Хууль бус буюу холбогдох байгууллагын зөвшөөрөлгүйгээр орон нутаг руу зорчигч тээвэрлэж буй жолооч нарын буруутай үйлдлээс шалтгаалан орон нутгийн замд осол гарах тохиолдол нэмэгдэж байгааг өнөөдөр Зам, тээврийн хөгжлийн яам (ЗТХЯ)наас мэдээлэв.
Энэ онд орон нутгийн замд 334 хүн нас барсны дийлэнхийг хууль бус тээвэрлэлт эзэлж байгааг албаныхан хэлж байна. Хууль бус тээврийн үйлчилгээ үзүүлж буй иргэд ихэвчлэн техникийн үзлэгт хамрагдаагүй автомашин ашигладаг бөгөөд ингэхдээ ачааны даац, хүний тоо болон орон нутгийн замд хурд хэтрүүлсний улмаас осол, аваарт ордог байна. Иймд иргэдийг амь нас, эд хөрөнгө, эрүүл мэнд хамгаалж, албан ёсны гэрээтэй, даатгалтай, баталгаатай тээврийн хэрэгслээр зорчихыг ЗТХЯ-наас уриалав.
Автотээврийн үндэсний төв (АТҮТ)-тэй албан ёсны гэрээ байгуулсан аж ахуйн нэгжүүд нь хурд болон хөдөлгөөний нэгдсэн хяналттайгаас гадна осол саатал гарсан тохиолдолд галт тэргэнд шилжин суух, зочид буудалд байрлах зардал зэргийг нөхөн олгодог бөгөөд тээврийн хэрэгслүүд нь техникийн хяналтын үзлэгт бүрэн хамрагддаг аж. Одоогоор АТҮТ-аас 51 аж ахуйн нэгжтэй хот хоорондын зорчигч тээврийн үйлчлгээ үзүүлэх гэрээ байгуулсан байна. Дээр аж ахуйн нэгжүүд улсын хэмжээнд 71 чиглэлд 45 хүний суудалтай том оврын автобус 554, 24-36 хүний суудалтай дунд оврын автобус 109, бага оврын автобус 19, 245 суудлын автомашин, 1154 мэргэшсэн жолоочтойгоор тээвэрлэл хийж байна.
Харин хууль бус зорчигч тээврийн 3000 орчим жолооч байгаа аж. АТҮТ болон Замын цагдаагийн албанаас нийслэлээс орон нутгийг зорих автозамуудад 24 цагийн турш хяналт, шалгалт хийж, хууль бус тээвэрлэлтийг илрүүлэх, таслан зогсоох арга хэмжээ авч байгаа аж.
ЗТХЯ-наас салбарын хөгжилд иргэдийн оролцоог нэмэгдүүлэх зорилгоор олон нийтийн сүлжээ буюу фэйсбүүкт “Зам, тээврийн хөгжил” групп нээн ажиллуулж байгаа аж. Иргэд уг группт нэгдсэнээр хууль бус тээвэрлэлтийн талаар мэдээлэл өгөх, гомдол, хүсэлт гаргах, боломжтой аж.