Авто уралдааны “олимп” хэмээн нэрлэгддэг “Дакар Ралли-2016” уралдаан энэ сарын 2-нд эхэлжээ. Тус тэмцээн Аргентин, Болив улсын нутгийг дамжин нийт 9000 км зам туулах бөгөөд энэ удаагийн Дакар Раллид 60 гаруй улсын 360 орчим тамирчид дөрвөн төрлөөр өрсөлдөнө. Тодруулбал, мотоцикль 143, дөрвөн дугуйт 46, суудлын автомашин 110, ачааны автомашины төрөлд 55 тамирчин уралдахаар бүртгүүлжээ. Өнгөрсөн жилийн “Дакар Ралли-2015” уралдаанд манай улсаас ОУХМ Н.Лхамаа, чиглүүлэгчээр Ө.Бямбадэлгэр, Б.Сүрэндорж, Д.Жаргалсайхан, Ө.Бямбацогт, мотоциклийн ангилалд ОУХМ Д.Болдбаатар, Ч.Анар нарын тамирчид оролцсоноос Мотоциклийн төрөлд ОУХМ Дамдинхорлоогийн Болдбаатар 45-р байрт, спортын мастер Ч.Анар 78-р байрт орж байсан. Харин суудлын автомашины ангилалд уралдсан ОУХМ Н.Лхамаа, Ө.Бямбадэлгэр, Б.Сүрэндорж нарын бүрэлдэхүүнтэй баг 62 дугаар байр эзэлж амжилттай оролцож байсан бол энэ жилийн хувьд манай улсаас баг тамирчид оролцоогүй байна. “Дакар Ралли-2016” уралдааны нээлтийн үеэр суудлын автомашины төрөлд уралдаж буй Мини багийн хятад тамирчин осол гаргасны улмаас 10-аад хүн хүн бэртэж гэмтсэн хэрэг гарчээ.