Month: March 2022

Ховд аймгийн Хүнс, хөдөө аж ахуйн газраас ирүүлсэн мэдээгээр мал төллөлт 61.7 хувьтай үргэлжилж байна.

Тодруулбал, аймгийн хэмжээнд төллөвөл зохих 1 сая 477 мянга 163 толгой мал байгаагаас одоогоор 911731 толгой хээлтэгч төллөсөн байна.

Улмаар 912258 төл мал гарчээ. Үүнээс 9955 төл хорогдсон. Одоо 902303 төл бойжиж байгаа буюу төл бойжилт дунджаар 99 хувьтай байна.

Мөн судалгаагаар 8797 толгой мал хээл хаяжээ.

Нийт сумдад бог, бод мал төллөж байна. Мөн тарга тэвээрэг муутай малд өвс, нэмэгдэл тэжээл өгөх, хаваржилтын бусад ажил үргэлжлэн явж байна.

Өнгөрсөн 10 хоногт цаг агаарын нөхцөл хүчтэй салхи шуурга ихтэй. Уулын бүсийн сумдад салхи шуурга ихтэй байснаас төл мал даарч бээрэх зэрэг таагүй нөлөө ажиглагджээ.

ОХУ-ын Засгийн газар 2022 оны гуравдугаар сарын 29-ний өдөр тогтоол баталж Монгол-Оросын хилийн бүх боомтоор иргэдийн харилцан зорчих хөдөлгөөнийг нээсэн тухай Монгол Улсын ГХЯ-наас өчигдөр мэдээлсэн. Уг мэдээлэлд ОХУ-аас Монгол Улсад суугаа Элчин сайдын яамнаас 3 дугаар сарын 30-ны өдрийн 11.00 цагт ноот бичгээр мэдэгдсэн тул өчигдрийн 12:00 цагаас эхэлж, хоёр улсын авто замын бүх боомтоор иргэд харилцан зорчих боломжтой бөгөөд ОХУ-д зорчих Монгол Улсын иргэд 48 цагийн дотор хийлгэсэн PCR шинжилгээний хариутай тохиолдолд улсын хилээр саадгүй нэвтрэх талаар дурдсан байв.

Бид иргэдийн зорчих хөдөлгөөний талаар Засгийн газрын тохируулагч агентлаг Хил хамгаалах ерөнхий газрын Хэвлэл мэдээлэл, олон нийттэй харилцах албаны дарга Д.Энхтайванаас тодруулахад ”Өчигдөр буюу гуравдугаар сарын 30-ны 12.00 цагт Монгол-Оросын хилийн бүх боомтоор иргэд харилцан зорчих хөдөлгөөнийг нээсэн. Иргэдийн зорчих хөдөлгөөн хэвийн үргэлжилж байна. Энэ хугацаанд ОХУ-аас 54 иргэн, Монголоос 88 нийт 142 иргэн хоёр улсын хилээр нэвтэрчээ. Хоёр улсын хооронд ачаа тээвэр хэвийн үргэлжилж байна” гэж мэдээллээ.

Энд сонирхуулахад ОХУ-ын Засгийн газраас 2020 оны арванхоёрдугаар сард иргэдийн зорчих хөдөлгөөнийг хязгаарласан тогтоол гаргасан . Тус тогтоолд хилээр долоон төрлийн иргэдийг нэвтрүүлэхээр тусгасан юм. Үүнд,

• Эрүүл мэндийн тусламж үйлчилгээ авах. Өөрөөр хэлбэл ОХУ-д эмчлүүлэх шаардлагатай иргэд. Ингэхдээ ОХУ-ын эмнэлгээс албан бичиг ирүүлнэ.
• Дипломат төлөөлөгч
• ОХУ-д суралцдаг эсвэл ажлын визтэй иргэн зэрэг хүндэтгэн үзэх шалтгаантай иргэд багтаж байв.

МөнСэлэнгэ аймгийн нэгдсэн эмнэлэгт PCR шинжилгээг 85000 төгрөгөөр хийж байна.

Соёлын яамнаас соёл, урлагийг хөгжүүлэх, сурталчлан таниулах, соёлын өвийг бүртгэх, судлах, хадгалан хамгаалах, сэргээн засварлах, түгээн дэлгэрүүлэх зорилгоор Соёл, урлагийг дэмжих сангаас 2022 онд санхүүжүүлэх төслийн сонгон шалгаруулалтыг зарлалаа.

Төсөл, арга хэмжээний төрөл:

–Хүүхдэд уран сайхан, гоо зүйн мэдлэг олгох уран бүтээл туурвих, соёл, урлагийн арга хэмжээ зохион байгуулах төсөл, арга хэмжээ;

–Соёлын өвийг хадгалж хамгаалах, сурталчлах, мэдээллийн нэгдсэн сан байгуулж, баяжуулах төсөл арга хэмжээ;

–Урлаг, утга зохиолын шинэ уран бүтээл туурвих, нийтийн хүртээл болгох төсөл, хөтөлбөрийг хэрэгжүүлэх төсөл, арга хэмжээ;

–Төсвийн хөрөнгөөр бүтээх үндэсний уламжлалт болон сонгодог урлагийн бүтээл туурвих төсөл, арга хэмжээ;

–Соёлын өв, үндэсний соёл, урлагийг гадаадад болон өөрийн оронд сурталчилсан дуу авианы бичлэг хийх, ном хэвлүүлэх, соёл, урлагийн мэргэжлийн сонин, сэтгүүл гаргахад дэмжлэг үзүүлэх төсөл, арга хэмжээ;

–Соёл, урлагийн тоглолт хийх, түүх, соёлын дурсгалт зүйл, уран бүтээлийн үзэсгэлэнг гадаадад болон өөрийн оронд зохион байгуулах төсөл, арга хэмжээ;

–Монгол судлаачийг бэлтгэх, монгол судлаач, эрдэмтний шилдэг бүтээлийг шалгаруулж, хэвлүүлэх, сурталчлахад санхүүгийн дэмжлэг үзүүлэх төсөл, арга хэмжээ.

