Month: February 2024

2024 оны 02 дугаар сарын 27-ны 08 цагаас 02 дугаар сарын 28-ны 08 цаг хүртэлх цаг агаарын тойм мэдээ хүргэж байна.

Цасны зузаан: Өнөө өглөөний цаг уурын станц, харуулын цасны зузааны мэдээгээр Баян-Өлгийн зүүн хойд, Ховдын хойд, Говь-Алтайн баруун өмнөд, Баянхонгор, Өвөрхангай, Өмнөговь, Дорноговийн өмнөд хэсгээр цасгүй, бусад нутгаар 0.0-48.0 см зузаан цасан бүрхүүл тогтсон байна. Үүнээс хамгийн их нь Увсын Сангилд 48.0 см, Түргэн, Хяргасд 45.0-46.0 см, Малчин, Баруунтуруунд 40.0-41.0 см, Улаангом, Зүүнговьд 36.0-37.0 см, Увсын Давст, Сүхбаатарын Түмэнцогтод 33.0-34.0 см, Төв аймгийн Борнуурд 31.0 см, бусад хэсгээр 0.0-29.0 см цасан бүрхүүл тогтсон байна.

Хур тунадас: Өнгөрсөн хоногт Ховдын хойд, Говь-Алтай, Хөвсгөл, Архангай, Өвөрхангай, Сэлэнгэ, Дарханы зарим газраар 0.0-0.8 мм цас орсон байна. Үүнээс хамгийн их нь Ховдын Зэрэг 0.8 мм, Дарви 0.6 мм, Хөвсгөлийн Ренчинлхүмбэ, Дарханы Орхонд 0.4 мм, бусад хэсгээр 0.0-0.3 мм цас орсон байна.

Агаарын хамгийн их температур: Өчигдөр өдөр нутгийн зүүн хагаст өмнөх өдрөөсөө 1-12 хэмээр хүйтэрч, бусад нутгаар 1-7 хэмээр дулаарч Увс нуур болон Дархадын хотгор, Завхан голын эх, Идэр, Тэс голын хөндийгөөр 20-26 хэм, Хангай, Хөвсгөл, Хэнтийн уулархаг нутаг, Хүрэнбэлчир орчим, Орхон, Сэлэнгэ, Хараа, Ерөө, Туул, Тэрэлж, Хэрлэн голын хөндий, Дарьгангын тал нутгаар 13-19 хэм, Их нууруудын хотгор, говийн бүс нутгийн өмнөд хэсгээр 1-6 хэм, бусад нутгаар 7-13 хэм хүйтэн байв.

Агаарын хамгийн бага температур: Өнгөрсөн шөнө нутгийн хойд хэсгээр 1-9 хэмээр хүйтэрч, бусад нутгаар 0-9 хэмээр дулаарч Увс нуур болон Дархадын хотгор, Завхан голын эх, Хүрэнбэлчир орчим, Идэр, Тэс голын хөндийгөөр 37-42 хэм, Хангай, Хөвсгөл, Хэнтийн уулархаг нутаг, Эг, Үүр, Орхон, Туул, Тэрэлж, Хэрлэн, Халх голын хөндийгөөр 31-36 хэм, Их нууруудын хотгор, говийн бүс нутгийн өмнөд хэсгээр 16-22 хэм, бусад нутгаар 23-30 хэм хүйтэн байв.

Cалхи: Ихэнх нутгаар секундэд 4-9 метр, говь, тал, хээрийн нутгаар секундэд 10-12 метр хүрч ширүүссэн байна.

Улаанбаатар хот орчмоор: Өчигдөр өдөр цас ороогүй. Өнгөрсөн шөнө 0.0-0.3 мм цас орсон байна. Салхи баруун хойноос секундэд 3-8 метр. Өчигдөр өдөр 14-16 хэм, өнгөрсөн шөнө Яармаг-Сонгины орчмоор 35 хэм, бусад хэсгээр 26 хэм хүйтэн хоносон байна

Хаваржилтын нөхцөл байдал, шуурхай бүлгүүдийн авч хэрэгжүүлж байгаа арга хэмжээний  талаар Монгол Улсын Шадар сайд, Улсын онцгой комиссын дарга С.Амарсайхан Засгийн газрын хуралдаандтанилцууллаа.

