Цагдаагийн байгууллагын 102 тусгай дугаарт 2024 оны 05 дугаар сарын 23-ны өдөр нийт 2036 дуудлага, мэдээлэл бүртгэгдсэнээс зөрчлийн шинжтэй 1742, гэмт хэргийн шинжтэй 66 дуудлага, мэдээлэл байна.
Мөн гэмт хэргийн шинжтэй 47 үйлдлийг шуурхай илрүүлж, урьд өмнө бүртгэгдсэн 3 хэргийг нөхөн илрүүллээ.
Сонгинохайрхан дүүргийн 22 дугаар хороо, Цэргийн хотхоноос Хилчин холбоочдын гудамжны уулзвар хүртэлх авто замыг 2024 оны тавдугаар сарын 24-ний 23:00 цагаас 2024 оны тавдугаар сарын 27-ны өдрийн 07:00 цагийн хооронд хааж, авто замын хэсэгчилсэн засвар, шинэчлэлтийн ажлыг хийж гүйцэтгэнэ.
Хучилтын бүтээцийн хөлдөлтөөс хамгаалах үе, буталсан чулуун суурийн ажил, хөвөөний дүүргэлт, зорчих хэсгийн тэгшилгээний үе болон асфальтбетон хучилтын ажил хийж гүйцэтгэх юм байна.
Иймд иргэд, жолооч та бүхэн бусад замыг сонгон хөдөлгөөнд оролцоно уу гэж Нийслэлийн Замын хөгжлийн газраас мэдээллээ.
Улаанбаатарт өчигдөр 23 цагаас эхэлж орсон бороо өнөөдөр үд хүртэл, маргааш үргэлжлэн орно.
Зарим газруудад үерлэх нөхцөл байдал үүсч болзошгүй тул иргэд, айл өрх, аж ахуйн нэгж байгууллага хамгаалалтын далан сувгийг цэвэрлэх, гэр сууц, зоорийн давхрын хамгаалалтыг бэхжүүлж аюулгүй байдлаа хангаж ажиллахыг анхааруулж байна.
2024 оны 6-р сарын 5-8-ны өдрүүдэд ОХУ-ын Петербург хотноо олон улсын эдийн засгийн 27 дахь чуулга уулзалт болно. Монгол Улсын хувьд тус чуулга уулзалт нь ОХУ-тай, тухайлбал эрчим хүчний салбарт хамтран ажиллах бас нэгэн боломж юм.
Монгол Улс нь уламжлал ёсоор Петербургийн олон улсын эдийн засгийн чуулга уулзалтад оролцдог бөгөөд хоёр орны харилцаа найрсаг, харилцан стратегийн ач холбогдолтой байдаг. Өнгөрсөн жил чуулга уулзалтын үеэр талууд хоёр орны эрчим хүчний салбарын хамтын ажиллагааг өргөжүүлэн, хөгжүүлэх өргөн хүрээний асуудлаар санал солилцсон юм. Энэ жил ч мөн уг асуудлыг хэлэлцэх нь дамжиггүй.
ОХУ-ын Ерөнхийлөгчийн зөвлөх, чуулганы зохион байгуулах хорооны хариуцлагатай нарийн бичгийн дарга Антон Кобяков хэлэхдээ: “Петербургийн олон улсын эдийн засгийн чуулга уулзалт бол олон улсын хөгжлийн асуудлыг хэлэлцэх тэргүүлэгч талбар юм. Петербургийн олон улсын эдийн засгийн чуулга уулзалтын платформ нь харилцан ойлголцол, хамтын ажиллагааны гүүр болгон ашиглахад бэлэн байгааг өнгөрсөн жилийн чуулга уулзалт бэлхэнээ харуулсан.
Монгол Улсын хувьд эрчим хүчний шинэ эх үүсвэр хайж олох нь олон жилийн турш тулгамдсан сэдэв байсаар ирсэн. ЗХУ-ын үед баригдсан Монголын дулааны цахилгаан станцуудыг шинэчлэхэд ОХУ тусламж үзүүлж байгаа ч Монгол Улсад эрчим хүчний шинэ эх үүсвэр хэрэгтэй байна. Цөмийн эрчим хүч нь шинэ эх үүсвэр болох боломжтой.
