Month: November 2023

Цагдаагийн байгууллагаас энэ оны 10 дугаар сард хүн худалдаалах гэмт хэрэгтэй тэмцэх чиглэлээр насанд хүрээгүй 7 хохирогчтой, 8 холбогдогчтой, 3 бүлэг этгээдүүдийн гэмт үйлдлийг илрүүлэн дайчлан баривчилж, эрүүгийн хэрэг үүсгэж, яллагдагчаар татан мөрдөн шалгах ажиллагааг үргэлжлүүлж байна.

Монгол Улсын Эрүүгийн хуулийн тусгай ангийн 13.1 дүгээр зүйлд Хүн худалдаалах гэмт хэргийг зүйлчилсэн байдаг.

Сүүлийн жилүүдэд “Хүн худалдаалах” гэмт хэрэг үйлдэгчид цахим орчинд хуурамч хаяг үүсгэн өсвөр насны охидтой харилцаж, улмаар тэдний итгэлийг олж хувь хүний нууцтай холбоотой нүцгэн зураг, дүрс бичлэг зэргийг хуурч мэхлэх замаар авч олон нийтийн сүлжээнд тараана гэх зэргээр айлган сүрдүүлж эрхшээлдээ оруулж бэлгийн харьцаанд орохыг шаардаж байна.

Мөн гэмт этгээдүүд цахим орчинд “Санхүү өгнө” гэх зар мэдээллийг байршуулж охид, эмэгтэйчүүдийг олзлон авч, зодож, айлган сүрдүүлж хүчиндэх, нүцгэлж дүрс бичлэг хийж “Олон нийтийн сүлжээнд тавина, цагдаад өгнө” гэх зэргээр эрхшээлдээ оруулж, орон сууц, нийтийн байр хөлслөн зорчих эрхийг нь хязгаарлан хорьж, бусдад хүчээр биеийг нь үнэлүүлэх, гудамж талбайд зогсоож биеийг нь үнэлүүлж байна. Түүнчлэн тэдэнд үйлчлүүлэгч олж өгөх, саун массажны газарт массажист нэрээр, караоке бааранд зочдын ширээнд суулгаж мөлжих зорилгоор хүн худалдаалах гэмт хэргийг үйлдэж байна.

Цагдаагийн байгууллагад энэ оны эхний 10 сарын байдлаар нийт 20 хохирогчтой /насанд хүрээгүй 9/, 14 холбогдогчтой 10 гэмт хэрэг бүртгэгдсэн. Энэ нь өмнөх оны мөн үеэс 11.1 хувиар өссөн үзүүлэлттэй байна.

Энэ төрлийн гэмт хэрэгт өртөж, хохирч байгаа насанд хүрээгүй хохирогчид дийлэнх нь гэр бүлийн таарамжгүй харилцаатай байдлын улмаас оршин суух газраа орхиж явсан хүүхдүүд байгаа нь цагдаагийн байгууллагад бүртгэгдэн шалгагдаж байгаа гэмт хэргийн шалтгаан нөхцөлөөс харагдаж байна.

Иймд олон нийтийн цахим сүлжээнд “Санхүү авна”, “Санхүү өгнө” гэх зар мэдээллийн ард хууль бус үйлдлээ хэрэгжүүлэх гэж санаархаж буй этгээдүүд байгаа гэдгийг анхаарч, энэ төрлийн гэмт хэргийн хохирогч болохоос урьдчилан сэргийлэхийг цагдаагийн байгууллагаас анхааруулж байна.

Эгнээ байраа буруу эзэлж дүрэм зөрчсөн жолооч шаардлага тавьсан цагдаагийн алба хаагчийг доромжилж, бүдүүлэг үйлдэл гаргасан бичлэг цахим орчинд тавигдсан.

Тэгвэл уг жолоочид шалгалтын ажиллагаа явуулж байгааг цагдаагийн байгууллагаас мэдээллээ.

Улсын дугаараар нь тээврийн хэрэгслийн төлөгдөөгүй торгуулийн дүнг харвал 540,000 төгрөг байна.

Балба улсын арми, АНУ-ын Номхон далайн арми хамтран зохион байгуулж байгаа “Гамшгийн хор уршгийг арилгах сургалт, туршлага солилцох үйл ажиллагаа”-нд ОБЕГ-ын Гамшгаас хамгаалах сургалт, сурталчилгааны хэлтсийн дарга, хурандаа Д.Бат-Эрдэнэ, нийслэлийн Аврах ангийн захирагч, хурандаа М.Мөнхөө нар оролцож байна.