Үүнтэй холбогдуулан малчид, иргэдэд үзүүлэх эрүүл мэндийн тусламж үйлчилгээний хүртээмжийг нэмэгдүүлэх, дархлааг дэмжих, болзошгүй өвчнөөс урьдчилан сэргийлэх арга хэмжээг зохион байгуулахыг Эрүүл мэндийн сайд С.Чинзоригт даалгав.
Зудын улмаас малын сэг зэм их хэмжээгээр бий болж байгаатай холбогдуулан малын сэг зэм устгах ажлыг өргөн хүрээтэй зохион байгуулах, малын гоц халдварт цэцэг, бог малын мялзан өвчний халдварын голомтыг хяналтад авах, тархалтыг бууруулах, урьдчилан сэргийлэх чиглэлээр шаардлагатай арга хэмжээг авч хэрэгжүүлэх, вакцин, тарилга, эм бэлдмэлийн нөөц бүрдүүлэх, орон нутагт хүргэх, вакцинжуулах ажлыг шуурхай зохион байгуулж ажиллахыг ХХААХҮ-ийн сайдад даалгав.
Монгол орны нийт нутгийн 80 гаруй хувьд цастай байгаагаас Алтай, Хангай, Хэнтий, Хөвсгөлийн өндөрлөг уулархаг нутаг, Хан Хөхий, Хантайшир, Монголын Дорнод тал болон говийн нутгийн зарим хэсгээр 10-36 см, бусад нутагт 1-9 см, хунгарлаж шуурсан газартаа 60 см, гуу жалгандаа 100 см хүртэл зузаан цастай байна.
Цаг уур, орчны шинжилгээний газраас 2024 оны хоёрдугаар сарын 20-ны байдлаар зудын нөхцөл байдалд үнэлгээ хийхэд улсын хэмжээнд 13 аймгийн 58 суманд “төмөр зуд”-ын, 17 аймгийн 139 суманд “цагаан зуд”-ын, 18 аймгийн 69 суманд “цагаанаар зудархуу” нөхцөл байдалтай байгаа бөгөөд нийт 21аймгийн 266 сум, нийслэлийн хоёр дүүрэгт  өвөлжилт хүндэрсэн байна. Төмөр зудтай сумдад 42436, цагаан зудтай сумдад 75022 малчин өрх нийт 117458 малчин өрх байна.
Өнгөрсөн оны  мөн үетэй харьцуулахад хорогдсон малын тоо 85.9 хувиар өсөж 2024 оны 2 дугаар сарын 24-ний өдрийн байдлаар 2,136,563 буюу нийт малын 3.3 хувь хорогдоод байна.
Зам даваа хаагдсан 15 аймгийн хэмжээнд 52,498 км зам гаргах шаардлагатайгаас нийт 49,699 км зам гаргаад байна.

Товч мэдээ
·      Боловсролын зээлийн сангийн хөрөнгийг зарцуулах, түүнд хяналт тавих журмыг баталж, сангийн хөрөнгийг жил бүрийн улсын төсвийн төсөлд тусган зарцуулалтын үйл ажиллагаанд хяналт тавьж, удирдлага зохион байгуулалтаар  хангаж ажиллахыг Боловсрол, шинжлэх ухааны сайд Л.Энх-Амгалан, Сангийн сайд Б.Жавхлан нарт даалгав.
·      Хилийн чанадаас эх орондоо эргэн суурьших Монгол Улсын иргэдэд чиглэсэн Засгийн газраас хэрэгжүүлэх арга хэмжээг судлан хэрэгжүүлэхэд нэгдсэн удирдлага, зохицуулалтаар хангах үүрэг бүхий Үндэсний хороог байгуулж, бүрэлдэхүүнийг баталлаа.

“School Police” буюу эцэг, эхчүүдийн сургуулийн эргүүлийн үйл ажиллагаа сэдэвт хэлэлцүүлэг боллоо.

Энэ үеэр Тээврийн Цагдаагийн Алба (ТЦА)-ны Урьдчилан сэргийлэх хэлтсийн ахлах мэргэжилтэн Г.Отгонтамир “2013 оноос хойш School Police хэрэгжиж эхэлсэн.  Цагдаагийн байгууллагад хамгийн их дэмжлэг туслалцаа үзүүлж байгаа зүйл нь эцэг, эхчүүдийн эргүүлийн үүрэг.

School Police гарч сургууль орчимд үүрэг гүйцэтгэснээс хойш хүүхэд өртөх зам тээврийн ослын тохиолдол 80-90 орчим хувиар буурсан. Хүүхдийг зам хөндлөн гарцаар аюулгүй гарахад маш том дэмжлэг үзүүлж байгаа.

School Police-н шаардлагыг эсэргүүцсэн, дүрэм зөрчсөн жолооч нарт гомдол мэдээллийн дагуу шуурхай арга хэмжээ авч ажиллаж байна. Хэрвээ School Police-н шаардлагыг зөрчвөл хоёр оноо хасаж, 20,000 төгрөгөөр торгоно.

Цаашлаад энэхүү үйл ажиллагаанд хантааз, улаан модноос гадна энгэрийн камер шаардлагатай байгаа” гэв.