2023 оны аравдугаар сард ОХУ-ын шадар сайд Виктория Абрамченко Улаанбаатарт айлчилж, Монголд бага хүчин чадлын атомын цахилгаан станц барих боломжийн тухай ярьж, хамгийн гол нь Монгол Улс өөрийн гэсэн ураны түүхий эдийн нөөцтэй тухай тэгээр сэтгүүлчдэд ярилаа.
2023 оны сүүлчээр Дубайд болсон Уур амьсгалын өөрчлөлтийн НҮБ-ын суурь конвенцид нэгдсэн талуудын бага хурлын үеэр ОХУ бага хүчин чадлын атомын цахилгаан станц барих төслийн концепцийг монголын талд хүлээлгэн өгч, үүний дараа хоёр улс хамтын ажиллагааны санамж бичиг байгуулсан. Хамтын ажиллагааны санамж бичгийн хүрээнд талууд Монгол Улсад бага хүчин чадалтай атомын цахилгаан станц барих боломжийг судлахаар болсон юм.
Энэ төслийг хэрэгжүүлэх нөхцөл одоогоор тодорхойгүй байна. Энэ тухай талууд Петербургийн олон улсын эдийн засгийн чуулга уулзалтын үеэр хэлэлцэх төлөвлөгөөтэй байгаа юм.
Бага хүчин чадалтай атомын станц нь барихад маш энгийн станцын нэг билээ. Авчирна, суурилуулна, ажиллуулна гэдэг зарчимтай. Энэ төслийг “Росатом” хэрэгжүүлэхэд бэлэн. “Росатом” бол цөмийн эрчим хүчний салбарт дэлхийд тэргүүлэгчдийн нэг бөгөөд өнөөдөр гадаадын улс орнуудад барьсан эрчим хүчний блокуудын тоогоор дэлхийд 1-р байрт бичидсэн хэвээр байна.
“Автомашингүй өдөр”-өөр буюу маргааш томоохон зах, худалдааны төвүүдийн амарна.
Зам хаасан бүс буюу Чингэлтэй, Баянгол, Баянзүрх, Сүхбаатар дүүргийн томоохон зах, худалдааны төвүүд болох “Бөмбөгөр-1”, “Бөмбөгөр-2”, “Содон”, “Алтжин бөмбөгөр”, “Хүчит шонхор”, “Нарлаг дэнж”, “Нарантуул”, “Нарантуул-2”, “Ханталст”, “Баянзүрх”, “Шөнийн зах”, “Да хүрээ”,“Цайз”, “Дүнжингарав”, “Өгөөмөр”, “Сандэй плаза”, “Барс-1” “Барс-2”, “Хархорин”, “Шинэ сандэй” худалдааны төв”,“100 айл” барилгын материалын дэлгүүр зэрэг 20 гаруй худалдааны төв амарна.
Энэ бямба гариг буюу тавдугаар сарын 25-нд Автомашингүй өдөр, мөн “Улаанбаатар марафон-2024” олон улсын гүйлтийн тэмцээн болно.
Үүнтэй холбоотойгоор Нийслэлийн Засаг даргын захирамж гарсан бөгөөд 06:00-18:00 цагийн хооронд зарим замын хөдөлгөөнийг хязгаарлах юм. “Улаанбаатар марафон 2024” олон улсын гүйлтийн хөтөлбөрийг танилцуулж байна.
Хувьтай хүн хур борооноор гэдэг дээ. Зуны эхэн сар гарлаа гэсэн шиг зүсэр бороо орсоор л. Нэг тийм тайван, намуухан, дулаахан мэдрэмжийг авсаар л. Тийм болохоор энэ бороог зогсоомооргүй санагдана.
Өнөөдөр ч ороосой, маргааш ч ороосой. Уйдтал ороосой. Бороо орох тусам бодол дахь бүлээн дурсамж сэргэх шиг. Задгайн энгэрт зусдаг байсан хөгшин аавынх маань санагдана. Задгайн хөндийгөөр өгсөх мотоциклийн чимээ намуухнаас тодрон тодорсоор чихэнд наалдаж, зүрхэнд баяр төрүүлнэ. Сумын төвөөс нагац ах маань өвөр дүүрэн чихэртэй ирсэн дээ хэмээн тэрүүхэн зуур горьдоно.
