МАН бурхныг хуц гэлээ. Ингэж доромжилсон нь анхны тохиолдол биш л дээ. Эд төрийн эрхэнд гарч ирэхээрээ л бурхан, хэвлэл хоёртой ач тач үзэж тардаг зантай. Бэлээхэн түүх нь ч байна. Монголын түүхэнд хар мөр үлдээсэн 1937 оны цуст хэлмэгдүүлэлтээр эд бурхан шашинг яаж доромжилж, олон мянган хүний амийг бүрэлгэлээ. Бурхан тахил, шүтээнүүдийг сүйтгэж, алга хавсарсан болгоныг атаатан хэмээн үзэж “Бурхан минь” гэж уулга алдсан хүнийг хүртэл баривчилж байсан гашуун түүх бий.
Энэ удаад бурхныг хуц гээд зогссонгүй бүр заамдаж аваад духан дээр нь няслах хэмжээнд улайрчихаж. Засгийн эрх барьж байгаагаа хүн төрөлхтний итгэл үнэмшил, бэлгэ тэмдэг, ёс суртахуунаас дээгүүрт тавих хэмжээний зиндаанд оччихлоо гэж андуураад байх шиг. Өнгөрсөн долоо хоногт болсон тус намын УИХ дахь намын бүлэг хуралдах үеэр УИХ-ын гишүүн Ц.Нямдорж “Өнгөрсөн зургадугаар сарын 29-нд бидний жаргал дууссан. Ирэх дөрвөн жилд бид дандаа зовлон ярих болно. Эрх баригчдын зовлонгийн тойрог эхэлсэн шүү. Та нар өнөөдөр сайжруулаад зовлон дуусчихна гэж бодож байна уу. Дөрвөн жил зовно. Хэвлэл мэдээллийн хэрэгслийг анхаарахгүй байна. Ерөнхий сайд, Засгийн газрын гишүүд оруулж ирсэн саналаа зөвтгөх гэж дайраад байх юм. Ингэх нь буруу. Гишүүдийнхээ үгийг сайн сонс. Зөвтгөж ярихынхаа оронд ямар алдаа гаргаснаа олж харж, түүнийгээ яаж засч сайжруулахаа л бодох хэрэгтэй. Бид улс төрийн мэдрэмжтэй байх хэрэгтэй байна. Ер нь орон нутгийн сонгуулийн өмнө төсвийн тодотголыг оруулж ирсэн нь буруу болчихлоо гэж бодох боллоо. Цалин хасах саналын цаана 400 мянган хүн байгаа гэсэн тооцоо гарсан бол энэ чинь 400 мянган хүний саналыг алдаж байна л гэсэн үг шүү дээ” хэмээгээд хэвлэл мэдээллийн хэрэгслүүдийг хиаруулах хуучны “жор”-оо хэрэглэхийг сануулаад авав. Энэ хурал дээр МАН-ын гишүүд иймэрхүү өнгө аястай зүйлс цухалзуулж, бүлгийн дарга Д.Хаянхярваа нь ч бурхныг хуц хэмээхүйд бусад нь нижигнэтэл алга ташин дэмжжээ.
Ужиг өвчин гэнэт сэдэрдэг шиг МАН-ынхны ужиг хөдлөөд нэг сонинг барьж аваад тагнуулын байгууллагад өгчихлөө. Тэгтэл тэр сонин нь МАН-ын нууц эзний хэвлэл байж таарав. Тус намын доодчуул үүнийг яаж мэдэх вэ дээ. Гадарлах ч үгүй болохоороо ингэж эзнийхээ сонинг барьж аваад өгчихөж байгаа байхгүй юу. Тагнуулын дарга нь тэр нууц эзнийх нь хуурай хүү болохоор юу ч гэж шалгаж сүйд майд болох вэ дээ.
МАН буюу МАХН 2000 онд гарч ирсний дараа Хууль зүйн сайд Ц.Нямдорж нь садар самуунтай тэмцэх нэрийдлээр сонинуудыг хоморголон хааж байсныг ард түмэн санаж буй. Хэвлэл мэдээллийн байгууллагуудын эрх чөлөөг боомилсон энэ үйлдлийг тухайн үед “МАХН өөрсдийгөө муулуулж, шүүмжлүүлэхгүй гэхдээ ингэж хэвлэлийг гарын аясаараа хөдөлгөхийн тулд хоморголол явуулж байна” гэж дүгнэж байсан билээ. Тэр үед “Өдрийн сонин”-ы Ерөнхий эрхлэгчийн нэгдүгээр орлогч, Төрийн шагналт Б.Цэнддоо “Бандааштай ухна” гэж нийтлэл бичиж Ц.Нямдоржийг нэг сайн улалзуулж, олны элэг доог болгочихож билээ.
Энэ удаад манай коммунистууд хуучин барилаа тавьсангүй. Бурхныг хуцуулах гэж, хэвлэлийг хорих гэж зүтгэж эхэллээ. Энэ нь коммунистуудын гэм биш зан буюу өнөө муу ужиг хууч нь сэдэрсний илрэл юм хөөрхий.