Month: September 2022

Өнөөдөр буюу 2022 оны есдүгээр сарын 29-нд Эх, нярай эмэгтэйчүүдийн үндэсний төв “Молекул биологийн шинэ лаборатори”-ийн нээлтээ хийлээ.

НҮБ-ын ХАС-ын зүгээс Ковид-19 цар тахлын нийгэм, эдийн засгийн сөрөг нөлөөг бууруулах, нэн ялангуяа өсвөр насны охид, залуучууд, эмэгтэйчүүдийн эрүүл мэндийг хамгаалж, тэдний нийгмийн хамгааллын асуудлыг шийдвэрлэх чиглэлд Монгол Улсын Засгийн газартай нягт хамтран ажиллаж ирсэн. Тухайлбал 2020 оны 1 дүгээр сараас эхлэн цар тахлын үед эх, нярайн тусламж үйлчилгээний бэлэн байдлыг хангах, жирэмсэн эх, нярайд чанартай тусламж үзүүлэхэд тулгамдаж буй асуудлыг тодорхойлж, тэдгээрийг шийдвэрлэх мэргэжил арга зүйн болон санхүүгийн дэмжлэгийг үзүүлж ажилласан.

БНХАУ-ыг таниулах Өвөр Монголын соёлын өдрүүд өнөөдрөөс эхлэн ирэх аравдугаар сарыг дуустал үргэлжилнэ.

Энэхүү арга хэмжээтэй холбогдуулан БНХАУ-ын талаас мэдээлэл өгөв.

БНХАУ-аас Монгол Улсад суугаа Онц бөгөөд бүрэн эрхт Элчин сайд Цай Вэньруй “Өвөр Монголын соёлын өдрүүдэд 2009 оноос эхлэн зохиогдож байна. Хятад, Монгол Улсын харилцаа, хамтын ажиллагаа иргэдэд бодитой үр дүнгээ өгсөөр ирсэн. Өдөрлөгт оролцогчид Хятад, Монголын нөхөрсөг, уламжлалт найрамдлыг өргөжүүлэхэд оюун ухаан хүч чадлаа нэмэгдүүлэхэд хувь нэмрээ оруулна гэдэгт итгэж байна.” гэв.

Энэ удаагийн “Өвөр Монголын соёлын өдрүүд” арга хэмжээг цахимаар зохион байгуулах ажээ.

Өвөр Монголын соёлын өдрүүдийн хүрээнд цахим тоглолт, гэрэл зургийн үзэсгэлэн, кино, олон ангид уран сайхны кино, ном хэвлэлийн танилцуулга, дууны уралдаан, анагаах ухааны эрдэм шинжилгээний хурал тэргүүтэй 6 төрлийн арга хэмжээг зохион байгуулах юм байна.

Тухайлбал “Өвөр монгол дөрвөн улиралд бүгд үзэсгэлэнтэй” цахим гэрэл зургийн үзэсгэлэн болох юм. Үзэсгэлэнгээр ӨМӨЗО-ны үзэсгэлэнт байгаль, ардын зан заншил, эдийн засаг нийгмийн хөгжлийг харуулна.

Мөн “Ангалын ирмэг дээр”, “Гэрэл дунд одогсод”, “Бяцхан улаан цэцэг”, “Эгч”, “Цаг хугацааны төгсгөлд би хүлээж байна”, “Надтай гэрлээч”, “Цагаан могойн үлгэр” зэрэг уран сайхны киног цахимаар үзүүлэх юм байна.

Цахим соёлын өдрүүдийн арга хэмжээний агуулгыг хэрэглэгчдэд ойлгуулах зорилгоор, cri.cn, Солонго сайт, Улаанбаатар дахь Хятадын соёлын төвийн сайтуудад тусгай булан нээж, Facebookээр дамжуулах аж.

Авлигатай тэмцэх газрын Судалгаа шинжилгээний алба нь 2022 оны 9 дүгээр сарын 19-23-ны өдрүүдэд иргэн, хуулийн этгээдээс ирүүлсэн 42 өргөдөл, гомдлыг хүлээн авч, харьяалах чиг үүргийн нэгжид хүргүүллээ.

Хүлээн авсан өргөдөл, гомдол, мэдээллийн 60 хувь нь авлигын гэмт хэргийн шинжтэй бөгөөд тендер худалдан авах ажиллагаа, тусгай зөвшөөрөлтэй холбоотой гомдол давамгайлж байв. Өнгөрсөн долоо хоногт авлигыг мэдээлэх 110 тусгай дугаараар 224 дуудлага хүлээн авчээ.

Тус алба “Шударга байдлын үнэлгээ”, “Улс төр, шүүх, хууль хяналтын байгууллагын хүрээн дэх авлигын талаарх төсөөллийн судалгаа”, “Авлигатай тэмцэх газраас зохион байгуулах соён гэгээрүүлэх үйл ажиллагааны стратеги боловсруулах” зэрэг судалгааны ажлыг гүйцэтгэж байна.

БНХАУ-ын ачаа тээврийн томоохон төлөөлөл болох “SF AIRLINES” компанид Монгол Улсад үйл ажиллагаа явуулах эрхийн гэрчилгээг өнөөдөр олгожээ.

Тус компани нь 2022 оны наймдугаар сарын 24-нд Иргэний Нисэхийн Ерөнхий Газарт хүсэлт гаргасан байна. Уг хүсэлтийн дагуу есдүгээр сарын 13-16-ны өдрүүдэд үзлэг шалгалтад орж, манай улсад төлөөлөгчийн газраа нээн үйл ажиллагаа явуулах эрхтэй боллоо.

