МАН-ын Бага хурал Ерөнхийлөгчийн сонгуульд нэр дэвшигчийг тодруулж, Ерөнхийлөгчийн сонгуульд дэвшүүлэх мөрийн хөтөлбөрөө батлах юм.
Тус намын дотоод дүрмээр сонгуульд нэр дэвшигчийг Удирдах зөвлөлөөс дэвшүүлж, Бага хурлаар хэлэлцүүлдэг. МАН-ын Удирдах зөвлөл өчигдөр орой хуралдаж, Ерөнхийлөгчийн сонгуульд нэр дэвших боломжтой таван хүний нэрийг дэвшүүлжээ. УИХ-ын дарга М.Энхболд, УИХ-ын дэд дарга Ц.Нямдорж, Шадар сайд У.Хүрэлсүх, Батлан хамгаалахын сайд Б.Бат-Эрдэнэ, УИХ-ын гишүүн Ө.Энхтүвшин нарыг Удирдах зөвлөлөөр хэлэлцсэн аж. Тэд МАН-аас хийсэн судалгаагаар хамгийн өндөр оноо авсан гэнэ.
Удирдах зөвлөл дээр Шадар сайд У.Хүрэлсүх, Батлан хамгаалахын сайд Б.Бат-Эрдэнэ, УИХ-ын гишүүн Ө.Энхтүвшин нар нэрээ татжээ. Ерөнхийлөгчийн сонгуульд нэр дэвшүүлэх асуудлаар УИХ-ын дарга М.Энхболд, УИХ-ын дэд дарга Ц.Нямдорж нарын нэрийг Бага хуралд оруулж ирлээ.