Month: June 2021

Багануур дүүргийн ЗДТГ-ын хамт олон Нийслэлийн Шинжлэх ухаан, үйлдвэрлэл, инновацын газрын дэргэдэх Гарааны бизнесийг дэмжих төвийн үйл ажиллагаатай танилцаж, туршлага судаллаа. Учир нь 2022 онд Багануур дүүрэг залуусынхаа гарааны бизнесийг дэмжих төвтэй болох юм.

Энэ үеэр Нийслэлийн Шинжлэх ухаан, үйлдвэрлэл, инновацын газрын дарга Л.Тулгабаатар тэднийг хүлээн авч уулзан, хамтран ажиллах, бодлогын дэмжлэг үзүүлэхээ илэрхийллээ. Уулзалтад Багануур дүүргийн Засаг даргын орлогч Б.Балжинням, Хөдөлмөр халамжийн үйлчилгээний хэлтсийн дарга Д.Одмандах тэргүүтэй таван хүн оролцсон юм.

БНХАУ-тай залгаа хилийн боомтууд дээр саатал үүссэнийг далимдуулж ачаа тээврийн үйлчилгээ үзүүлдэг иргэн, ААН-үүд хөлсөө нэмсэн.

Тэгвэл уг асуудал дээр ШӨХТГ-аас шалгалт хийсэн байна. Улмаар гуравдугаар сарын 31-нээс дөрөвдүгээр сарын 19-ны хооронд үнэ хөөрөгдөн тээвэр хийсэн есөн иргэн, нэг ААН-ийг зөрчлийн хэрэг нээжээ. Ийн 38 сая төгрөгөөр торгож, хууль бусаар олсон 243 сая төгрөгийг хураахаар болсон талаар тус газрын дарга Б.Бат-Эрдэнэ мэдээлжээ.

Монгол, Хятадын соёлын солилцооны “Яруу алдрын 100 жил” арга хэмжээний нээлт боллоо. Хятадын коммунист нам байгуулагдсаны 100 жилийн ойн хүрээнд тус арга хэмжээг зохион байгуулж байгаа аж.

Энэ хүрээнд Монголын ард түмний Хятад Улсын болон тус намын тухай ойлголтыг нэмэгдүүлэх, хоёр орны найрамдалт харилцааг бэхжүүлэх, зорилгоор, Хятадын Төрийн зөвлөлийн Хэвлэл мэдээллийн алба, Монгол улсын Соёлын яам, БНХАУ-аас Монгол улсад суугаа Элчин сайдын яам, БНХАУ-ын ӨМӨЗО-ны Ардын засгийн газар, Монголын Сэтгүүлчдийн Нэгдсэн Эвлэл хамтран зохион байгуулж, ӨМӨЗО-ны Ардын засгийн газрын Хэвлэл мэдээллийн алба, Улаанбаатар дахь Хятадын Соёлын төв зэрэг байгууллага хамтран ажиллаж байна.

Соёлын солилцооны урлагийн тоглолт, төрөл бүрийн үзэсгэлэн, уран сайхны кино, ном, бүтээлийн солилцоо зэрэг арга хэмжээг цахимаар зохион байгуулахаар болсон байна. Тодруулбал, Тус арга хэмжээ нь ирэх сарын 1-нээс есдүгээр сар хүртэл мэдээллийн сайтуудаар хүргэнэ. Энэхүү арга хэмжээг цахимаар Хятадын Төвийн радио телевизийн CRI сайт /www.cri.cn/, Солонго мэдээллийн сайт www.solongonews.mn, Улаанбаатар дахь Хятадын соёлын төвийн албан ёсны сайт ccchinaweb-ub.org зэрэг сайтуудад тусгай булан нээж, арга хэмжээг бүх талаар дамжуулж мэдээлэх аж.

Зам тээврийн ослын улмаас нэг иргэн амь насаа алдсан харамсалтай хэрэг гарлаа.

Өнөөдөр буюу зургадугаар сарын 30-ны оройн 18:40 минутын орчимд уг осол гарсан байна. Урьдчилсан байдлаар автобус мөргөсөн байх магадлалтай, гэхдээ шалгалтын ажиллагаа хийгдэж байгаа гэдгийг цагдаагийн байгууллагаас хэллээ.

