Өнөөдөр Монголын Бурхан Шашинтны Төв Гандантэгчэнлин хийд Олон Улсын Бурханы Шашинтнуудын Өдөр тохиож буйтай холбогдуулан ёслол, айлтгалууд хийж байна. 2014 оны 12 дугаар сард Япон улсад зохион байгуулагдсан “Дэлхийн Буддистуудын Дээд Хэмжээний Чуулган”-ы VI уулзалтаас жил бүрийн дөрөвдүгээр сарын 8-ны өдрийг “Олон Улсын Бурханы Шашинтнуудын Өдөр” болгохоор тунхаглажээ. Улмаар 2015 оноос жил бүр энэ өдрийг буддын шашин сүсэглэдэг дэлхийн 41 орны хамтаар Монгол Улсын буддын шашинтнууд тэмдэглэсээр ирсэн билээ.
Өнөөдөр 11:00 цагт Гандантэгчэнлин хийдийн Мигжэд Жанрайсигийн өмнөх талбайд Гандантэгчэнлин хийдийн Тэргүүн их хамба лам, гавж Д.Чойжамц мэндчилгээ дэвшүүлж, айлдвар айлдсан байна. Айлтгалын дараа Д.Чойжамц тэргүүтэй зочид төлөөлөгчид Мигжэд Жанрайсиг бурханд хадаг, зул сэлт тахил өргөжээ. Сүсэгтэн олныхоо хамт лам хуврагууд төр түмний их шүтээн, Мигжэд Жанрайсиг бурханд Мандал өргөж, сүсэгтэн олондоо зориулан Гавсүм, Шашин дэлгэрэхийн ерөөл, Жинлавцогзол, аравдугаар Богдын нүржин солдэв зэрэг номуудыг хурж байна.