Гэтэл чихэнд наалдсан мотоциклийн тэр чимээ манайд биш Задгайн арыг ташлаад Үхэр чулуут өгссөөр алсарна. Бараа нь тасрах тэр мотоциклийн хаазлахтай зэрэгцэн олгойтох цэнхэр утаа зүсэр бороонд идшээ ханан хэвтэх хөх сарлагийн уур савссан амьсгалтай холилдон хөндийд хоцорно.
Энэ хөндийд замаа дагаад сууж хоцорсон цэнхэр утаа чихэр горьдсон миний сэтгэл шиг л замхран үлдлээ дээ хэмээн санаа алдан бодлогоширно. Хүүхдийн санаа нүдэнд нь тодорч харагдсан уу, зүрхэнд нь уясаж мэдрэгдсэн үү хөгшин ээж минь авдараа уудлаад атга дүүрэн чихэр гаргаж өгч билээ.
Бороо, бороо ороод л байгаарай. Бодолд нуугдсан дурсамж бүхнээ сэргээгээд авъя…
Бэлчээрийн ургамлын ургалтын байдал 5 дугаар сарын 20-ны байдлаар Дундговийн нийт, Өмнөговь, Дорноговийн ихэнх, Баян-Өлгий, Ховд, Говь-Алтайн зарим сумдын нутгаар муу, Орхон, Дархан-Уул, Дорнодын нийт, Хөвсгөл, Хэнтий, Булган, Сэлэнгэ, Төвийн ихэнх, Увс, Завхан, Баянхонгорын зарим, Өвөрхангай, Өмнөговийн цөөн сумдын нутгаар хэвийн, бусад нутгаар дунд байна.
Энэ арав хоногт агаарын температур нийт нутгаар олон жилийн дунджаас 3.1-8.8 градусаар дулаан, хур тунадас нийт нутгийн 10 гаруй хувьд олон жилийн дунджаас ахиу, 80 орчим хувьд дунджаас бага орсон.
Эх сурвалж: Ус цаг уур, орчны судалгаа мэдээллийн хүрээлэн
Жүдо бөхийн насанд хүрэгчдийн дэлхийн аварга шалгаруулах тэмцээн АНЭУ-ын Абу Даби хотноо үргэлжилж байна.
Монголын баг тамирчдаас эмэгтэйчүүдийн 48 кгд ОУХМ Б. Баасанхүү алт, эрэгтэйчүүдийн 73 кгд ОУХМ Л. Анхзаяа хүрэл медаль хүртсэн.
Тэмцээний 6 дахь өдөр буюу өнөөдөр холимог багийн дэлхийн аварга шалгаруулах тэмцээн үргэлжилнэ. Монголын баг тамирчид D хэсэгт сугалаа татсан. Тэд Гүрж, Унгарын шигшээтэй хэсгийн барилдаантай.
Улсын Их Хурлын 2024 оны ээлжит сонгуульд нэр дэвших иргэдийн лавлагааг өнөөдөр 09:00-18:00 цагийн хооронд олгож байна.
Сонгуульд нэр дэвшигчдийн бүртгэл энэ сарын 25-ны бямба гарагт хаахтай холбоотойгоор нэр дэвшигчдийн лавлагааг өнөөдөр буюу бүх нийтээр амрах амралтын өдрөөр ажиллан олгохоор бүх шатны шүүхийн 37 Тамгын газар, Арбитр, Шүүхийн шийдвэр гүйцэтгэх газар хамтран ажиллаж байгаа юм.
Лавлагаа өгөх ажил эхлээд сар гаруй хугацаа өнгөрч байгаа ч нэр дэвшигчид материалаа тулган ирүүлж байгаагаас их хэмжээний материал хуримтлагдан хүндрэл учирч байна. УДШ-ийн Тамгын газар нь аймаг, нийслэл, дүүрэг, сум дундын бүх шүүхүүдээс шүүлт хийлгэн дээрх байгууллагуудаас лавлагаа авч нэгтгэн гаргаж өгдөг болохыг Улсын дээд шүүхээс мэдээллээ.