Монголын Хуульчдын холбооноос Хуульчдын өдрийг угтан “Хуульчдын өдөр” өдөрлөгийг 2022 оны зургаадугаар сарын 24-ний өдрийн 12:00-16-00 цагийн хооронд Хуульчдын талбайд зохион байгуулах гэж байна.

Өдөрлөгийн үеэр дараах үйлчилгээг үнэ төлбөргүй үзүүлнэ.

Үүнд:

Иргэдэд хууль зүйн зөвлөгөө үнэ төлбөргүй өгөх

Хуульчийн мэргэжлийн шалгалтад оролцогчдод зориулсан зөвлөгөө, мэдээлэл

Хуульчдад нэгдсэн бүртгэл, хуульчийн үргэлжилсэн сургалтын багц цаг хангах, гишүүний татвартай холбоотой үйлчилгээ үзүүлэх юм.

Европын мал аж ахуйн хамгийн том үзэсгэлэн худалдаа “SOMMET DE L’ELEVAGE” энэ оны 10 дугаар сард Франц улсад болох гэж байна. Олон улсын энэ нэр хүндтэй уг үзэсгэлэнд Монгол Улс анх удаа хүндэт зочноор оролцохоор болжээ. Үүнтэй холбогдуулан тус үзэсгэлэнгийн удирдах зөвлөлийн багийн гишүүд, зохион байгуулагчдын төлөөлөл манай улсад ирээд байна. Тус баг мал аж ахуйн салбарт хамтран ажиллах Монгол-Францын бизнес уулзалтыг зохион байгуулахаар болов. ХХААХҮЯ-нд болох тус уулзалтаар мал аж ахуйн салбарын харилцаа, хамтын ажиллагаа, түншлэлийг сайжруулах талаар хэлэлцэх юм.

Манай улс сүүлийн жилүүдэд мал аж ахуйн салбарт бүтээгдэхүүн, түүхий эд, үйлдвэрлэлийн чанар болон таваарлаг байдлыг сайжруулахад анхаарч мах-сүүний чиглэлийн эрчимжсэн мал аж ахуй, фермерийн аж ахуйг хөгжүүлж байна. Энэ үүднээс мал аж ахуйн салбарт сайжруулагчаар ашиглаж буй цэвэр үүлдрийн мах, сүү, сүү-мах, мах-ноосны чиглэлийн сайн үүлдрийн шилмэл малыг Франц улсаас авч байгаа юм. Энэхүү үйл ажиллагааг Засгийн газрын шугамаар болон мөн манай хувийн хэвшлийн зүгээс ч явуулж, импортоор шилмэл үүлдрийн мал оруулж ирж байгаа юм. Энэхүү хамтын ажиллагааг өргөжүүлэх үүднээс Монгол Улс Европын мал аж ахуйн хамгийн том “SOMMET DE L’ELEVAGE” үзэсгэлэн хуладаанд оролцох саналыг олон жил тавьж ирсний дүнд энэ удаа дээрх үзэсгэлэнд “Хүндэт зочин орон”-оор оролцох эрхийг аваад байна.

Олон улсын уг үзэсгэлэнд оролцохын өмнө болж буй Монгол-Францын бизнес уулзалтаар Францын цэвэр үүлдрийн малын импортыг нэмэгдүүлэх, энэ талын тээврийн зардал, малын үнийг бууруулах зэрэг тулгамдсан асуудлыг хэлэлцэх юм. Уулзалт нь хоёр талын төр, хувийн хэвшлийн төлөөлөгчид нэг ширээний ард сууж ярилцах гэж буйгаар онцлогтой.

Тодруулга: Европын мал аж ахуйн хамгийн том үзэсгэлэн худалдаа “SOMMET DE L’ELEVAGE” нь жил бүрийн 10 дугаар сард Франц улсад болдог, жил бүр 30-аад орны 1500 оролцогч, 100 мянган зочин ирдэг, махны үхрийн үүлдрийн дэлхийн шилдэгүүд болон сүүний үхэр, хонь болон адууны үндэсний шилмэл үүлдрүүдийг танилцуулж, олон улсын мал аж ахуйн бүтээгдэхүүний үйлдвэрлэл, генетикийн ололт амжилтыг харуулдаг шилдэг үзэсгэлэн худалдаа аж. Энэ удаагийн үзэсгэлэн-худалдаа Францын төв хэсэгт орших Клэрмон-Ферран хотод энэ оны 10 дугаар сарын 4-7-нд зохиогдох юм.

Барилгын кран унаж, хоёр хүн нас барсан осол гарсан. Энэ асуудлаар Мэргэжлийн хяналтын ерөнхий газраас мэдээлэл хийлээ.

