Нийслэлийн Засаг дарга бөгөөд Улаанбаатар хотын захирагч С.Батболд хуульд заасан эрхийнхээ хүрээнд захирамж гаргаж, нийслэлийн Хан-Уул дүүргийн Засаг даргаар Ж.Алдаржавхлан, Сүхбаатар дүүргийн Засаг даргаар Х.Болормаа нарыг батламжиллаа. Хуулиараа дүүргийн Засаг даргыг томилохдоо Нийслэлийн засаг дарга бөгөөд Улаанбаатар хотын захирагчтай зөвшилцдөг байна. Мөн Авилгатай тэмцэх газарт хөрөнгө орлогын урьдчилсан мэдүүлгээ өгч, хуулийнхан судалж, хариулт ирүүлдэг заалттай. Энэ дагуу НЗДТГ судалж үзээд, өнөөдөр хотын дарга тус хоёр дүүргийн Засаг даргын батламжинд гарын үсэг зурлаа.
Сүхбаатар дүүргийн Засаг дарга Х.Болормаа “Манай дүүргийн хувьд нийт 140 гаруй мянган иргэнтэй, хотынхоо зүрх нь болсон дүүрэг. Сургууль, цэцэрлэг, соёлын байгууллагууд, элчин сайдын яамд байрладаг. Дүүргийн хөгжил ахицтай явж байгаа. Цаашид үүнийг үргэлжлүүлж, ард иргэдийнхээ сайн сайхны төлөө ажиллана” гэсэн юм.
Хан-Уул дүүргийн Засаг дарга Ж.Алдаржавхлан “Өнөөдөр албан ёсоор батламжаа гардаж авлаа. Манай дүүрэг бол Монгол Улсын нийслэлийн өнгө төрх болсон, үүд нь болсон дүүрэг. Бид дүүргээ эмх цэгцтэй, цэвэр цэмцгэр, эко дүүрэг болгоно гэж бодож байгаа. Иргэдээ дээдэлж, хувийн хэвшлээ дэмжиж ажиллана. Хан-Уул дүүргийн хувьд хүн ам өсч, шинээр сүндэрлэх барилга байшин өдрөөс өдөрт нэмэгдэж байна. Тиймээс зохион байгуулалтыг маш сайн хийж ажиллахаар төлөвлөж байна” гэлээ.
