Month: September 2024

Усан замын тээврийн тухай хуульд заасан бүрэн эрхийн хүрээнд баталсан Архангай аймгийн Засаг даргын 2024 оны зургаадугаар сарын 12-ны өдрийн А/444 дүгээр захирамжаар аймгийн хэмжээнд гол, мөрөн, нууруудад усан зам тээврийн хэрэгслээр зорчигч тээвэрлэх хөвөлтийн дуусах хугацааг 2024 оны есдүгээр сарын 20-ны өдөр байхаар тогтоосон.

Иймээс дээрх шийдвэрийн дагуу аж ахуйн нэгж, иргэд та бүхнийг болзошгүй осол, эрсдэлээс урьдчилан сэргийлэх, аюулгүй байдлыг хангах зорилгоор усан замын тээврийн үйлчилгээг бүрэн зогсоож, цаашид гол, мөрөн, нуурт ашиглах, зорчигч тээвэрлэлтийн үйл ажиллагаа явуулахгүй байхыг Монгол Улсын Далайн захиргаанаас анхааруулж байна.

Цахим орчинд “НӨАТ зарна, шивнэ” гэх зар тавьсан иргэн Д.Б, Х.А, Г.Б нарт холбогдох хэргийг Баянгол дүүргийн эрүүгийн хэргийн анхан шатны шүүхэд шилжүүлжээ.

Тэднийг 25.9 тэрбум төгрөгийн 1119 ширхэг санхүүгийн анхан шатны баримтыг хуурамчаар үйлдэн 216 аж ахуйн нэгж, иргэнд худалдаж, 2.5 тэрбум төгрөгийн татвар төлөхөөс зайлсхийх боломжийг олгосон гэх хэрэгт буруутган Эрүүгийн хуулийн 18.3 дугаар зүйлийн 1/Татвар төлөхөөс зайлсхийх/-д зааснаар яллах дүгнэлт үйлдсэн байна.

Иргэд, олон нийтийг гэмт хэрэг, зөрчилд өртөхөөс урьдчилан сэргийлэх зорилготой 102 police аппликейшн ажиллаж эхэлжээ.

Тус аппликейшныг гар утсандаа татаж авснаар дуудлага, мэдээллийг зурвас хэлбэрээр өгөх боломжтой аж.

Мөн замын хөдөлгөөний ачаалал, дугаарын хязгаарлалтын бүстэй холбоотой мэдээллийг авах боломжтой. Замын хар цэгийн мэдээлэл буюу осол хамгийн их гардаг замын мэдээллийг ч багтаажээ. Улмаар эрсдэлтэй буюу осол их гардаг бүс дээр очсон тохиолдолд иргэдийн утсанд мэдэгдэл ирэх юм. Цагдаагийн байгууллагын байршил, холбоо барих дугаарыг ч мөн багтаажээ.

Энэ сарын 22-ны өдөр 18 цагийн орчимд Төв аймгийн Мөнгөнморьт сумын Жаргалант багийн “Дагналтай” гэх газарт самар түүхээр явсан иргэн алга болжээ.

Төв аймгийн харьяат иргэн Н дөрвөн хүний хамтаар самар түүхээр яваад одоо болтол сураггүй байгаа талаар албаныхан мэдээллээ. Одоогийн байдлаар цагдаагийн албан хаагчид, онцгой байдлынхан болон ар гэрийнхэн нь орон нутгийн хүмүүстэй хамтран эрэн хайх ажлыг мориор болон явганаар эхлүүлээд байна.

Циркийн уулзвараас Барс захын уулзвар хүртэлх урд хэсгийн авто замыг 9 дүгээр сарын 25-ны өдрийн 22:00 цагаас 26-ны өдрийн 22:00 цагийн хооронд хэсэгчлэн хааж, шинэчилнэ. Харин хойд хэсгийн замыг 9 дүгээр сарын 26-ны өдрийн 22:00 цагаас 28-ны өдрийн 06:00 цагийн хооронд хэсэгчлэн хааж, шинэчилнэ.

Иймд иргэд, жолооч та бүхэн бусад замыг сонгон хөдөлгөөнд оролцоно уу.

Баянзүрх дүүргийн 16, 22 дугаар хороо, Дандарбаатарын гудамжны авто зам буюу Офицеруудын ордны тойргоос “Цайз” захын уулзвар хүртэлх замыг есдүгээр сарын 25-ны 23:00 цагт хааж, 29-ний 06:00 цагт нээнэ.

Зам засварын ажлын хүрээнд инженерийн шугам сүлжээний худгийн тагийг асфальт бетон хучилтын түвшинд тааруулах, хашлага солих, тэмдэг тэмдэглэгээ хийх зэрэг ажлыг гүйцэтгэнэ. Иймд иргэд, жолооч та бүхэн бусад замыг сонгон хөдөлгөөнд оролцоно уу.