МХЕГ-ын Барилгын техникийн хяналтын улсын ахлах байцаагч Г.Эрдэнэхүү “Хан-Уул дүүргийн 18 дугаар хорооны нутаг дэвсгэрт байрлах “Номин реалтор” компанийн захиалгатай барилгын талбай дээр гурван өргөх төхөөрөмж байрлан ажиллаж байсан. БНХАУ-д үйлдвэрлэгдсэн хоёр авто кран, нэг цамхагт кран байснаас тухайн үед цамхагт кран ажил гүйцэтгээгүй байсан. Харин осол гаргасан авто кран нь 50 тоннын даацтай байсан. Ослын үед хоёр хүний амь нас хохирч, нэг хүн өндрөөс унаж гэмтсэн. Авто краныг ашиглахдаа зориулалтын зам талбайг засаж ашиглах ёстой. Зам, талбайгаа дүрмийн дагуу бэлдээгүй, хазгай тэгш бус гадаргуу дээр краныг байрлуулж ажиллаж байх явцад тухайн осол болжээ. Осол гарсан кран хувь хүний эзэмшлийнх. Хэргийг цагдаагийн байгууллага шалгаж байна” гэлээ.

МХЕГ-ын Дэд бүтцийн хяналтын газрын дарга Д.Жаргал “Цар тахал гарсантай холбоотойгоор төлөвлөгөөт хяналт, шалгалт хоёр жил зогссон. Энэ жил өвчлөл намдаж, нөхцөл байдал сайжирч байгаатай холбоотойгоор хоёр сард барилгын ажил эхлэхээс өмнө урьдчилан сэргийлэх арга хэмжээнүүдийг зохион байгуулсан. Дөрөвдүгээр сарын 10-аас зургаадугаар сарын 10-ны хооронд баригдаж эхэлж байгаа барилгуудад, мөн ашиглагдаж байгаа эрсдэлтэй барилгуудад улсын ерөнхий байцаагчийн удирдамжийг хүрээнд шалгалт хийж, дүнгээ нэгтгэлээ. Эрсдэл өндөртэй объектуудыг түүвэрлэх байдлаар шалгасан. 2100 гаруй барилгад шалгалт хийхэд 10 гаруй хувь нь зөвшөөрөлгүйгээр барилгын ажил эхэлж байна. Улаанбаатар хотод 54 барилга ийм асуудалтай байна. Тухайн барилгуудтай холбоотойгоор эрх бүхий албан тушаалтны тогтоол шийдвэр гаргуулах, зөрчлийн хэрэг нээж, үйл ажиллагааг зогсоох зэрэг арга хэмжээ авсан”.

МХЕГ-ын Хөдөлмөр нийгмийн хамгааллын хяналтын газрын дарга Б.Батзориг “Хөдөлмөрийн хяналтын улсын байцаагч нарын зүгээс барилгын салбарынханд хөдөлмөрийн аюулгүй ажиллагааг ханган ажиллуулах талаар тодорхой ажлыг зохион байгуулан ажиллаж байгаа. Барилгын салбарт урьдчилан сэргийлэх, хяналт шалгалт хийх гэсэн удирдамжийн дагуу хяналт шалгалт хийж буй. Осол болсон барилгад Хан-Уул дүүргийн Хөдөлмөрийн хяналтын улсын байцаагч зургаадугаар сарын 7-нд урьдчилан сэргийлэх шалгалт хийсэн. Уг барилга дээр 18 зүйл, заалт бүхий мэдэгдэх хуудсыг хүргүүлж байсан. Тус мэдэгдэл хуудаст “…Зам тээвэр, барилга хот байгуулалтын сайдын 2010 оны тушаалаар батлагдсан ачаа өргөх краныг төхөөрөмжлөх, аюулгүй ашиглах дүрэм, мөн барилгын өргүүрийг төхөөрөмжлөх, аюулгүй ашиглах дүрмийн дагуу өргөх, зөөх механизмд техникийн магадлагаа хийлгэж, краны бүрэн бүтэн байдал, хариуцлагч, оосорлогч, кранист, аюулгүй ажиллагаа хариуцагчаар мэргэжлийн хүмүүсийг ажиллуулах, ачаа шилжүүлэх үеийн аюулгүй ажиллагааг ханган ажиллахыг” дурдаж, хөдөлмөрийн аюулгүй байдлыг хангахыг сануулсан байна” гэв.

Улсын хэмжээнд өнөөдөр эхэлсэн ЭЕШ-ын явцыг Боловсролын үнэлгээний төвийн захирал Л.Ганбат танилцууллаа.

