Өнөөдөр Баянзүрх дүүргийн 50 дугаар цэцэрлэгт тохижуулсан “Монгол-Хятадын хүүхдийн хөгжлийг дэмжих найрамдлын төв”-ийг хүлээлгэн өгөх үйл ажиллагаа боллоо. Нээлтийн үйл ажиллагаанд Монгол Улсын Шадар сайдын зөвлөх С.Янжинсүрэн, БНХАУ-ын Элчин сайдын яамны улс төрийн зөвлөх Ли Еан Жүн, БНХАУ-ын Элчин сайдын яамны улс төрийн газрын төлөөлөгч Хуан Жүн, Нийслэлийн Боловсролын газрын орлогч дарга Ц.Отгончимэг, Баянзүрх дүүргийн Боловсролын хэлтсийн ахлах мэргэжилтэн П.Өлзийтөгс нар болон цэцэрлэгийн хамт олон, эцэг эхчүүдийн төлөөлөл оролцов.
Тус төвийн үйл ажиллагааг нээж 50 дугаар цэцэрлэгийн эрхлэгч Х.Байгалмаа “БНХАУ-ын элчин сайдын яамны 100 мянган юаны хөрөнгө оруулалтаар хийгдсэн энэ танхимаа хүүхэд багачууддаа хүлээлгэн өгч байгаадаа их баяртай байна. Бидэнд итгэл хүлээлгэж, хамтран ажилласан БНХАУ-ын элчин сайдын яамны хамт олон болон Монгол улсын шадар сайд, Монгол улсын Шадар сайдын зөвлөх С.Янжинсүрэн нарт баярлаж талархсанаа илэрхийлье” гэв. Төслийн хүрээнд хүүхдийн оюун ухаан, сэтгэхүй, бие бядарыг хөгжүүлэх олон төрлийн тоглоом авч, өрөөг тохижуулсан байна. Тус цэцэрлэг найман бүлэгтэй, 180 гаруй хүүхэд суралцаж буй ажээ.
