УИХ-ын чуулганы нэгдсэн хуралдаан үргэлжилж байна. Хуралдаанаар
Цэргийн албан хаагчийн эрх зүйн байдлын тухай болон холбогдох бусад
хуулийн төслүүдийн анхны хэлэлцүүлгийг хийв. Хэлэлцэж буй асуудалтай холбогдуулж зарчмын зөрүүтэй болон найруулгын санал хураалт явуулав. Уг хуулийн төслийг эцсийн хэлэлцүүлэгт бэлтгүүлэхээр Аюулгүй байдал гадаад бодлогын байнгын хороонд шилжүүлсэн юм. Хуулийн төсөлтэй холбогдуулж УИХ-ын гишүүн Д.Лүндээжанцан асуулт асуусан юм. Тэрбээр “Хилийн хуулийг 1990-ээд онд хэлэлцсэн. Хилийн цэргийн албан хаагчид үндсэн цалин дээр нэмэгдэл өгөх заалт оруулсан юм. Энэ заалт одоогийн хуульд байна уу?” гэсэн юм. Асуултанд УИХ-ын гишүүн Ж.Энхбаяр хариулахдаа “Монгол Улсын Цэргийн албан хаагчийн эрх зүйн байдлын тухай хуульд өмнө нь 15 удаа өөрчлөлт орсон. Нэмэгдэл зардлыг хассан зүйл байхгүй. Харин бататгаж өгсөн заалтууд ихээхэн орсон” хэмээсэн юм.
Үүний дараагаар Тогтоолуудын төсөлд өөрчлөлт оруулах төслийг
хэлэлцэв. Уг төслийг анхны хэлэлцүүлгээр батлах санал гарсан байна.
Хэлэлцэж байгаа хуулийн төсөлтэй холбогдуулан УИХ-ын гишүүн
Ч.Хүрэлбаатар “Энэ тогтоолын төслийг 2014 онд МАН-ын бүлэг санаачилсан.
Яагаад хоёр жил энэ төслийг дарчихаад одоо оруулж ирж байгаа юм.
Парламент завсарлахад 40 хоног дутуу байхад Засгийн газрын төсөл мэтээр
оруулж ирж байна. Хөдөө орон нутагт АН-ын рейтинг муу байгаа. Тийм
болохоор энэ урамшууллыг олгож, рейтингээ өсгөх гэж байгаа юм уу. Одоо
УИХ-ын чуулганы 3 удаагийн хуралдаан болно. Өнөөдөр үүнийг хэлэлцвэл
мөнгө төсөвлөх асуудал үүснэ. Төсвийн тодотголоо ч хэлэлцээгүй байгаа.
Үүнд тайлбар авмаар байна хэмээв.
-2016 оны төсөвт хорооны гишүүдэд урамшуулал тусгагдсан. Харин
хоршооны гишүүн биш гэдгээр урамшуулалд хамрагдахгүй асуудал гарч байна
гэж малчид хэлсэн. Тиймээс хоршооны гишүүн байхаас үл хамаарч
урамшуулалд хамруулах төслийг оруулж ирж байгаа юм хэмээн хариулсан юм.
Чуулганы хуралдаан үргэлжилж байна.