Монголын залуучуудын холбооны ерөнхийлөгч Аюушийн Мөнхбат бол уг нь энэ улсын мэдээлэл технологийн салбарыг өнөөдөр удирдан зохион байгуулж, төрд хүчээ өгч явах ёстой хүн. Аль эрт 2004 онд мэдээлэл технологийн салбарын төрийн бүтцийг анх бий болгож өнөөдрийн Ерөнхий сайд Ч.Сайханбилэгтэй хамтран удирдаж байсан юм. Тэгсэн юу болсон юм мэдэхгүй, гэнэт л 2012 онд төрийн ажлаа өгөхөө мэдэгдэж залуучуудын ТББ удирдаж эхэлсэн. З.Энхболд, Н.Алтанхуяг… бүгдтэй нь ойр, Ч.Сайханбилэг, С.Баярцогт хоёртой анд нөхөд хүн шүү дээ. Энэ өнцгөөс нь хардаг хүмүүс түүнийг төрийн нэг өндөр алба заавал хаших ёстой залуу гэж үздэг. Гэтэл тэдний үүдээр хавьтсан ч үгүй, өөрийнхөөрөө явчихлаа.
А.Мөнхбат Залуучуудын холбоог авангуутаа Паркийн газрыг хүүхэд залууст эргүүлж өг хэмээн бизнесийн томчуултай дайсагналцав, нийслэлээс дугуйн зам нэхэж хотын томчуудын уурыг барав. Залуус авлигын эсрэг аян өрнүүлж дарга нарын дургүйг ихэд хүргэлээ. Эдгээр нь бүгдээрээ хана мөргөсөн юм байлгүй Хар-Цагаан жагсаалт зарлаж, хөдөлгөөн өрнүүлээд эхэллээ.
“Хар-Цагаан жагсаалт” гэсэн үг өдөр ирэх бүр нийгэмд газар авч байгаа нь мэдрэгдэж байна. Энэ эрчээрээ бол магадгүй ирэх 2016 оны бүх шатны сонгууль энэхүү жагсаалтын эргэн тойронд болж магадгүй нь. Тогтож анзаарсан хүнд бол энэхүү Хар-Цагаан жагсаалтын гол философи нь “хар”-уудыг зарлан таниулж төрд ойртуулахгүй байх нь чухал бус харин цагаануудаа нийгэмд таниулж, өнөөх хар нөхдүүдэд уусгуулчихгүй цааш нь авч явахад оршиж байх шиг байна.
Б.НЯМАА