Энэ сарын 26-ны өдөр Улаанбаатар хотын Замын цагдаагийн газрын Жижүүрийн шуурхай удирдлагын хэлтэст нийт 316 дуудлага, мэдээ мэдээлэл хүлээн авчээ.
Эдгээрээс зам тээврийн ослын 248 дуудлага бүртгэгдсэн байна. Үүнээс гэмт хэргийн шинжтэй гомдол мэдээлэл 10 бүртгэгдэж, нэг хүний амь нас хохирч, 11 хүн хүнд, хөнгөн гэмтжээ.
Тодруулбал, Сүхбаатар дүүргийн нутаг Чагдаржавын гудамж, “Edelweiss” зочид буудлын урд замд H.Grace маркийн авто машины жолооч явган зорчигч 57 настай эмэгтэйг мөргөж, амь насыг нь хохироосон хэрэг гарчээ. Мөн Сонгинохайрхан дүүргийн нутаг Энхтайваны өргөн чөлөө, Хархорин захын хойд замд Тэнүүн огоо ХХк-ны H.Aero city маркийн автобусны жолооч зорчигч 42 настай эмэгтэйг мөргөж гэмтээсэн байна. Харин хөдөө орон нутагт Ховд аймгийн Буянт сумын нутаг Цагаан бургас багийн Хар цохио гэх газар шороон замд N.Carina маркийн авто машины жолооч явган зорчигч 42 настай эрэгтэйг мөргөж амь насыг нь хохироожээ.
Мөн согтууруулах ундааны зүйл хэрэглэсэн үедээ зам тээврийн осолд холбогдсон жолооч нэг, явган зорчигч нэг бүртгэгджээ. Харин зам тээврийн осолд сургуулийн насны гурван хүүхэд өртсөн бол согтуугаар тээврийн хэрэгсэл жолоодсон 51 жолоочийг илрүүлсэн байна.