Монголын даамын холбооны 2015 оны өсвөр үеийн улсын аварга шалгаруулах тэмцээн өнөөдөр Сонгинохайрхан дүүргийн 42-р сургууль дээр эхэллээ. “Гацуурт” компанийн нэрэмжит тус тэмцээн энэ жил Монгол хүүхдийн спортын V наадмын хүрээнд зохион байгуулагдаж байгаагаар ихээхэн онцлог болж байна. Тэмцээнд Улаанбаатар хотын дүүргүүд болон орон нутгаас нийт 360 орчим өсвөрийн даамчид оролцохоор бүртгүүлсэн байна. Тэмцээн хөвгүүд, охид тус бүр долоо, 10, 13, 16 гэсэн дөрвөн насны ангилалд болох юм.
Тэмцээний нээлтийн ажиллагаа өнөөдөр 14.00 цагаас болох бөгөөд аваргууд ирэх бямба гаригт буюу энэ сарын 7-ны өдөр тодорно.
2015 оны улсын аваргын медальтнууд ирэх дөрөвдүгээр сард Узбекстаны нийслэл Ташкентэд болох Азийн АШТ, арваннэгдүгээр сард Нидерландын Хикен хотод болох ДАШТ-д оролцох эрхийг авах юм.
Дашрамд дуулгахад, 2013 өсвөрийн дэлхийн аварга шалгаруулах тэмцээний 8-10 насанд Г.Дүүрэнбилэг мөнгөн медаль хүртэж, эх орондоо анхны медалийг авчирч байсан юм. Тэгвэл өнгөрсөн онд энэ насанд Б.Мөнхжин мөн мөнгөн медаль хүртэж, өсвөрийн дэлхийн аваргаас медаль хүртсэн хоёр дахь тамирчин болсон. Харин дэлхийн аваргын том нас буюу 17 насанд Монголоос гурван медальтан төрөөд байна.