Өвөлжилт хүндэрсэн аймгуудад туслах тусламжийн аяныг Нийслэлийн Монгол ардын намын хорооноос санаачлан оюутан залуучууд дэмжин тодорхой хөдөлгөөнүүдийг үүсгээд байна. Тухайлбал оюутан залуусын төлөөлөл Нарантуул зах дээр худалдаа эрхэлдэг иргэдийг энэ аянд нэгдэхийг уриалж, тусламжийн бараа материал цуглуулах аяныг өрнүүлжээ.
Улсын хэмжээнд 18 аймгийн 97 сум цагаан зудтай, 20 аймгийн 111 сум зудархуу байдалтай байгаа талаар холбогдох газруудаас олон нийтэд мэдээлж байгаа. Мөн малчдад туслах сайн санааны хандивын үйл ажиллагааг иргэд, аж ахуйн нэгж байгууллагын хүрээнд өрнүүлж эхэлсэн. Мөн Нийслэлийн Монгол Ардын намын хорооноос өвөлжилт хүндэрсэн аймгуудын малчдад дэмжлэг үзүүлэхээр сайн үйлсийн аяныг ч зарлаад байна.
Энэ хүрээнд аймаг сумдын Улаанбаатар хот дах нутгийн зөвлөлүүд, аж ахуйн нэгж байгууллага, иргэд, олон нийтэд хандан боломжтой зүйлээрээ туслах уриалга гаргасан юм. Энэ аяныг оюутан залуус дэмжиж, сайн дурын хүмүүнлэгийн үйл ажиллагаа өрнүүлж эхэлсэн байна.
Нийслэлийн Монгол Ардын Намын хорооноос ОБЕГ, төрийн болон төрийн бус байгууллага, олон нийтэд хандаж гаргасан уриалга иргэдийн дэмжлэгийг хүлээж байгаа юм. Өвөлжилт хүндэрсэн энэ нөхцөлд малчдад туслахыг тэд ард түмэндээ хандан уриалж байна.