Мэргэжлийн сүмогийн хаврын тэмцээн болох Харү башё энэ сарын 8-23-нд Осака хотноо болно. Бөхчүүдийн зүүний манлайг уламжлал ёсоор их аварга Хакүхо М.Даваажаргал, ёкозүна Харүмафүжи Д.Бямбадорж баруун жигүүрийг манлайлж байна.
Хакүхо уучлал гуйсангүй
Оны анхны башёд түрүүлж, 33 дахь түрүүгээ хүртсэн Хакүхо сүмо бөхийн түүхэнд дэх бүх цаг үеийн хамгийн олон түрүү хүртсэн бөхөөр тодроод байгаа. Тэрээр энэхүү башёд хамгийн их анхаарал татаж байгаа юм. Нэгдүгээр сарын башё өндөрлөсний дараа 13 өдрийн барилдаанд озэки Кисэносатотой хийсэн барилдааны талаар шүүгч нарыг шүүмжилсэн нь япончуудын анхаарлыг гойд татаж, энэ талаар одоо ч яригдсаар байгаа юм. Хакүхо сар шинийн өмнө Монголдоо ирж, Ерөнхийлөгчөөс Хөдөлмөрийн баатар цол гардан авч битүүний өдөр бөхийн барилдаан үзээд Япон руу буцсан. Ёкозүнагийн хувиар Хакүхо мэргэжлийн сүмогийн ажлын графикийн дагуу албан ёсны уулзалт, ажилд оролцож эхэлсэн. Харин тэрээр шүүгчдийн талаар хэлсэн үгнийхээ талаар өнгөрсөн долоо хоногт анх удаа хэвлэлд тайлбар өгсөн бөгөөд “Тэр бол тухайн үед миний толгойд орж ирсэн бодол” гэсэн юм. Энэ нь япончуудын хүсч байсан шиг ямар нэгэн уучлалт байсангүй. Хэвлэлийнхээ түүнээс өдгөө ч өө сэв хайсаар байгаа юм.
Тэрүнофүжи Г.Ган-Эрдэнэ сэкивакэ цолтой барилдана
Энэ башёд “Исэгахама” дэвжээний сүмоч Тэрүнофүжи Г.Ган-Эрдэнэ сэкивакэ цолтой барилдах юм. Тэрүнофүжи энэ оны нэгдүгээр сарын барилдаан буюу Хацу башёд онцгой сайн барилдсан тул Канто-шо буюу дайчин барилдааны шагнал хүртсэн юм. Энэ жил 23 настай тэрээр Монголоос төрсөн найм дахь, гадаадын 16 дахь сэкивакэ болж байна. Мөн мэргэжлийн сүмод ороод 23 башёо барилдаад сэкивакэ болж байгаа нь сүмогийн түүхэнд есдүгээрт бичигдэж байна.
Өнгөрсөн тэмцээнд сэкивакэ цолтой барилдсан Ичиножёо А.Ичинноров зургаан даваа, есөн унаатайгаар башёг өндөрлүүлсэн. Харин тэрээр хаврын тэмцээнд маэгаширагийн барууны нэгээс босч барилдах юм. Энэ тэмцээнд Монголын 25 сүмоч зодоглох бөгөөд үүний арав нь макүүчид, тав нь жюүрёод, зургаа нь макүшитад, дөрөв нь санданмэ зиндаанд зодоглох ажээ.
Хаврын тэмцээнд зодоглох монгол сүмочдын банцүкэг толилуулж байна.
Макүүчи зиндаа
- Ёкозүна Хакүхо М.Даваажаргал
- Ёкозүна Хаүмафүжи Д.Бямбадорж
- Ёкозүна Какүрюү М.Ананд
- Сэкивакэ Тэрүнофүжи Г.Ган-Эрдэнэ
- Комүсүби Тамаваши Б.Мөнх-Оргил
- Маэгашира 1 Ичиножёо А.Ичинноров
- Маэгашира 8 Токитэнкү А.Хүчитбаатар
- Маэгашира 10 Кёкүшюхо Т.Эрдэнэбаатар
- Маэгашира 11 Кёкүтэнхо Н.Цэвэгням
- Маэгашира 14 Араваши Э.Дөлгөөн
Жюүрёо зиндаа
- Зүүн 1 Кагамио Б.Нанжид
- Зүүн 4 Сэйро А.Өнөболд
- Баруун 5 Асасэкирюү Б.Дашням
- Баруун 6 Таканоива А.Баасандорж
- Баруун 9 Шёотэнро Д.Нямсүрэн
Макүшита зиндаа
- Зүүн 1 Азүмарюү С.Тодбилэг
- Баруун 4 Сакигакэ Я.Баттүшиг
- Баруун 7 Гочозан Д.Ууганбаатар
- Баруун 10 Дайшохо Ч.Шижирбаяр
- Зүүн 25 Рюүонами У.Баттөгс
- Баруун 30 Чиёшома Г.Мөнхсайхан
Санданмэ зиндаа
- Баруун 9 Такакасүга Э.Энхманлай
- Баруун 33 Дайонами Б.Ууганбаяр
- Зүүн 74 Садахикари Д.Наранцогт
- Баруун 88 Аратоши Ц.Ванчигцэрэн