Month: June 2022

Нийслэлийн Засаг даргын Тамгын газар, “Тоёота Сэйлс Монголиа” ХХК болон “Монгол Контент” ХХК-ийн төлөөллүүд хамтран ажиллах санамж бичигт гарын үсэг зурлаа.

Талууд Үндэсний их баяр наадмын түншээр ажиллах, эрүүл мэндийн салбарын тусламж үйлчилгээний хүртээмжийг сайжруулах, зам тээврийн ослоос урьдчилан сэргийлэх чиглэлээр хамтран ажиллана.

“Тоёота Сэйлс Монголиа” ХХК нь нийгмийн хариуцлагын хүрээнд 2013 оноос Үндэсний их баяр наадмын түншээр ажиллаж, түрүү бөхийн бай шагнал, тусламжийн ажлуудыг хүмүүнлэг болон улс нийгэмд тустай, шаардлагатай хэсэгт чиглүүлсээр ирсэн.

Тухайлбал, өнгөрсөн жил түрүү бөхийн нэрэмжит TOYOTA HIACE машиныг Эх хүүхдийн эрүүл мэндийн үндэсний төвд бэлэглэсэн. Хүнд хэцүү цар тахлын үед эх, хүүхдийн эрүүл мэндийг хамгаалахаар ажиллаж буй эмч, эмнэлгийн ажилтнуудад уг автомашин хэрэг болно хэмээн үзэж дээрх шийдвэрийг гаргаж байв.

“Тоёота Мотор Корпорац” нь Тогтвортой хөгжлийн зорилтуудыг хангахад хувь нэмрээ оруулахаар ажилладаг бөгөөд үүний гурав дахь үзүүлэлт болох эрүүл мэндийг дэмжих зорилгод үндэслэн ийн шийдвэрлэжээ.

Тодруулбал, эрүүл мэндийг дэмжих тэр дундаа эх хүүхдийн эндэгдлийг бууруулах, хөгжиж буй орнуудын эрүүл мэндийн салбарын тусламж үйлчилгээний хүртээмжийг сайжруулах, замын хөдөлгөөний ослын улмаас нас барсан, гэмтэж бэртсэн хүний тоог бууруулах зэрэг зорилтуудад тулгуурлан улсын хэмжээнд үйлчилгээ үзүүлдэг тус эмнэлгийг сонгожээ.

Энэ талаар Нийслэлийн Засаг даргын орлогч Ж.Сандагсүрэн “Наадмын зохион байгуулалтын ажилд Нийслэлийн Засаг даргын Тамгын газар голлох үүрэгтэй. Үндэсний их баяр наадмын түрүү бөхийн нэрэмжит шагналыг нийгмийн хариуцлагын хүрээнд олгодог Тоёота брэндийг нийгэмд сурталчлах, хамтрах боломжтойг иргэдэд таниулах нь биднээс өгч буй дэмжлэг юм. Тоёота Сэйлс Монголиа нийгмийн хариуцлагаа хүлээж энэ жил ЭХЭМҮТ-ийг тохижуулахаар болж байна. Монгол түмний баяр наадмыг хүндэтгэж түншээр оролцож байгаад баяртай байна. Дараагийн ажлуудаа илүү хүртээмжтэй, өргөн цар хүрээтэй зохиоход хамтарна” гэлээ.

“Тоёота Мотор Корпорац” нь дэлхийн олон улсад тогтвортой хөгжлийн зорилтуудыг хэрэгжүүлж буй. Энэ урт хугацааны зорилтоор дамжуулан монголчуудын нийгэм, эрүүл мэндэд чиглэсэн ажлуудыг хийх бодолтой байна. Монголчуудын аз жаргалыг нэмэгдүүлэх ажилд хувь нэмэр оруулж байгаадаа баяртай байна. Хэн бүхэн аюулгүй, аз жаргалтай байгаасай” хэмээв.

Монгол Контент ХХК-ийн гүйцэтгэх захирал Э.Чинзориг “Тоёота Сэйлс Монголиа” компаниас хэрэгжүүлж буй ажлуудыг зохион байгуулах, олон нийтэд түгээх албан ёсны агентлагаар “Монгол Контент” ХХК ажиллаж байна. Баяр наадмын бай шагнал, тусламжийн ажлуудыг зохион байгуулахаас гадна зам тээврийн ослоос урьдчилан сэргийлэх нөлөөллийн ажлуудыг хийж байна.

42 мянган хүн хэвтэн эмчлүүлдэг, 215 мянган хүн амбулаторийн үйлчилгээ авч, 12 мянган эх амаржиж, 15 мянган мэс засал хийдэг хамгийн их ачаалалтай ажилладаг ЭХЭМҮТ-ийг олон улсын стандартад нийцүүлэн тохижуулах ТЭЗҮ-г бэлэн болгоод байна” гэв.

2022 оны эхний хагас жилийн мэргэшсэн нягтлан бодогчийн эрх олгох шалгалтаар 114 шалгуулагч Монголын мэргэшсэн нягтлан бодогчийн эрхийг шинээр авч, мэргэжлийн ёс зүйг дээдэлж ажиллахаа батлан тангараг өргөлөө.

Мэргэшсэн нягтлан бодогч нь мэргэжлийн ур чадвартай, өндөр ёс зүйтэй, ахисан түвшний мэдлэг бүхий нягтлан бодох бүртгэл, санхүүгийн зөвлөх бөгөөд мэргэшсэн нягтлан бодогчийн эрэлт хэрэгцээ нийгэмд улам нэмэгдсээр байна.

