Монгол Улсын Ерөнхийлөгч Ц.Элбэгдорж өнөөдөр салбар салбартаа гавьяа байгуулж байсан зарим хүмүүст төрийн шагнал гардуулсан юм.
Ж.НУРЛАН БОДИБИЛДИНГИЙН АНХНЫ ГАВЬЯАТ ТАМИРЧИН БОЛЛОО
Ж.Нурлан Бодибилдингийн дэлхийн аварга шалгаруулах тэмцээнээс анхны алтан медалийг эх орондоо авчирч байсан билээ. Тэгвэл тэрээр өнөөдөр бодибилдингийн спортын түүхэнд анхны“Монгол Улсын гавьяат тамирчин” хэмээх эрхэм хүндтэй цол тэмдгийг хүртэж байан. Тэрээр 1990 онд Монголд анх удаа зохиогдож байсан “Сайхан залуу” тэмцээнээс спортын гараагаа эхэлж байжээ. Түүнчлэн“Монголын Мистер” хэмээх эрхэм хүндтэй цолыг хамгийн олон удаа буюу дөрвөн удаа хүртсэн юм.
Ц.ПУНСАА МУСГЗ ЦОЛ ТЭМДГЭЭР ШАГНУУЛАВ
БНМАУ-ын сансрын нисгэгч Ж.Гүррагчаа, ЗХУ-ын сансрын нисэгч В.Жанибеков нар 1981 оны гуравдугаар сарын 22-ны энэ өдөр сансарт ниссэн. Монгол хүн анх сансарт ниссэн эл түүхэн үйл явдлыг ЗХУ-ын Москва хотоос МҮОНТ шууд дамжуулан Монгол Улсад үзүүлж байв. Үйл явдлыг сурвалжлан мэдээлж, биечлэн оролцож явсан МҮОНТ-ийн сэтгүүлч, доктор Ц.Пунсаа Монгол Улсын Соёлын Гавьяат Зүтгэлтэн цол тэмдгээр энэ өдөр шагнууллаа.
Тэрбээр “Одоогоос 35 жилийн өмнө Монгол хүн анх сансарт ниссэн баярт үйл явдал болсон. Тэр баярт үйл ажиллагааг дамжуулах сурвалжлах группт оролцож Москва явж байлаа. “Монгол хүн сансарт нислээ” гэдэг тэр мэдээг диктор Нарантуяа, Орос найруулагч бид гурав нэг студиэс дамжуулж байсан юм. Тэр үеийг өнөөдөр санахад сайхан байна. Энэ бэлгэ дэмбэрэлтэй өдөр төрийн том шагнал хүртсэндээ баяртай байна. Энэ бол миний МҮОНТ-д ажилласан хөдөлмөрийг үнэлсэн хэрэг юм. Залуу боловсон хүчин бидний хувьд тэр үйл явдал шинэ туршлага, шинэ оролдлого, арга барил болж үлдсэн” хэмээв.
Монгол Улсын Ерөнхийлөгийн зарлигаар гавьяат эдийн засагчаар УИХ-ын гишүүн Ц.Баярсайхан, Аж үйлдвэрийн гавьяат ажилтнаар Д.Тогооч, гавьяат тамирчнаар Ж.Нурлан, Ж.Нарантунгалаг, Т.Батчимэг, Н.Гонгор, гавьяат багшаар Ц.Амгалан, Г.Мөнхтуяа, Д.Цэрэндорж, гавьяат барилгачнаар Ц.Баатар нарын тус тус шагналаа. Мөн Урлагийн гавьяат зүтгэлтэн шагналаар Т.Нандир, Н.Орхон, Соёлын гавьяат зүтгэлтнээр СУИС-ийн РТМУС-ийн Сэтгүүл зүйн тэнхимийн багш Доктор н.Пунсаа, Монгол улсын гавьяат нисгэгчээр Л.Лувсанчимэг нар шагнууллаа.