Тус үйл ажиллагаанд Канад, Энэтхэг, Мальдив, Шри-Ланк, Тайланд, Их Британи зэрэг 7 улс ажиглагчаар, Балба улсын Засгийн газар, 8 агентлаг, 7 аймгийн нийт 300 гаруй төлөөлөл оролцож, улс орнууд гамшгаас хамгаалах бүтэц тогтолцоо, гамшгийн эрсдэлийн удирдлага, бүс нутгийн гамшгийн нөхцөл байдал, уур амьсгалын өөрчлөлт, гамшгийн үеийн хариу арга хэмжээний туршлагаа хуваалцах юм.

Балба улс нь Гималайн уулсын бүс нутагт орших бөгөөд газар хөдлөлт, хөрсний гулсалт, уулын нуранги, уруйн болон шар усны үер, цасан нуранги, үер зэрэг байгалийн олон аюулын эрсдэл өндөр улс юм. Мөн уур амьсгалын өөрчлөлтийн нөлөө тус улсад маш хурдацтай мэдрэгдэж байгаа бөгөөд мөнх цаст уулын цэвдэг хайлах, түүнээс улбаатай цасан нуранги, шар усны үер, тариан талбай дарагдах зэрэг аюул ихээр гарах болсон. Балбад уур амьсгалын өөрчлөлтийн нөлөөгөөр жилийн дундаж дулаан 1.5 хэмээр нэмэгдсэн. Энэ нь урд өмнө тохиолдож байгаагүй байгалийн аюулт үзэгдэл үүсгэх, гамшгийн давтамж, эрчмийг нэмэгдүүлсээр байгаа аж.

Энэ сарын 03-ны өдөр гэхэд тус улсын баруун хэсэгт оршдог Жажаркот мужид хүчтэй газар хөдөлсний улмаас 128 хүн амь үрэгдэж, олон арван хүн бэртсэн байна.

Дээрх асуудлын хүрээнд газар хөдлөлт, хөрсний гулсалт, үерийн цагийн байдал үүсгэн команд штабын дадлага сургууль хийнэ.  Мөн Балбын Читван хотод газар хөдлөлтийн болон аюултай бодисын үеийн хариу арга хэмжээ, гал түймэр унтраах ажиллагаа зэрэг хээрийн дадлага сургуулийг зохион байгуулах юм гэж Онцгой байдлын ерөнхий газраас мэдээллээ.

Үндэсний Статистикийн хорооноос сар бүр нийгэм, эдийн засгийн тоон үзүүлэлтүүдийг бэлтгэн олон нийтэд хүргэдэг. Тэгвэл тус газраас хүнсний чиглэлийн салбарт үнийн ямар өөрчлөлт гарсан талаар танилцуулжээ.

Тодруулбал, өмнөх оны мөн үеэс хүнсний бараа, ундаа, усны бүлгийн үнэ дүнгээрээ 14.7 хувь, нийтийн хоолны бүлгийн үнэ 16.9 хувиар өсчээ.

Авлигатай тэмцэх газрын Хяналт шалгалт, дүн шинжилгээний хэлтэс нь 2023 оны 10 дугаар сарын 30-наас 11 дүгээр сарын 3-ны өдрүүдэд нийтийн албанд томилогдохоор нэр дэвшсэн 537 иргэний хувийн ашиг сонирхлын урьдчилсан мэдүүлгийг шалган, 224 мэдүүлгийг хянан шийдвэрлэлээ. Одоогоор ажиллагаанд 313 нэр дэвшигчийн урьдчилсан мэдүүлэг хянагдаж байна.

Өнгөрсөн долоо хоногт иргэн, аж ахуйн нэгж, байгууллагаас ирүүлсэн нийтийн албан тушаалтны авлига, ашиг сонирхлын зөрчилтэй холбоотой 80 гомдол, мэдээллийг хүлээн авч шалгаснаас 14 гомдол, мэдээллийг хянан шийдвэрлэлээ.

Төлөвлөгөөт хяналт шалгалтын хүрээнд 334 албан тушаалтны хувийн ашиг сонирхлын болон хөрөнгө, орлогын мэдүүлгийг шалгав. Дээрх хугацаанд шалгаж шийдвэрлэсэн 1 албан тушаалтны хувийн ашиг сонирхлын болон хөрөнгө орлогын мэдүүлэгт орлогын эх үүсвэр нь үндэслэлгүй, Эрүүгийн хуулийн 22.10-т заасан гэмт хэргийн шинжтэй байсан тул шалгуулахаар Мөрдөн шалгах хэлтэст шилжүүлсэн байна.