Монгол Улсад 900 гаруй сүм, хийд үйл ажиллагаа явуулж байгаа тул 1993 онд батлагдсан хуулиар энэ харилцааг зохицуулах боломжгүй болоод байгаа аж. Иймд УИХ-ын Төрийн байгуулалтын байнгын хороо, нийслэлийн ИТХ Төр, сүм, хийдийн харилцааны тухай хуульд нэмэлт, өөрчлөлт оруулах төслийг боловсруулжээ.
1993 онд хууль батлагдах үед 130 гаруй сүм, хийд байжээ. Харин энэ тоо өнөөдөр 900 гаруй болтлоо өсөж, шашны асуудал яваандаа улс орны тусгаар тогтнол, эв нэгдэл, үндэсний аюулгүй байдалд сөргөөр нөлөөлж мэдэх түвшинд хүрч байна гэж үзсэн байна. Иймд сүм хийдэд зөвшөөрөл олгох, хяналт тавих, стандарт батлах, өмчлөлийн асуудлыг ч авч үзэх хэрэгтэй болсон аж. Монголд насанд хүрээгүй хүүхдүүд буддын эсвэл ислам, христ, католик, бахай зэрэг шашны байгууллага, холбоонд элсч номын дуу сонсож буй нь тулгамдсан асуудал болоод байгаа юм.