“Мэргэшсэн нягтлан бодогч” болсноор нягтлан бодогч, санхүүчид Монголын төдийгүй олон улсын мэргэжлийн байгууллагад элсэж, нэр хүндээ өсгөх, сурч хөгжих, удирдах албан тушаал эрхлэх, үнэ цэнээ нэмэгдүүлэх зэрэг боломжтой.

Монголын мэргэшсэн нягтлан бодогчдын институт /ММНБИ/ нь Дэлхийн Нягтлан Бодогчдын Холбооны жинхэнэ гишүүн, Ази Номхон Далайн Нягтлан Бодогчдын Холбооны гишүүн, Ази, номхон далайн стандарт тогтоогчдын бүлгийн гишүүн бөгөөд Монгол улсын 21 аймаг, нийслэл дүүрэгт нийт 30 салбартай, 5000 гаруй гишүүн, 150 хараат бус аудитын компанийг эгнээндээ нэгтгэсэн мэргэжлийн байгууллага юм.

Тус институт мэргэшсэн нягтлан бодогчийн эрхийг олгохоос гадна төр, хувийн хэвшил, олон улсын байгууллагуудтай нягт хамтран ажиллаж цар хүрээг өргөжүүлэх, хууль, тогтоомжийг хэрэгжүүлэх, мэргэжилтнүүдийг чадавхжуулах, арга зүйн удирдлагаар хангах, ёс зүйг мөрдүүлэхээс гадна мэргэжлийн хөтөлбөрүүдийг хэрэгжүүлдэг.

ММНБИ нь мэргэшсэн нягтлан бодогч бэлтгэх хөтөлбөрийн 6 дахь удаагийн шинэчлэлийг хийж, удахгүй хэрэгжүүлэхээр төлөвлөж байна. Энэхүү хөтөлбөр нь нийгэм, цаг үе, олон улсын хөгжлийн чиг хандлагыг дагаад мэргэшсэн нягтлан бодогчид байвал зохих мэргэжлийн чадамжийн хүрээг тодорхойлсны үндсэн дээр боловсруулагдсанаараа давуу талтай.

Улсын баяр наадмын бэлтгэл ажил үргэлжилж, бөхчүүд, харваачид, уяачид бэлтгэлээ базааж байна. Тухайлбал “Найман шарга” амралтын газарт Алдар спорт хороо, Зэвсэгт хүчний нэгтгэл, ангиудаас баяр наадамд оролцох бөхчүүд, сурчид, шагайн харваачид бэлтгэлээ хийж байгаа аж.

Үүнтэй холбоотойгоор хурдан морь унаач хүүхдүүд гэмтэх тохиолдол нэмэгдэж байгаа бөгөөд хоёр хоногийн хугацаанд гэхэд хоёр хүүхэд мориноос унаж, гэмтэн, эмнэлэгт ухаангүй эмчлүүлж байна.

Тодруулбал, энэ сарын 28-ны өдөр Сүхбаатар аймгийн Асгат сумын эмнэлэгт 9 настай хүү ухаангүй хүргэгдэж очсон байна. Хүү тус багийн Жаргалант багт хурдан морь тарлаж байгаад мориноосоо унаж, гэмтжээ.Мөн тус өдөр Төв аймгийн Аргалант суманд хурдан морины үсэргээний үеэр 9 настай унаач хүү унаж гэмтэн, Гэмтэл, согог судлалын үндэсний төвд хүргэгдэн, эмчлүүлж байгаа аж. Хүүхдүүд одоогоор ухаангүй байгаа аж.

Улсын хэмжээнд 2022 оны зургаадугаар сарын 27-ны байдлаар нийт 140,575 тонн шатахууны нөөцтэй байна.

Үүнд:

• А-80 авто бензин 9,773 тонн буюу 59 хоног
• АИ-92 авто бензин 53,945 тонн буюу 40 хоног
• АИ-95 авто бензин 5,636 тонн буюу 42 хоног
• ДТ 68,505 тонн буюу 25 хоног
• Онгоцны түлшний 37 хоногийн буюу хэвийн нөөцтэй байна хэмээн УУХҮЯ-наас мэдээллээ.

Харин Улаанбаатар хотын хэмжээнд нийт 65,595 тонн шатахууны үлдэгдэлтэй байна.

Тодруулбал А-80 автобензин 2,520 тонн, АИ-92 автобензин 28,466 тонн, АИ-95 авто бензин 4,047 тонн, ДТ 27,960 тонн байгаа бөгөөд АИ-92 авто бензиний 30, АИ-95 авто бензиний 55, ДТ-ний 25 хоногийн буюу нөөц хэвийн гэв.

“Бүх нийтийн англи хэлний суралцахуйг дэмжих арга хэмжээ”-ний хүрээнд ерөнхий боловсролын сургуулийн англи хэлний багшийн хэрэгцээг тодорхойлох, оношлох, үнэлэх судалгааг цахимаар зохион байгууллаа.

Судалгаанд англи хэлний 2,286 багш буюу нийт багш нарын 76.2 хувь нь хамрагдсан байна.

2022-2023 онд ерөнхий боловсролын сургуулийн англи хэлний багш нарын 45 хувийг В2 түвшинд хүргэх, ТКТ, CELTA зэрэг олон улсад хүлээн зөвшөөрөгдсөн шалгалтуудыг нэвтрүүлж мэргэжлийн ур чадвараа үнэлүүлэх системтэй болох, суралцагсдын англи хэлний түвшинг ахиулах, мэргэшсэн сургагч багш нарын бүлэг бүхий англи хэлний сургалтын танхим байгуулахаар ажиллаж байна гэж Боловсрол, Шинжлэх Ухааны Яамнаас мэдээлэв.