2022 оны ЭЕШ энэ сарын 23-26-нд улсын хэмжээнд нийт 49 шалгалтын төвд зохион байгуулж байна. Энэ жил 36253 шалгуулагч бүртгүүлсэн бөгөөд энэ оны төгсөгч 29093 буюу 80 хувийг эзэлж байгаа бол өмнөх оны төгсөгч 7160 байна.

Шалгуулагчид шалгалтад дараах 4 бичиг баримттай ирнэ. Үүнд:

• Иргэний үнэмлэх
• Бүрэн дунд боловсролын гэрчилгээ
• Бүртгэлийн хуудас
• Суудлын хуваарь зэрэг юм.

Шалгалт бүрийн дараа засалтын шилэн технологийг ашиглан дүн оноог шууд гаргаж, шалгуулагчид дүнгээ мэдэх юм. Харин 24 цагийн дотор улсын хэмжээн дэх хэмжээст онооны жагсаалтыг гарган зарлана.

Энэ жил ЭЕШ-ыг хоёр удаа авч буйгаараа онцлог. Хоёр дахь удаагийн шалгалтыг 2022 оны 12 дугаар сард авахаар төлөвлөж байна. Харин монгол хэлний шалгалтыг 11 дүгээр сард авахаар төлөвлөөд байгаа юм. Хоёр удаагийн ЭЕШ-д өмнөх оны төгсөгчид болон дүн оноогоо ахиулах зорилготой шалгуулагчид оролцох боломжтой. ЭЕШ-ыг жилд хоёр удаа авч байгаатай холбоотойгоор их, дээд сургуулиуд мөн хоёр удаа оюутан элсүүлэх журамд шилжих юм.

БШУ-ы сайдын тушаалаар “Олон улсын шалгалтын үнэлгээг Монгол Улсын ЭЕШ-ын үнэлгээтэй дүйцүүлэн тооцох тухай” журам батлагдсан. Олон улсад нийтлэг хүлээн зөвшөөрөгддөг Кембриджийн IGCSE, AS, A, O түвшний хөтөлбөр болон IB, AР хөтөлбөрийн үнэлгээг дүйцүүлэх боломжтой.

Дархан-Уул аймгийн Хонгор сумын нутагт орших Гавилвуу уулын ар бэлд Сяньбигийн хаад язгууртны бунхант булш олджээ.

Судалгааг Улаанбаатарын Их Сургуулийн Археологийн тэнхимийн Профессорын хоёрдугаар багийн ахлагч, доктор Т.Идэрхангайгаар ахлуулсан судалгааны баг малтан судалж байгаа аж.

Өчигдөр буюу 2022 оны зургаадугаар сарын 22-ны өдөр аймгийн ИТХ-ын дарга С.Насанбат, аймгийн Засаг дарга Б.Азжаргал болон холбогдох албаны төлөөлөл Бунхант булшны олдворуудтай танилцаж цаашид хэрхэн судалгааг хийхдээ аюулгүй байдлаа ханган үргэлжлүүлэх талаар санал солилцож холбогдох шийдвэрийг гаргасан юм.

Тус дурсгалт газар нь Монголын түүхэнд маш бага судлагдсан ховор олдвор ажээ. Сяньбигийн үеийн хаад язгууртнууд хамгийн том хэмжээтэй бунхант булшнуудтайгаараа онцлог.

Малтлагын ажил энэ сарын 6-нд эхэлсэн бөгөөд өнөөдрийн байдлаар дуусах шатандаа буюу бунхныг судлах ажил хийгдэж байна.

Одоогийн байдлаар олдсон олдвороос дурдвал, бунхны хаалганы дотор талаас нэг бүтэн тарвага, хоёр араатан амьтан, нэг бугын толгой, хүний эрүү, төмөр эдлэл, хүрэл тогооны хэлтэрхий илрээд байгаа талаар судалгааны баг мэдээлэв.

Мөн Соёлын өвийн үндэсний төвийн сэргээн засварлах газрын дарга доктор М.Оюунтулга олдворуудын хадгалалт, хамгаалалтын талаас зөвлөхөөр ажиллаж байгаа ажээ.

Ташрамд дурдахад Монголын түүхэнд Сяньбигийн хаад язгууртны бунхант булш ингэж олдсон тохиолдол өнөөдрийн байдлаар гараагүй гэдгийг судалгааны багийнхан хэлж буй.

Судалгааны багт Улаанбаатар их сургуулийн Түүх археологийн ангийн 1, 2 дугаар курсийн оюутнууд багтаж байгаа гэж Дархан-Уул аймгийн Засаг даргын тамгын газраас мэдээллээ.