Унгар Улсын Ерөнхий сайд Виктор Орбанын албан ёсны айлчлал өнөөдрөөс эхэлж байгаатай холбогдуулан нийслэлийн төв замуудыг хэсэгчлэн хаагаад байна. Өнөөдөр өглөөний 7.30 цагаас 11.00 цаг хүртэл Чингисийн өргөн чөлөө, Энхтайваны өргөн чөлөө, Их Монгол Улсын гудамж, Нийслэлийн гудамж зэргийг хаагаад байна. Эдгээр замуудын хөдөлгөөн 11:00 цагаас хойш хэвийн үргэлжлэх юм байна.
Энэхүү айлчлал нь Монгол Улсад хэрэгжүүлж буй Унгар Улсын Ерөнхий сайдын түвшний анхны айлчлал бөгөөд энэ сарын 26-ны өдөр хүртэл үргэлжлэх юм. Айлчлалын хүрээнд Унгар Улсын Ерөнхий сайд Виктор Орбан Монгол Улсын Ерөнхий сайд Ч.Сайханбилэгтэй ганцаарчилсан уулзалт, өргөтгөсөн хэлэлцээ хийж, Ерөнхийлөгч Ц.Элбэгдорж, Улсын Их Хурлын дарга З.Энхболд нарт тус тус бараалхана. Мөн айлчлалын хугацаанд хоёр талын бизнес форум зохион байгуулна.