“Өдрийн сонин”-ы лхагва гаригийн дугаар хэвлэгдлээ. Энэ өдрийн дугаарт нэрт нийтлэлч Баабарын “Уламжлалт уул уурхайн мөхөл” нийтлэл хэвлэгдлээ. Тэрээр шинэ техник, технологийн хөгжлийн дүнд уламжлалт уул уурхай улам бүр хумигдаж байгаль орчинд аль болох ээлтэй технологийг ашиглаж эхэлсэн талаар өгүүлсэн юм. Энэ талаар сонирхолтой бичсэнийг гуравдугаар нүүрээс уншаарай. Мөн Өршөөлийн хуулийг өчигдөр баталсан. Уг хуультай холбоотой мэдээлэл манай сонины нэгдүгээр нүүрт хэвлэгдлээ. Хаалттай хэлэлцсэн тус хуулийн дүнд 3000 орчим хоригдол чөлөөлөгдөж, хүнд болон онц хүнд гэмт хэрэг хийсэн этгээдийн ял хоёр жилээр хөнгөрч байгаа талаар эх сурвалж мэдээлсэн байна.
Чанаргүй зээл сар бүр нэмэгдэж байгаа нь статистикийн мэдээнээс тодхон харагддаг. Үүнийг хөндсөн “Иргэд зээлээ төлж чадахгүй байгаагаас ломбардныхан машины ченж болжээ” сурвалжлагыг нэг болон долдугаар нүүрээс сонирхоорой.
Мөн УИХ-ын гишүүн Я.Санжмятав, Хүнс хөдөө аж ахуйн сайд Р.Бурмаа нарын сонирхолтой ярилцлага энэ дугаарт багтсан юм. Р.Бурмаа “Өвөлжилт хүндэрч болзошгүй сургаар хувийнхаа эрх ашгийг шийдүүлэх гэж хууль бусаар дарамт үзүүлж буй явдалд автахгүй” хэмээн байр сууриа илэрхийлсэн байна.
Өчигдөр Хавайн их сургуулийн профессор эдийн засагч, улстөрч Кен Скуленд лекц тавьсан. Түүний лекцийг “Цагаачид АНУ-ын өмчийн эрх рүү тэмүүлдэг” гарчигын дор тоймлон хүргэснийг 11 дүгээр нүүрээс амтархан уншаарай. Энэ мэтчилэн уламжлалт сонирхолтой материалууд бүхий нүүрнүүд хэвлэгдээд байна. Шинэ технологийн талаар бичсэн 15 дугаар нүүрээс ганд тэсвэртэй буудай монгол эрдэмтэд гаргаж авсныг мэдэх боломжтой бол 12 дугаар нүүрт удахгүй “Хэмнэл нэрэгч” тоглолтоо хийх гэж буй “Люмино” хамтлагийн ахлагч Д.Тэмүүжинтэй хийсэн сонирхолтой ярилцлага нийтлэгдээд байна.
Өдрийн сонин өглөө бүр тантай хамт