Ховд аймаг Зэрэг сумын Эхэн багийн малчин С.Одбаяртай ярилцлаа.

-Саяхан танай суманд 39м/с шуурсан. Үүнд 100 гаруй айл мал, эд хөрөнгөөрөө хохирсон гэсэн. Танайх энэ салхинд өртсөн үү?

-Мал маллана гэдэг мэдээж тийм амар ажил биш. Ёстой л халуунд нь халж хүйтэнд нь хөрч өдөр шөнөгүй зүтгэж амьдардаг. Тэр салхинд манайх гэдэг айл чинь гэр болон малын хашаа, машинаа эвдүүлчихсэн.

Яг цагаан сарын үеэр буюу шинийн гуравны шөнө хоёр цагаас эхлэн шуурч хоёр хоног үргэлжилсэн их хүчтэй шуурга болсон. Хүмүүс хэлэхдээ сумын төвд бол бүтэн хашаатай үлдсэн айл  гэж байхгүй гэцгээж байсан.

Гэр оронгүй болсон хүмүүс чинь бүтэн үлдсэн гэрийн модоо нийлүүлж байгаад жижигхэн урц барьж авсан ч маргааш нь ахиад л аваад шидчихсэн,одоо тэндээс авах юм үлдээгүй. Энэ их хүйтэнд шил цонхгүй задгай машинд ийш тийшээ явна гэдэг чанга байна.

-Анх удаа ийм үзэгдэл болж байна уу. Сүүлд хэзээ ийм хүчтэй шуурга болсон бэ?

-Манай Зэрэг сум гэдэг чинь шуургаараа их алдартай жилийн дөрвөн улиралд л шуурч байдаг. Гэхдээ энэ хэмжээнд хүрч шуурч байгаа нь миний мэдэхээр хоёр дахь нь. Сүүлд 12 сарын дундуур 43м/с хүрсэн энэ үеэр уулархаг газраараа салхины хүч бага өнгөрсөн.

Цахимаар энэ тухай сануулсан байсан пост харсан тэгээд зарим хүмүүс итгэхгүй худлаа ташаа мэдээлэл гэсэн байсан. Манай сумыг чинь баруун аймгийнхан шумуул, шуурга, дэрс гурваар нь андахгүй ээ.

О.Хүрэлзаяа

Засгийн газрын өнөөдрийн хуралдаанаар гаргасан шийдвэрийг танилцууллаа.

Энэ талаар ЗГХЭГ-ын дарга Д.Амарбаясгалан “Засгийн газрын гишүүд шуурхай бүлэг болон орон нутгуудад ажиллаад ирлээ. Нөхцөл байдалтай танилцаж, малчидтайгаа уулзсан. Засгийн газрын гишүүд цаашид авч хэрэгжүүлэх арга хэмжээг өнөөдрийн хуралдаанаар хэлэлцүүллээ. Өнөөдрийн Засгийн газрын хуралдаанаар долоон асуудлыг шийдвэрлэсэн.

Тухайлбал, Төмөр зудтай байгаа аймгуудад өвс, гурил тэжээл өгөх шийдвэрийг гаргалаа. Түүнчлэн малчдын зээлийн асуудал, зудад малаа алдсан малчдыг малжуулах, гурилын үнийн өсөлт, ЕБС-ийн амралт, оюутны амралтын хуваарьт өөрчлөлт оруулах талаар, хөдөө сумдын автомашиныг шинэчлэх асуудлыг асуудлыг хэлэлцлээ.

Өвөлжилт үндэрсэн аймаг сумдад ХХААХҮЯ-ны дэргэдэх Тариалан эрхлэлтийг дэмжих санд байгаа 10 мянган тонн тэжээлийн буудайг үнэ төлбөргүй олгоно. Малчдад хоол хүнсний дэмжлэг үзүүлнэ. 117 сумын 110 мянга гаруй малчдад гурил, будааны дэмжлэг үзүүлнэ.

Хоёрдугаарт малчдын зээлийн эргэн төлөлтийн хугацааг хойшлуулж өгөх хүсэлтийг илэрхийлж байсан. Малчдын зээлийн эргэн төлөлтийг 1 жил, хүүгийн төлөлтийг 1 жилээр хойшлуулах шаардлагатай гэж Ерөнхий сайд салбар сайд, холбогдох албаныханд үүрэг болголоо. Зээлийн хүүгийн 6 хувийг засгийн газар, үлдсэн хувийг хэрхэн шийдвэрлэх талаар санал боловсруулахаар шийдвэрлэлээ. Шаардлагатай тохиолдолд УИХ-ын чуулганаар энэ асуудлыг хэлэлцэнэ. 1 малчин дунджаар 10 сая төгрөгийн зээлтэй байна” гэв.