Өнгөрөгч баасан гаригт “Эрдэнэс таван толгой” компанийн ҮЭ-ийн дарга С.Эрдэнэ хэвлэлийн бага хурлын үеэр өөрийгөө шатаасан нь багагүй шуугиан дэгдээсэн. Өөрийгөө шатаасан энэ хэргийн эргэн тойронд чухам юу өрнөсөн бэ гэдгийг “Өдрийн сонин” маргаашийн дугаартаа нийтэлж байна.
“Эрдэнэс Тавантолгой” компанийн ажилчид баасан гаригийн 12.00 цагаас “Зууны мэдээ” мэдээллийн төвд хэвлэлийн хурал зарласан юм. Хэвлэлийн хурал эхлэх үеэр тус компанийн Үйлдвэрчний эвлэлийн Төлөөлөн удирдах зөвлөлийн дарга С.Эрдэнэ хоёр ажилтны хамт ирсэн юм. Түүнтэй хамт явсан хоёр ажилтан нь “ТТ JVCO гэрээт компанитай байгуулсан гэрээний 18 дугаар зүйлийн 3 дахь заалтыг уурхайчид бид өөрчлөхийг шаардаж байна”,” Миний эрх ашиг Монголын эрх ашиг. Монголын эрх ашиг ард түмний эрх ашиг”, “ Боловсон хувьчлалаа зогсоо” гэсэн үгсийг А3 цаасан дээр хэвлэж барьсан харагдав. С.Эрдэнэ хэвлэлийн хурлын ширээний ард сууж “Эрдэнэс таван толгойн” компанийн удирдлагууд ажилчдыг шилжүүлэх гэрээг англи хэлээр хийсэн. Дахиад 200 гаруй ажилтнаа халах гэж байгаа. Залуучуудын өмнөөс би хариуцлага үүрнэ” гэж мэдээлэл өгснийхөө дараа ундааны саванд бэлдэж ирсэн шатахууныг өөр дээрээ асгав. Хамт явсан хүмүүс нь С.Эрдэнээс нүд салгалгүй харж байв. Ийм зүйл болно гэдгийг мэдэж байсан мэт тэд түүнийг дагуулан үйлдэл бүрийг нь харж байгаа нь илт. Энэ үеэр С.Эрдэнэ “Хэрэв би шатах ёстой юм бол шатъя” гээд асаагуур асаахад гал маналзаад явчихав … Түүнтэй хамт мэдээлэл хийсэн “Эрдэнэс Тавантолгой” ХК-ийн ажилтан С.Түмэндэлгэр, Т.Гансүх нар “С.Эрдэнээ ах бидэнд ийм зүйл болно гэж урьдчилан хэлээгүй. Мэдсэн бол юу гэж ийм байдалд хүргэх билээ. Ажилтнуудынхаа төлөө амь насаа хайхралгүй өөрийгөө галдан шатаасанд одоо ч итгэхгүй байна” гэсэн юм. Түлэнхий мэс заслын нөхөн сэргээх эмчилгээний эмч Т.Бат-Эрдэнэ “Энэ хүн манайд 13.30-14.00 цагийн хооронд хүргэгдэж ирсэн. Тухайн үйл явдал 12:30 цагийн үед болсон юм билээ. С.Эрдэнэ 30-40 хувийн түлэгдэлтэй ирсэн. Дөрвөн мөч, биеийн ихэнх хэсэг нь түлэгдсэн байна. Түлэгдэлт амьсгалын замд нөлөөлсөн тул биеийн байдал хүнд, дэмийрлийн байдалтай байгаа. Мөн гал залгиснаас амьсгалын дээд зам, залгиур хоолой түлэгдсэн, хооллоход хүндрэлтэй байна” гэжээ.
Энэхүү нийтлэлд түүнтэй хамт хэвлэлийн бага хуралд оролцсон “Эрдэнэс Тавантолгой” ХК-ийн ажилтан С.Түмэндэлгэр, Т.Гансүх, Түлэнхий мэс заслын нөхөн сэргээх эмчилгээний эмч Т.Бат-Эрдэнэ, С.Эрдэнийн гэргий Ш.Хишигт, “Эрдэнэс тавантолгой” ХК-ийн гадаад харилцаа, орон нутаг, олон нийттэй харилцах хэлтсийн дарга Т.Гэрэлтсансар, Уул уурхайн сайд Р.Жигжид, МСНЭ-ийн Ерөнхийлөгч Б.Галаарид зэрэг олон эх сурвалжийн мэдээлэл, байр суурь багтсан юм.
Та манай сониныг худалдан авахыг хүсвэл Монгол шуудан, Түгээмэл шуудан, Улаанбаатар шуудангийн салбар болон сонин худалдаалах цэгээс аваарай. Мөн 99112954 дугаарт холбогдон захиалгаа өгч болно.