Монголын Э-спортын CS.GO төрлийн мэргэжлийн баг TheMongolz.CS энэ сарын 1-нд IEM Taipei тэмцээнд түрүүлж, 30 мянган ам.долларын эзэд болсон билээ. Азийн шилдгүүдийг тодруулах зорилготой энэхүү тэмцээнд TheMongolz.CS баг түрүүлснээр Польшийн Катовиц хотод болох 250 мянган ам.долларын шагналын сантай IEM Katowice, мөн “Valve Major” буюу АНУ-ын Колумбус хотод болох 250 мянган ам.долларын шагналын сантай MLG Columbus тэмцээнд дэлхийн шилдгүүдтэй өрсөлдөхөөр шалгарсан.
Тэд АНУ-д болох 250.000 ам долларын шагналын сантай тэмцээнд оролцохоор Монгол улсдаа бэлтгэлээ хийж байгаа.
Гэвч энэ сарын 26-28-ны хооронд АНУ-ын Колумбус хотноо болох “MLG Columbus” тэмцээнд манай тамирчид орж чадахгүйд хүрээд байна. Учир нь тэд Монгол дахь АНУ-ын Элчин сайдын яаманд цагаачлалын бус визэнд хоёр удаа орж, татгалзсан хариу авлаа. Тодруулбал, тэднийг эх орондоо буцаж ирэх шалтгаантай гэдгээ баталж чадаагүй гэх үндэслэлээр татгалзсан хариуг хоёр удаа өгчээ.
TheMongolZ багийн гишүүдэд одоо хоёрхон хоногийн хугацаа үлдээд байгаа бөгөөд гурав дахь удаагаа визний ярилцлагад орохын тулд цаг авахаар хүлээж байгаа. Мөн тэд “Биднийг батлан даах ямар нэгэн том компани болон төлөөлөх холбоо байсан бол ийм асуудал гарахгүй байсан байх” гэжээ.
Яг одоо цахим сүлжээнд “TheMongolz.CS“ багийнхныг дэмжиж буй залуус #AskUSAmbMN гэсэн хаштаг ашиглан “TheMongolZ багийн визийг гаргаж өгнө үү” гэх утга бүхий зүйлсийг бичиж эхэллээ.