Цагдаагийн ерөнхий газрын Лицензийн төв жолооны сургууль төгсөгчид, ангилал ахиулсан жолооч нарт үнэмлэх шинээр олгох, жолоочийн үнэмлэхээ гээгдүүлсэн, үрэгдүүлсэн иргэдэд нөхөн олгох, хуучин загварын болон гадаад орнуудын жолоочийн үнэмлэхийг сольж олгох, тээврийн хэрэгсэл жолоодох эрхээ хасуулсан иргэдээс шалгалт авч, эрхийг нь сэргээж, үнэмлэх олгох ажлын хүрээнд өдөр тутам 600-800 гаруй хүнд үйлчилж, 300-500 жолоочийн үнэмлэхийг хэвлэж байна.
Энэ оны жолоочийн үнэмлэхний бэлдэц, хор, дагалдах хэрэгслийг худалдан авах нээлттэй тендер сонгон шалгаруулалтыг Худалдан авах ажиллагааны газраас зохион байгуулсан бөгөөд энэ үйл ажиллагаа удааширснаас үүдэж, өнгөрөгч 4-р сарын 10-ны өдрөөс эхлэн үнэмлэх хэвлэлт бүрэн зогссон юм. Улмаар 7-р сарын 18-ны өдрийг хүртэл 40 гаруй мянган иргэдийн жолооны үнэмлэхний захиалга хүлээгдэх болсон бөгөөд одоогоор 4, 5, 6-р сард захиалга өгсөн иргэдийн үнэмлэхийг хэвлэж дууссан. Цаашдаа захиалга өгсөн хугацааны дарааллаар иргэдийн жолооны үнэмлэхийг хэвлэж олгохоор болжээ.
Б.ЭРДЭНЭ-ОЧИР