ИНЕГ-ын дарга С.Мөнхнасан тус компанийн Монгол дахь төлөөлөгчийн газрын гүйцэтгэх захирал Чин Ганд Иргэний нисэхийн дүрэм болон Монгол Улсад мөрдөгдөж буй бусад хууль тогтоомжийн хүрээнд үйл ажиллагаа явуулж, урт хугацаанд тогтвортой, ажиллахыг хүсэв.

Манай улс ИНД-129 дүрмийн шаардлагын хүрээнд Гадаадын агаарын тээвэрлэгчийн гэрчилгээг олгосноор “SF AIRLINES” компани ачаа тээвэрлэлт гүйцэтгэхээр болж байна.

Эрүүгийн цагдаагийн албаны Кибер гэмт хэрэгтэй тэмцэх хэлтэс, Зохион байгуулалттай гэмт хэрэгтэй тэмцэх хэлтсийн алба хаагчид Монгол Улсын охид, эмэгтэйчүүдтэй бэлгийн харьцаанд орж хүн худалдаалах гэмт хэрэг үйлдсэн байж болзошгүй Сингапур улсын иргэнийг Баянгол дүүрэгт үйл ажиллагаа явуулдаг нэр бүхий зочид буудлаас өнөөдөр дайчлан баривчилсан байна.

Тодруулбал, 64 настай Сингапур Улсын иргэн нь 2013 оноос эхлэн Монгол Улс, Сингапур Улсын хооронд аялал жуулчлалын визээр зорчдог байсан ба Монгол Улсад байх хугацаандаа эмэгтэйчүүдийг зуучлуулж танилцан бэлгийн хүчирхийлэлд оруулах, хувь хүний нууцтай холбоотой дүрс бичлэг, гэрэл зургийг нь авч, хувь хохирогчдыг айлган сүрдүүлдэг, гадаад улсын иргэнтэй үгсэн тохиролцож бэлгийн харьцаанд орсон охид, эмэгтэйчүүдийн биеийг нь үнэлүүлэх, бэлгийн мөлжлөгийн хохирогч болгон хүн худалдаалах гэмт хэрэг үйлдсэн байж байж болзошгүй нөхцөл байдал тогтоогдсон талаар албаны эх сурвалж мэдээллээ.

Одоогийн байдлаар тухайн этгээд нь 130 гаруй охид, эмэгтэйчүүдтэй фэйсбүүк болон инстаграм сүлжээгээр харилцаж, гадаад улс руу зохион байгуулалттайгаар хил дамнуулан таван эмэгтэйг худалдаалсан байж болзошгүй нөхцөл урьдчилсан байдлаар тогтоогдсон бөгөөд мөрдөн шалгах ажиллагааг үргэлжлүүлж байгаа аж.

Иймд хилээр гарч байгаа иргэд ажлын гэрээ заавал байгуулах, өөрийн паспорт бичиг баримтаа хэнд ч өгөхгүй өөртөө хадгалах, Монгол Улсаас тухайн оронд суугаа Элчин сайдын яам, Консулын газарт бүртгүүлэх, Монголд байгаа гэр бүл, хамаатан садан, найз нөхдөдөө очсоноо мэдэгдэж, холбоотой байхыг Цагдаагийн байгууллагаас сэрэмжлүүллээ.

Ковид19 халдварын эсрэг вакцин нэвтрүүлсний дараах үнэлгээний урьдчилсан тайланг өнөөдөр танилцууллаа. Мөн үеэр ЭМЯ-ны Нийтийн эрүүл мэндийн газрын дарга Д.Баярболд “Манай улс 2021 оны хоёрдугаар сараас эхлэн иргэдээ коронавирусийн эсрэг вакцинаар дархлаажуулж эхэлсэн. Нийт найман сая гаруй хүн тун вакцин оруулж, иргэдийг дархлаажуулсан. Зорилтот бүлгийн хүн амын 87 хувь нь коронавируст халдварын бүрэн тунд хамрагдсан байна. Энэ оны наймдугаар сараас иргэдийг гуравдугаар тун буюу нэмэлт тунгаар дархлаажуулж эхэлсэн. Одоо гурав, дөрөв дэх нэмэлт тунг хийж байгаа. Мөн ирэх наймдугаар сараас эхлэн 5-11 насны хүүхдүүдийг вакцинжуулалтын бүх цэгээр дархлаажуулж байна. Одоогийн байдлаар 3,000 орчим хүүхэд коронавирусийн эсрэг дархлаажуулалтад хамрагдсан. Зарим нь хоёрдугаар тунгийн дархлаажуулалтад хамрагдаж байна” гэв.

Энэ сарын 28-нд буюу өчигдөр цагдаагийн байгууллагын 102 дугаарын утсанд нийт 1921 гомдол мэдээлэл бүртгэгджээ. Үүнээс зөрчлийн дуудлага мэдээлэл 1536, хулгайтай холбоотой 18, хүүхэд, гэр бүлийн хүчирхийллийн дуудлага 86, гэмт хэргийн шинжтэй 88 мэдээлэл бүртгэгдсэн байна.

Үүнээс гадна автомашин согтуу жолоодсон 99, хүний биед халдсан 85, эрүүлжүүлэх байранд хоносон 157 тохиолдол гарчэ