Month: March 2024

Аж үйлдвэрийн салбарын үйлдвэрлэл энэ оны нэгдүгээр сарын урьдчилсан гүйцэтгэлээр 2.5 их наяд төгрөг болж, өмнөх оны мөн үеийнхээс 458.5 (22.1 хувь) тэрбум төгрөгөөр нэмэгдлээ.

Үүнд уул уурхай олборлолт 352.4 (24.8 хувь) тэрбум, боловсруулах үйлдвэрлэл 87.2 (20.1 хувь) тэрбум төгрөгөөр өссөн нь голлон нөлөөлснийг Үндэсний статистикийн хороо мэдээлсэн юм.

Уул уурхай, олборлох аж үйлдвэрийн салбарын үйлдвэрлэл өнгөрсөн сарын урьдчилсан гүйцэтгэлээр 1.8 их наяд төгрөг болж, өмнөх оны мөн үеийнхээс 352.4 (24.8 хувь) тэрбум төгрөгөөр  өсөхөд чулуун, хүрэн нүүрс олборлолт 267.1 (47.4 хувь) тэрбум, металлын хүдэр олборлолт 104.2 (14.3 хувь) тэрбум, бусад ашигт малтмал олборлолт 3.4 (26.3 хувь) тэрбум төгрөгөөр өссөн нь нөлөөлжээ.

Уул уурхай, олборлох аж үйлдвэрийн салбарт чулуун нүүрс, мөнгөний баяжмал, цэвэршүүлээгүй алт, цайрын баяжмал, төмрийн хүдрийн баяжмал, баяжуулсан нүүрс, хайлуур жоншны баяжмалын биет хэмжээ өмнөх оны мөн үеийнхээс 16.3-93.2 хувиар өсөж, зэсийн баяжмал, хүрэн нүүрс, хайлуур жонш, газрын тос, төмрийн хүдэр 0.9–22.1 хувиар багассан байна.

Боловсруулах аж үйлдвэрийн салбарт янжуур тамхи, гурил, нүүрсэн шахмал түлш, шингэн сүү, цэвэр спирт, малын мах, ус, ундаа жүүс, шохой, ноолууран сүлжмэл эдлэл, цагаан архи, самнасан ноолуур, цемент зэрэг гол нэр төрлийн бүтээгдэхүүний үйлдвэрлэлийн биет хэмжээ 1.2 хувиас 11.9 дахин өсөж, харин металл бэлдэц, катодын зэс зэрэг гол нэр төрлийн бүтээгдэхүүний үйлдвэрлэл 0.4– 1.9 хувиар багасжээ.

Аж үйлдвэрийн салбарын борлуулсан бүтээгдэхүүн энэ оны нэгдүгээр сарын урьдчилсан гүйцэтгэлээр 4 их наяд төгрөг болж, өмнөх оны мөн үеийнхээс 557.1 (16.3 хувь) тэрбум төгрөгөөр нэмэгдлээ. Үүнд уул уурхай, олборлолтын салбарын борлуулалт 564 (20.8 хувь) тэрбум, цахилгаан хий, уур, агааржуулалтын салбарын борлуулалт 14.8 (7.3 хувь) тэрбум төгрөгөөр өссөн нь нөлөөлөв.

Уул уурхай, олборлох аж үйлдвэрийн салбарын борлуулсан бүтээгдэхүүн өмнөхоны мөн үеийнхээс 564 (20.8 хувь) тэрбум төгрөгөөр өсөхөд нүүрс олборлолтын салбарын борлуулалт 497 (32.2 хувь) тэрбум, газрын тос олборлолт 74.7 (70.7 хувь) тэрбум, бусад ашигт малтмал олборлолт 7.1 (36.4 хувь) тэрбум төгрөгөөр өссөн нь нөлөөлжээ.

Гадаад зах зээлд энэ оны нэгдүгээр сарын урьдчилсан гүйцэтгэлээр 3 их наяд төгрөгийн борлуулалт хийсний 2.9 их наяд нь уул уурхай, олборлох салбарынх аж. Уул уурхайн бүтээгдэхүүний гадаад борлуулалтын 64.6 хувийг нүүрс, 28.5 хувийг металлын хүдэр, 6.1 хувийг газрын тос олборлолтын, 0.8 хувийг бусад ашигт малтмал олборлолтын салбар эзэлжээ.

