БНСУ-ын Пёнчан хотноо ирэх жил зохион байгуулах өвлийн олимпод хоёр Солонгосын багийг нэгтгэж оролцуулах Сөүлийн саналыг БНАСАУ хүлээж аваагүй гэнэ. Өмнөд Солонгосын шинээр сонгогдсон Ерөнхийлөгч Мун Жэ Ин хойд хөршдөө дээрх саналыг тавьсан юм. Гэвч Олон улсын олимпийн хороо дахь Хойд Солонгосын гишүүн Чан Ун тэрхүү саналыг няцааж, “гэрээ хэлцэл хийх цаг хугацаа байхгүй” гэх хариу өгчээ. Өмнө нь хоёр Солонгосын нэгдсэн баг 1991 оны Ширээний теннисний ДАШТ-д хамтран оролцож байсан аж. Тэр үед таван сар үргэлжилсэн 22 удаагийн шат дараатай уулзалт, хэлэлцээрийн дүнд хамтран оролцох гэрээ байгуулж байжээ.