АНУ-ын Чикаго хотын захын Дес Плейн хэмээх жижиг хотод сураггүй алга болсон Г.Зулцэцэг гэгч бүсгүйн цогцсыг машиных нь тээшнээс олсон талаар албан бус мэдээ ирлээ. Чикаго хотод ажиллаж амьдарч буй монголчуудын ярьж буйгаар бүсгүйн унаж явсан машиныг хуучин машин тавьдаг газраас олсон бөгөөд машины тээшинд цогцос байсныг мэдэлгүйгээр ачиж явсан байсан гэнэ. Бүсгүйн цогцос танигдахын аргагүй болсон байсан бөгөөд гэмт хэргийн хохирогч болсон гэж таамаглаж байгаа юм байна. 35 настай Г.Зулцэцэг өнгөрсөн дөрөвдүгээр сарын 11-нд алга болсон бөгөөд хамгийн сүүлд Оак Стрийт дэх гэрээсээ гарахад өрөөнийх нь хүн таарсан гэнэ. Г.Зулцэцэг тэр өдөр Иллиноисын Z259598 дугаартай саарал өнгийн Хонда Аккорд маркийн машинтай гэрээсээ гарсан бөгөөд үдийн үед Чикагод нэгэн найзтайгаа уулзсан ажээ. Цагдаагийн мэдээлснээр бүсгүй найзтайгаа уулзахаас өмнө Niles банкинд бэлэн мөнгөний картаар үйлчлүүлсэн байсан гэнэ.
Цагдаагийн мэдээллээс харахад бүсгүй тэр өдрийн үдэш Дес Плейний зэргэлдээх хот Пилсенд машинтайгаа явж байгаад камерт бичигдэж үлдсэн байжээ. Түүнийг сураггүй алга болсон талаар өрөөнийх нь хүн хоёр өдрийн дараа цагдаад мэдээлсэн юм. Дес Плейн хотын цагдаа нар тус хотод бүсгүйн таньдаг дөрвөн хүнээс мэдүүлэг авчээ. Монгол улсын иргэн Гансүхийн Зулцэцэг өнгөрсөн 2015 оны арваннэгдүгээр сард АНУ-д эмнэлгийн ажилтны сургалтын визээр очиж, Ривервуд дэх солонгос хоолны газар болон Гленвю дэх суши ресторанд ажиллаж байжээ.
Бүсгүйг маш найдвартай, сайн ажилтан байсан” гэж ажил олгогч Колин Энн гэгч мэдүүлсэн байна.