Хэрвээ дорвитой арга хэмжээ авахгүй бол 2035 он гэхэд дэлхийн хүн амын талаас дээш хэсэг нь илүүдэл жинтэй буюу таргалалттай болохоор байгааг WOF (World Obesity Federation) байгууллагын өчигдөр нийтэлсэн судалгааны шинэ тайланд анхааруулжээ.
Тухайлбал дөрвөн тэрбум гаруй хүн энэ ангилалд орох бөгөөд хамгийн хурдтай хамрагдах хэсэг нь хүүхдүүд байх тооцоо гарсан байна.
Бүс нутгаар нь авч үзвэл Африк, Азийн дундаас доош орлоготой улс орнуудын хүн амын дунд таргалалт хамгийн их нэмэгдэх гэнэ.
Таргалалттай холбоотой жил бүр эдийн засагт учрах хохирлын хэмжээ 2035 онд $4 их наядыг давна гэж WOF-ын тайланд өгүүлжээ.
Хүүхдүүд, өсвөр насныхны дунд таргалалт 2020 оны түвшнээс хоёр дахин хурдтай өсөх тооцоо гарсан байна. Дэлхий даяар таргалалт нэмэгдэх гол шалтгаануудад боловсруулсан бэлэн хүнсний хэт хэрэглээ, хөдөлгөөн багатай амьдралын хэв маяг, эрүүл мэндийн муу боловсрол мэдлэг зэргийг дурджээ.
Шинэ тайланг даваа гаригт НҮБ-д танилцуулах юм байна.