Л.Гансүх нарт холбогдох хэргийг шүүх хурал дөнгөж сая шийдвэрээ танилцууллаа. Баянзүрх, Чингэлтэй, Сүхбаатар дүүргийн шүүхийн даргалагч шүүгч Х.Идэр шүүхийн шийдвэрийг танилцуулсан юм.
Шүүх бүрэлдэхүүн хэргийг хянан хэлэлцээд, гагцхүү шүүхэд хүргэгдэн ирсэн нотлох баримтад түшиглэн дараах шийдвэрийг гаргасан байна. Тодруулбал, Л.Гансүхийг бусадтай бүлэглэн, урьдчилан үгсэн тохиролцож, албан тушаалын байдлаа урвуулан ашиглаж, улсад онц их хэмжээний хохирол учруулсан хэрэгт гэм буруутай гэж үзлээ. Ингэснээр Л.Гансүхийг төрийн тодорхой албан тушаал эрхлэх үйл ажиллагааг 4 жилээр хасч, жирийн дэглэмтэй хорих ангид 4.6 жил ял эдлүүлэх шийдвэр гаргалаа. Харин “ЭмЖиЭлЭсБи” компанийн Ерөнхий захирал Э.Даваахүү, ерөнхий нягтлан Б.Мөнгөнтуяа нарт тус тус тодорхой албан тушаал эрхлэх үйл ажиллагааг хоёр жилээр хасч, хөдөлмөрийн хөлсний доод хэмжээг 100 дахин нэмэгдүүлсэнтэй тэнцэх мөнгөн торгууль ногдлуулахаар шийдвэрлэж байна. Ингэснээр Э.Даваахүү, Б.Мөнгөнтуяа нарт тус бүр 19 сая 200 мянган төгрөгийн торгууль ногдуулж, цагдан хоригдсон хугацааг өдрөөр тооцож, торгох ялаас хасахаар шийдвэрлэснийг шүүгч танилцууллаа. Мөн Э.Даваахүүг торгох ялаас зайлсхийвэл хорих ял болгож өөрчилнө гэдгийг анхааруулсан юм.
Түүнчлэн шүүхийн шийдвэрээр Л.Гансүх нараас 2 тэрбум гаруй төгрөгийг гаргуулж, “Багануур” ХК-д нөхөн төлүүлэхээр боллоо.