Хурдтай тархаж байгаа Зика вирусийн халдварыг дэлхийн хэмжээний аюул хэмээн зарлан онцгой байдлын дэглэм тогтоож буйг Дэлхийн эрүүл мэндийн байгууллагын Ерөнхий захирал Маргарет Чен мэдэгдлээ.
Тэрбээр эл асуудалд олон улсын нэгдсэн зохицуулалт хийх шаардлагатай хэмээн мэдэгдсэн байна. Юун түрүүн энэ нь иргэдийн шилжилт хөдөлгөөн, худалдаа арилжааг хамаарч байна. Бие даасан шинжээчдийн хороо ийм зөвлөмжийг ДЭМБ-д гаргаж өгчээ. ДЭМБ-ын шийдвэр нь вирустай хийх тэмцлийг эрчимжүүлэх арга хэмжээг шуурхай эхлүүлэн энэ асуудлаар шинжлэх ухааны судалгааг явуулахад туслах ёстой.
Зика вирус нь анх 1947 онд Угандад илэрсэн ч өнөөдрийг хүртэл аюултай гэж тооцогдож байгаагүй юм. Вирус 2015 онд Африк, Азиас Өмнөд Америкт эрчимтэй тархаж эхэлсэн байна. Вирусийг гол дамжуулагч нь шумуул. Харьцангүй аюул багатай гэгдэж байсан вирусийн халдварын улмаас төрөлхийн тархи, гавлын хэмжээ бага төрж, цаашдаа өсдөггүй учраас оюуны хомсдлын микроцефали гэх өвчин үүсдэг. Өнөөдрийн байдлаар дэлхийн 21 улсад энэ вирусийн халдвар тархсан хэмээн бүртгэгдээд байна. ДЭМБ-ын дүгнэлтээр вирусээр 3-4 сая хүнд халдварлах магадлалтай гэнэ.
– ГОНДУРАС УЛС ОНЦ БАЙДАЛ ЗАРЛАЛАА –
Гондурас улс зика вирусын улмаас орон даяар онц байдал зарласан тухай “www.dailymail.co.uk” мэдээллээ. Өнгөрсөн оны арванхоёрдугаар сарын 17-ны өдөр тус улсад зика вирусын анхны тохиолдол бүртгэгдсэн байна. Тус улсын эрүүл мэндийн яам “2016 оны хоёрдугаар сарын 1-ний байдлаар 3896 хүн тус вирусын халдвар авч, эмчилгээ хийлгэж байна” гэж мэдэгджээ.
Халдвар авсан хүмүүсийн дунд жирэмсэн эмэгтэйчүүд байгаа хэдий ч албан ёсны тоог сэтгүүлчдэд хэлээгүй байна. Гондурас улсад жижигхэн толгойтой хүүхэд мэндлээгүй хэдий ч халдвар авсан жирэмсэн эмэгтэйчүүдийг ажиглаж байна гэжээ. Онц байдлын хүрээнд бүх сургууль, цэцэрлэг болон нийтийн спорт заал зэргийг хаасан байна. Засгийн газар вирус тарааж буй шумуулыг устгах ажилд 1.4 сая ам.долларыг төсөвлөжээ.
