Азербейжан улсын Баку хотноо жүдогийн аварга шалгаруулах “Их дуулга” гран при тэмцээн өчигдөр эхэлсэн. Энэхүү тэмцээнд манай улсын эрэгтэй тав, эмэгтэй хоёр бөх зодоглож байгаа билээ. Эмэгтэйчүүдийн 48 кг-ын жинд хүч үзсэн МУГТ, Дэлхийн аварга М.Уранцэцэг түрүүлж, Бакугийн “Их дуулга”-ын аварга боллоо.
Харин эмэгтэйчүүдийн 57 кг-д зодоглосон А.Цолмон өрсөлдөгчдөө цэвэр ялагдаж тэмцээнээ дуусгасан бол эрэгтэйчүүдийн 60 кг-д барилдсан Г.Хэрлэн хэсгийн аваргын төлөөх болон дагах барилдаанд мөн ялагдснаар тэмцээнээ дуусгасан.
Өнөөдөр хүнд жингийн бөхчүүд барилдах ба эрэгтэйчүүдийн 73 кг-д МУГТ Х.Цагаанбаатар, 100 кг-ийн ангилалд МУГТ Н.Түвшинбаяр нар барилдана. Энэхүү тэмцээнд 41 орны эрэгтэй, эмэгтэй 247 бөх зодоглож, хурд, хүч, авхаалж самбаагаа сорьж байгаа юм.
Д.Сүрэн