Төслийн санхүүжилтийн хувь хэмжээ:

Хувь хүнд олгох төслийн санхүүжилтийн дээд хязгаар 30,000,000.0 төгрөг байна.

Хуулийн этгээдэд олгох төслийн санхүүжилтийн дээд хязгаар 80,000,000.0 төгрөг байна.

Сангийн нийт санхүүжилтийн 50 хувийг хүүхдийн уран бүтээлийг дэмжих төсөл, арга хэмжээнд олгоно.

Төслийн баримт бичигт тавих шаардлага:

1. Төрөөс соёлын талаар баримтлах бодлого, холбогдох хууль тогтоомжид нийцсэн байх

2. Төслийн хүрээнд хэрэгжүүлэх үйл ажиллагаа, цар хүрээ, ач холбогдол, урьдчилсан үр дүнгийн төсөөллийг гаргасан байх

3. Төсөл, арга хэмжээг хэрэгжүүлэх туршлагатай байх

4. Төсөл, арга хэмжээг хэрэгжүүлэх ажлын болон санхүүгийн төлөвлөгөө, тооцоолол хийсэн байх

5. Өмнө нь сангаас санхүүжилт авч байсан бол гэрээний биелэлт, үр дүнгийн талаарх тайланг хавсаргасан байх

6. Төсөл, арга хэмжээг хэрэгжүүлэгч нь банк санхүүгийн байгууллагад хугацаа хэтэрсэн зээлийн үлдэгдэл төлбөргүй байх

7. Төслийн санал гаргагч зөвхөн нэг төсөл хэрэгжүүлэх хүсэлт ирүүлэх.

Хамрагдах боломжгүй төсөл:

-Тоног төхөөрөмж, тавилга хэрэгсэл худалдан авалт хийх төсөл

-Бүтээлийн хувьд Зохиогчийн эрхийн зөрчилтэй болон маргаан бүхий төсөл

-Соёл, урлагийн сангаас өмнө нь дэмжлэг авч байсан төсөл

Төсөл үргэлжлэх хугацаа: Гэрээ хүчин төгөлдөр болсон өдрөөс дараагийн санхүүгийн жил эхлэх хүртэл байна.

Төслийг цахимаар хүлээн авах хугацаа:
Дуусах: 2022 оны 4 дүгээр сарын 29-ний өдрийн 17.30 цаг

Төслийг хүлээн авах хаяг:

Төсөлд тавигдах нөхцөл, шаардлагыг бүрэн хангасан, сонгон шалгаруулалтад оролцох төслийн саналыг 2022 оны 4 дүгээр сарын 11-ний өдрийн 08.30 цагаас http://suds.ictgroup.mn/ цахим хаягаар бүртгэнэ.

Хятадад сүүлийн үед коронавирусийн халдвар нэмэгдэж байгаагийн улмаас олон хотод хөл хорио тавьж, хязгаарлалтын арга хэмжээг чангатгаж эхэлсэн. Эдгээр хотуудын нэг нь Шанхай бөгөөд энэ хотод хатуу хөл хорио тавьж, бүх оршин суугчийг шинжилгээнд хамруулахаар болсон юм.

Улмаар Шанхайн томоохон үзэсгэлэнгүүд болох Shanghai World Expo Exhibition & Convention Centre (SWEECC) болон Shanghai New International Expo Centre (SNIEC) -ийг халдвар авсан хүмүүсийг түр байршуулахаар өөрчлөн тохижуулсан байна. Энэ хоёр төв нийтдээ 20 мянган өвчтөнийг хүлээн авах боломжтой аж.

Түүнчлэн ийнхүү өөрчлөн тохижуулсан төвүүд рүү шинж тэмдэггүй өвчтөнүүд болон биеийн байдал хөнгөн байгаа өвчтөнүүдийг илгээхээр төлөвлөж байгаа аж. Шанхай хотод халдварын тохиолдол эрс нэмэгдэж болзошгүй байгаатай холбогдуулан ийнхүү өвчтөнүүдийг байршуулах газруудыг бэлдэж эхэлжээ.

Өнөөдөр буюу 2022 оны гуравдугаар сарын 31-нд Баянзүрх дүүргийн 10 дугаар хорооны нутаг дэвсгэрт дунд ангийн 12 настай сурагч амиа алдсан хэрэг гарчээ.

Тодруулбал, 11.00 цагийн орчимд тус дүүрэгт байрлах Амгалан захын урд замд 7 дугаар ангийн хүүхэд экскаваторт дайруулж газар дээрээ нас барсан байна.

Цагдаагийн байгууллага тус ослын шалтгаан нөхцлийг тодруулахаар мөрдөн шалгах ажиллагааг үргэлжлүүлж байгаа аж.

Амьтны тухай хуульд заасны дагуу жил бүрийн дөрөвдүгээр сарын 1-нээс зургадугаар сарын 15-ны өдрийг хүртэл загас агнах, барихыг хориглодог. Учир нь энэ үеэр загасны үржлийн эд оргил үе байдаг. Энэ хоёр сарын хугацаанд загас нь 20 дахин үрждэг. Загасны үржлийн үед агнаж баривал тухайн төрөл зүйл устах аюултай юм. Хориотой үед загас агнавал нөхөн төлбөр буюу торгууль төлнө.