Монгол оронд 28 багийн 193 овог 847 төрөлд хамаарах 14 мянга орчим зүйлийн шавж тэмдэглэгдсэн байдаг. Ойн хөнөөлт шавжийн хохирлыг утаагүй түймэр ч гэж нэрлэдэг.

Энэ оны зургадугаар сарын 7-12-ны өдрүүдэд Богдхан уулын дархан цаазат газрын ойн санд навч, шилмүүсний хөнөөлт шавжийн тархалтыг тогтоох тоймчилсон судалгааг Ойн судалгаа, хөгжлийн төвөөс хийсэн байна.Судалгаанд Богдхан уулын дархан цаазат газрын ойн сан бүхий Түргэн, Жаргалант, Нүхт, Арцат, Хүүш, Богино, Зайсан, Залаат, Хүрхэрээ, Харгана, Хүрэлтогоот, Бумбат, Төр хурах, Шажин хурах зэрэг газрыг хамруулжээ.Судалгаагаар Түргэн, Жаргалант, Хүүш, Залаат Бумбат, Төр хурах зэрэг газруудад навч, шилмүүсний зонхилох хөнөөлт шавжууд болох Якобсоны төөлүүрч эрвээхэй, Сибирийн хүр эрвээхэй зэрэг хөнөөлт шавжууд илэрчээ.

Ойн хөнөөлт шавжийн голомт үүсгэн хэт олшрох давтамжийг эрдэмтэд 10-12 жил гэж үздэг бөгөөд Якобсоны төөлүүрч эрвээхэйн хэт олшрол 2021-2022 онуудад үргэлжлэх нөхцөл байдал тогтоогдсон байна.

Ойн хөнөөлт шавжийн тоо хэвийн хэмжээндээ байх нь биологийн тэнцвэрт байдлыг хадгалах боловч хэт олшрох нь модыг доройтуулах сөрөг нөлөөлөл ихтэй учир байгальд сөрөг нөлөөлөл багатай аргаар хөнөөлийн голомтыг хязгаарлах арга хэмжээ авч эхэлжээ.

Ардын хувьсгалын 100 жилийн ой, Монгол Улс, ОХУдипломат харилцаа тогтоосны 100 жилийн ойг тохиолдуулан Соёлын яам санаачлан “Орос зохиолчдын бүтээл Монголын тайзнаа” сэдэвт гэрэл зургийн үзэсгэлэн Улаанбаатар дахь Оросын шинжлэх ухаан, соёлын төвд өнөөдөр нээлтээ хийлээ.

Өнгөрсөн зууны он жилүүдэд Монгол Улсад мэргэжлийн театр үүсгэн байгуулах, уран бүтээлчдийг бэлтгэх, сурган хүмүүжүүлэх үйлсэд анхнаас нь зөвлөлтийн сургагч-мэргэжилтэн багш нар оройлон зүтгэж, Орос-Зөвлөлтийн нэрт зохиолчдын сор болсон олон арван бүтээлийг монгол тайзнаа амилуулж байсан билээ.

1930 онд Монгол Улсад уригдан ирсэн театрын мэргэжилтэн багш А.А.Ефремов нь К.С.Станиславский жүжиглэхүйн ухааны сургалтыг Монголд нэвтрүүлж, мэргэжлийн театр байгуулахад хувь нэмэр олуулж байсан түүхтэй.

Түүхт 100 жилийн ойн хүрээнд зохион байгуулж буй уг үзэсгэлэнгийн хамтран зохион байгуулагчаар Монголын Гэрэл зурагчдын нэгдсэн холбоо (МГЗНХ), Улаанбаатар дахь Оросын шинжлэх ухаан, соёлын төв (РЦНК) ажиллаж байна.

Тус үзэсгэлэнд Улсын драмын эрдмийн театр, Улсын дуурь, бүжгийн эрдмийн театр, Монгол Улсын Хүүхэлдэйн театр, Монгол Улсын Консерватори, Монголын Театрын музей зэрэг соёл урлагийн байгууллагуудын архивын сан хөмрөгт хадгалагдаж буй 350 гаруй түүхэн ховор гэрэл зургийг дэлгэжээ.