Монголын чөлөөт бөхийн холбооноос өнөөдөр хэвлэлийн хурал зохион байгууллаа. Хурлыг нээж МЧБХ-ны ерөнхийлөгч Д.Дагвадорж үг хэлэхдээ “Олимпоос хойш Монголын чөлөөт бөхийн холбооны удирдах зөвлөл хоёр удаа хуралдаж цааш яах тухайгаа хэлэлцлээ” хэмээв.
Үргэлжлүүлэн УИХ-ын гишүүн А.Сүхбат “Төр засаг ард түмнээрээ спортын хорооны мөнгийг шийдэж өгсөнд баярлалаа. 2016 оны олимпод төр засаг найман тэрбум төгрөг шийдэж өгсөн. Манай хоёр дасгалжуулагч дэвжээн дээр бүдүүлэг үйлдэл гаргасан. Бид бүхэн ард түмнээсээ уучлал гуйж байна” гэлээ. Мөн Д.Сумъяабазар “Мандахнарангийн хувьд маш сайн барилдсан. Хэлүүлэлтгүй мэдэж байгаа. Г.Мандахнарангийн асуудал бол тусдаа. Дэлхийн чөлөөт бөхийн холбооноос албан тоот ирэхдээ монгол дасгалжуулагчдын үйлдэл Дэлхийн нэгдсэн бөхийн холбооны нэр хүндийг гутаасан. Тиймээс танай бүх тамирчдыг энэ асуудлыг шийдэгдтэл ямар ч тэмцээнд оруулахыг түдгэлзүүлж байна гэсэн байна. Есдүгээр сарын 1 гэхэд ЧБХ байр сууриа илэрхийлж явуулах эрхтэй. Дараа нь олон улсын спортын арбитрын шүүхэд хандах эрхтэй гэсэн бичиг ирсэн” гэсэн юм.
МЧБХ-ноос хоёр дасгалжуулагчид холбооны дүрмийн 8.6-д заасан заалтыг зөрчсөн тул хариуцлага тооцохоор болжээ. Тодруулбал, хоёр дасгалжуулагчийн чөлөөт бөхийн үйл ажиллагаанд оролцох эрхийг хоёр жилээр хасах шийдвэр гаргасан тухайгаа хурлын үеэр мэдээллээ. Түүнчлэн Ажлын хэсэг байгуулж Мандахнарангийн барилдааныг судлахаар болсон. Хэрэв медалиа эргүүлж авах боломжтой бол олон улсын арбитрын шүүхэд хандана гэв.
А.ЗУЛ