УИХ-ын гишүүн Н.Батбаяр ДМНН-ыг нэр төрд халдсан хэмээн шүүхэд өгөхөөр болжээ. Учир нь 2012 оны тавдугаар сарын 3-нд УИХ-ын чуулганы хуралдаан дээр тухайн үеийн Хууль зүйн сайд Ц.Нямдоржийг огцруулах тухай асуудлыг хэлэлцэх үед хэлсэн үгнээс таслан авч эвлүүлэг хийж ДМНН-ийн цахим хуудсаар цацжээ.
Тэр өдрийн хурал дээр Н.Батбаяр “Ц.Нямдорж гишүүн манай намын рейтинг тэртээ тэргүй унасан. Шударгаар явах юм бол манай нам ялж чадахгүй. Ганцхан бидэнд үлдэж буй арга бол сонгуулийг луйвардах. Сонгуулийг луйвардах арга нь бол сонгуулийг зохион байгуулах явцад оролцох. Тэр байгууллага нь бүртгэлийн газар. Тиймээс Бүртгэлийн газрын даргыг нь солилоо. Намдаа үнэнч хүнээ томиллоо. Зохион байгуулалтын өөрчлөлт хийлээ. Дээр нь АН-ынхны санаачилсан сонгуулийг будилаангүй болгох, 7-р сарын 1-нийг давтагдуулахгүй байх гол арга хэрэгсэл болох ухаалаг үнэмлэхийг хүчингүй болголоо, түүнийг нь лавлагаа гэсэн материалаар солилоо, гар хурууны хээ авдаг төхөөрөмж нь удахгүй ажиллахгүй болно, тэр байтугай тоолдог машин нь тоолохоо болиод, зөвхөн төрийн албан хаагчаас бүрдсэн сонгуулийн хэсгийн хороо саналыг тоолсноор манай намд санал, ялалт ирэх юм. Тийм учраас та нар надаар оролдохоо боль, би явах юм бол миний араас та нар бүгдээрээ явна, эхний ээлжинд Засгийн газрынхан бүгдээрээ явна шүү гэж хэлсэн дуулдсан” гэжээ.
Гэтэл энэ хэсгээс “Манай намын рейтинг тэртээ тэргүй унасан. Шударгаар явах юм бол манай нам ялж чадахгүй. Ганцхан бидэнд үлдэж буй арга бол сонгуулийг луйвардах” гэснийг таслан авч монтажлан, араас нь Э.Бат-Үүлийн хэлсэн үгийг оруулж, АН-ыг ингэж хэллээ, тэд ялахгүйгээ мэдээд ирэх сонгуулиар луйвар хийхээ улайм цайм зарлалаа хэмээн сошиэл сүлжээ, цахим сайт, зарим телевизээр түгээсэн байна.