Агаарын дундаж температурын олон жилийн явцаас үзвэл, 1985 оны гуравдугаар сард нийт нутгаар олон жилийн дунджаас 2-8°С хүйтэн байжээ.

Энэ нь 1979 оноос хойших хамгийн хүйтэн гуравдугаар сар болсон юм.

Харин 2018 оны энэ сард нийт нутгаар олон жилийн дунджаас 0-9°С хэм дулаан байсан нь Монгол Улсын түүхэн дэх хамгийн дулаан гуравдугаар сар болж байв.

Харин 2013 оноос хойш олон жилийн дунджаас дулаан гуравдугаар сарууд үргэлжилж байгаа боловч энэ жилийн хувьд төвийн аймгуудын нутгийн өмнөд хэсэг, говь болон зүүн аймгуудын нутгаар олон жилийн дунджаас хүйтэн байх нь.

Улаанбаатар хотод байгуулах гэж буй метроны шугам нь Толгойтоос Амгалан хүртэл 17.7 км урт байх бөгөөд үүнээс 6.6 км нь газар доогуур хийгдэх юм. Метро нь газар доорх инженерийн байгууламж тул цахилгаан эрчим хүчний найдвартай эх үүсвэр шаардлагатай.

Метронд шаардагдах цахилгааны эх үүсвэрийг ирэх аравдугаар сард ашиглалтад орох Бөөрөлжүүтийн цахилгаан станцаас нийлүүлэхээр төр, хувийн хэвшлийн харилцан хэлэлцээр хийжээ. Монгол Улсын төвийн эрчим хүчний системийн оргил ачаалал 2020 онд 1309 мBт хүрсэн бөгөөд үүний 60 хувийг Улаанбаатар хотын ачаалал эзэлжээ.

Жайка олон улсын байгууллагын урьдчилсан судалгаагаар метро жилд 50-60 мВт цахилгаан эрчим хүч ашиглана гэж тооцолсон байдаг. Тодруулбал, төр, хувийн хэвшлийн түншлэлийн хүрээнд хэрэгжүүлж буй Бөөрөлжүүтийн цахилгаан станц нийт 300 мВт-ын хүчин чадалтай. Тус цахилгаан станцын эхний блок бүхий 150 мВт хүчин чадалтай станц энэ оны аравдугаар сард ашиглалтад орох бол хоёрдугаар ээлжийг 4-5 жилийн дараа ашиглалтад оруулахаар төвлөж буй. Бөөрөлжүүтийн цахилгаан станц бүрэн ашиглалтад орсноор одоогийн “ТЭЦ 3”-ын үйлдвэрлэж буй эрчим хүчний хэмжээнээс нэг дахин илүү хүчин чадлыг төвийн эрчим хүчинд нийлүүлнэ.

Mетроны цахилгаан эх үүсвэрийн талаар НИТХ-ын ээлжит бус XVII хуралдааны II хэлэлцүүлгийн үеэр Нийслэлийн Засаг дарга бөгөөд Улаанбаатар хотын Захирагч Х.Нямбаатар “Төр, хувийн хэвшлийн түншлэлээр эрчим хүчний шинэ эх үүсвэрүүдийг хэрхэн бий болгож болох вэ гэдгийг Улаанбаатар хотын бүсчилсэн хөгжлийн форумаар танилцуулна. Эрчим хүчний эх үүсвэрээ шийдэхгүйгээр метроны төслийг эхлүүлнэ гэж байхгүй. Мэдээж бид эрчим хүч, дулаан зэрэг бүх асуудлаа тооцсон. Энэ хүрээнд төр, хувийн хэвшлийн түншлэлийн тухай хуульд өөрчлөлт оруулахаар хуулийн төсөл боловсруулж байна. Гуравдугаар сарын сүүлээр УИХ-д өргөн барина. Тус хуулийн төслийг үндэслэж дээрх асуудлуудаа төр, хувийн хэвшлийн түншлэлээр шийднэ” гэв.

Өвлийн аялал жуулчлалыг хөгжүүлэх, жуулчдын урсгалыг нэмэгдүүлэх, Монгол орныг сурталчлах ажлын хүрээнд  “Хөх сувд” олон улсын мөсний баяр энэ амралтын өдрүүдэд Хөвсгөл нуурын эрэг дээр зохион байгуулагдана.

“Хөх сувд” мөсний баярт дараах уран бүтээлчид оролцох аж.