Хүн төрөлхтний олон жилийн турш үүсгэсэн сансрын хог хаягдал бөөгнөрөн хуримтлагдаж эргээд дэлхий унах аюултай талаар сансар судлаачид хэлдэг. Тэгвэл энэ арваннэгдүгээр сарын 13-нд Шри Ланка арлын өмнөд эрэг орчим “WT1190F” гэж нэрлэсэн хогны бөөгнөрөл дэлхий дээр унахаар айсуу талаар өмнө цахим мэдээллийн хэрэгслүүдээр цацагдаж байсан. Тэгвэл энэхүү мэдээлэл баттай болсон байна. Тодруулбал, маргааш буюу арваннэгдүгээр сарын 13-ны 14.19 цагт “WT1190F” сансрын хог Энэтхэгийн далай орчим унана гэдгийг эрдэмтэд тодруулжээ. Эл биетийг судлаачид Аполло хөлгийн үлдэгдэл байж болзошгүй таамагласан байна. Энэхүү хаягдал нь Энэтхэгийн далайд, Шри Ланкагийн өмнөд эргээд 100 орчим километрийн зайд далайд унах тул ямар нэг осол эндэгдэл гарахгүй аж.
Энэ нь хүний үүсгэсэн сансрын хаягдал дэлхий дээр эргэн унаж байгаа анхны тохиолдол юм. Үүнийг эрдэмтдэд хэрвээ манай дэлхий дээр гадны нэг биет сансраас унавал агаар мандалд ямар үзэгдэл ажиглагдах, хэрхэн замыг нь урьдчилан тооцоолох зэргийг судлах том боломж гэж үзэж байгаа гэнэ.
Хоёр метр гаруй диаметр голчтой энэ биетийг чухам хаанаас гаралтай болохыг хэн ч мэдэхгүй байгаа. Гэхдээ эрдэмтэд 1960,70-аад оны үеийн NASA-гийн Аполло аялалын үеийн хаягдал пуужингийн хэсэг байх гэж таамаглаж байна.
NASA-гийн мэдээлснээр энэ бол АНУ-ын Сансрын Хяналтын Сүлжээний ажиглалтанд байгаа 10 см-ээс урттай 20 гаруй сансрын хаягдлын нэг гэнэ.
Тэдгээрийн 1,000 орчмыг пуужингийн үлдэгдэл гэдэг бол үлдсэнийг нь “тойрог замын хэлтэрхийнүүд” гэдэг аж.
Харин 10 см-ээс бага хэмжээтэй хаягдлуудын тоо хэдэн арван саяар тоологддог гэнэ.