоор өнөөдөр ахмадын баяр болохоор аль нэг сайд дарга нь ахмадуудаа хүлээж аваад л “шоу” хийдэг болчихоод байх шиг. Их сайндаа л одон медаль энгэрт нь зүүж өгөөд л ахмадын баярыг тэмдэглэж байна.
Аль нэг ахмадын баярын хүлээн авалтад Монголын барилгын салбарт насаараа барилгачин хийчихсэн ахмад барилгачин, ахмад багш, ахмад биеийн тамирын зүтгэлтэн, шинжлэх ухааны доктор, профессорууд сууж байдаг. Эдгээр хүмүүсийн замнал, түүх, туршлагаас нь олон нийтэд, залуучуудад хэвлэл мэдээллийн хэрэгслэлийг ашиглан хүргэж байх нь хамгийн чухал гэдгийг хэн хүнгүй л мэдэх учиртай. Гэвч эрхэм төрийн түшээд эл өдрийг далимдуулж, ахмадыгаа хүндэтгэсэн нэрийн дор өөрөө л хэвлэл мэдээллэд ярилцлага өгч, “хувийн тоглолт” хийсээр дуусгадаг болжээ. Ахмадуудынхаа түүх, дурсамжаас нь сонсгохгүй эл өдрийг хэн нэгэн эрх мэдэлтэн, албан тушаалтны шоу болон өнгөрч байгаа нь үнэхээр харамсалтай.
Ахмадуудыгаа будаатай хуургаар хуурч, өөрийнхөө шоу болгодог бичигдээгүй хууль манайд бий боллоо. Төрийн түшээд, удирдлагууд олон нийтийн сүлжээ, хэвлэл мэдээллийн хэрэгслэлээр жигтэйхэн ахмадуудыгаа хүлээн авч хүндэтгэл илэрхийлчихсэн юм шиг ахмадуудынхаа алдар гавьяагаар бахарж байна гээд яриад байдаг. Яг үнэндээ наанаа ахмадын баяраар азай буурлуудаа хүлээн авч хүндэтгэл илэрхийлээд буй төрийн түшээ цаанаа энгийн ахмадын өдий хүртэл амьдралын төлөө, улс эх орныхоо төлөө зүтгэж ирсэн гавьяа, замнал түүхийг мэдэхгүй л шүү дээ.
Уг нь ахмадын баярын өдрөөр хэн нэгэн өөрийгөө шоудах бус эгэл жирийн ахмадуудынхаа замнал түүх, алдар гавьяаг хөөрөлдөн ярьж суумаар санагдана.