Month: May 2021

Ардын хувьсгалын 100 жилийн ойн хүрээнд зохион байгуулагдах нэгдсэн арга хэмжээний зардалд 10 тэрбум төгрөг төсөвлөжээ. 10 тэрбум төгрөгийг зарцуулах тухай Соёлын сайд Ч.Номингийн баталсан тушаалд тусгасан томоохон дүнтэй ажлуудаас дурьдвал /төгрөгөөр/ :

• Үндэсний их баяр наадмын арга хэмжээнд 400 сая
• 21 аймгийн брэнджүүлэх ажил- 1 тэрбум
• Ардын хувьсгалын 100 жилийн ойн медаль захиалан хийлгэх 1 тэрбум
• Ардын хувьсгалын 100 жилийн ойд зориулсан дуу бүтээх- 100 сая
• Ардын хувьсгал 100 жил телевизийн контентийн уралдаан зарлаж, шилдэг бүтээлүүдийг шалгаруулах- 300 сая
• Үндэсний их баяр наадмын хөтөлбөрт цэргийн жагсаал зохион байгуулахад- 500 сая
• Ардын хувьсгалын түүхэнд холбогдох хөшөө, дурсгалуудыг сэргээх- 250 сая
• Тайзны бүрэн хэмжээний уран бүтээл хийх /УДЭТ-ын “Хаадын хаан” жүжиг/ – 200 сая
• Бүх ард түмний урлагийн их наадам- 500 сая
• Монгол Улс НҮБ-д элссэний 60 жилийн ойг тэмдэглэх арга хэмжээ- 100 сая төгрөг
• Бусад арга хэмжээ- 1.2 тэрбум гэх мэтээр 10 тэрбум төгрөгийн задаргааг гаргасан сайд Ч.Номингийн тушаал 2021 оны дөрөвдүгээр сарын 9-ний өдөр гарчээ.

Энэ жилийн баяр наадам, Ардын хувьсгалын 100 жилийн ойн арга хэмжээнд зориулсан төсвийг яагаад ийм өндөр дүнтэй баталсныг Соёлын яамнаас тодруулахад, Жил бүр Үндэсний их баяр наадмын төсөв баталдаг. Энэ жилийн тухайд Ардын хувьсгалын 100 жилийн тэгш ой тохиож байгаа учир түүх, соёлын дурсгалаа сэргээх, сурталчлах чиглэлээр олон ажил зохион байгуулахаар төлөвлөсөн. Шинэ Засгийн газрын бүтэц бүрэлдэхүүнд Соёлын яам байгуулагдсан учир 100 жилийн ойд зориулсан бүх арга хэмжээний төсвийг Соёлын яаманд төвлөрүүлсэн байна” гэж хариулав.

Үндэсний их баяр наадам зохион байгуулахад 2018-2020 онд дунджаар 3 тэрбум төгрөг зарцуулж байв.

Тулгар төрийн 2230, Их Монгол Улс байгуулагдсаны 815, Ардын хувьсгалын 100 жилийн ойн Үндэсний их баяр наадмын нээлтийн тоглолтын найруулагчаар дөрвөн уран бүтээлч хамтран ажиллахаар болсон.

• УДЭТ-ын ерөнхий найруулагч Н.Наранбаатар (2016, 2017, 2018 оны Eрөнхий найруулагчаар ажилласан)
• Үндэсний урлагийн их театрын найруулагч Г.Цоггэрэл (2019 оны Eрөнхий найруулагчаар ажилласан),
• Херо энтертэйнмэнтийн найруулагч Б.Баатар (2020 оны Eрөнхий найруулагчаар ажилласан) нээлтийн тоглолтыг найруулах юм.
• Харин Нийслийн соёл урлагийн газрын дарга Ж.Дамдинцэрэн долоодугаар сарын 11-ний орой Сүхбаатарын талбайд болох амьд тоглолтыг хариуцахаар болсон билээ.

Баянзүрх дүүрэгт таван айлын газар чөлөөлөөд 20 айлын дулаан алдагдалгүй эко орон сууц барьжээ.

Засгийн газраас Улаанбаатар хотын гэр хорооллын зургаан дэд төвүүдэд таван га бүхий 20 эко хорооллыг таван үе шаттайгаар хэрэгжүүлж байна.

Эко хорооллын төлөвлөлт нь 15 хувь халамжийн түрээсийн орон сууц, 55 хувь нь түрээслээд өмчлөх орлогод нийцсэн орон сууц, 30 хувь нь зах зээлийн үнээр борлуулагдах орон сууц байна.

Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газраас өнөөдөр/2021.05.31/ хэвлэлийн бага хурал зохион байгууллаа. Энэ удаагийн хэвлэлийн бага хурал нь “Нэгдүгээрт хүүхэд” үндэсний хөдөлгөөнийг орон даяар эхлүүлж байгааг танилцуулснаараа онцлог байв.

“Нэгдүгээр хүүхэд” үндэсний хөдөлгөөний танилцуулга мэдээллийг ГБХЗХГ-ын дарга Г.Батдорж хүргэж, төрийн болон хувийн хэвшил, бизнес, хэвлэл мэдээллийн байгууллагуудыг хөдөлгөөнд нэгдэхийг уриалаа.

Мөн хэвлэлийн бага хурлаар ГБХЗХГ-аас 2021 он гарснаас хойш хийж хэрэгжүүлсэн ажлын талаар ГБХЗХГ-ын Гэр бүл, хүүхэд хөгжил, хамгааллын газрын дарга Н.Өлзийхутаг танилцуулсан юм. Жил бүр өргөн дэлгэр тэмдэглэн өнгөрүүлдэг “Хүүхдийн баярыг” дэлхий нийтээр дэлгэрсэн Covid-19 цар тахлын үед цахим хэлбэрээр тэмдэглэн өнгөрүүлж, “Нэгдүгээрт хүүхэд” үндэсний хөдөлгөөнийг улс орон даяар өрнүүлж байгаагаараа онцлог болж байна.

Анх 1925 онд Швейцарь Улсын Женев хотноо чуулсан “Хүүхдийн сайн сайхны төлөө Дэлхийн улс орнуудын чуулга уулзалт”- аас уриалан, жил бүрийн зургадугаар сарын 1-ний өдрийг “Хүүхдийн эрхийн олон улсын өдөр” гэж зарласнаас хойш, эдүгээ 96 дахь удаагаа тэмдэглэж байна. Монгол Улс 1952 оны зургадугаар сарын 1-ний өдрөөс эхлэн энэ өдрийг “Хүүхдийн баяр” хэмээн бүх нийтээр тэмдэглэх болсноос хойш 69 дэх жилийг угтаж байна.

Татварын албанд оны эхний тайлант хугацаанд 261 мянган иргэн хувь хүний орлогын албан татварын тайланг ирүүлжээ. Үүнээс хувиараа хөдөлмөр эрхлэгч 93 мянган иргэн үйл ажиллагааны орлогоос 40.9 тэрбум төгрөгийн татвар төлсөн байна. Татвар төлөгчдийн дийлэнх нь ХАА-н үйлдвэрлэл, худалдаа, үйлчилгээ, урлаг соёлын салбарынхан байв.

Манай улсад Хувь хүний орлогын албан татварын тухай хуулийн дагуу орлогыг нь тухай бүр тодорхойлох боломжгүй иргэдээс жилд нэг удаа нийт орлогын цэвэр ашгийн 10 хувийг татварт суутган тооцдог. Нэг ёсондоо байгууллага, ААН-ээс гадна аливаа хэлбэрээр орлого олж буй хүн бүр улсад татвар төлөх үүрэг хүлээдэг.

Аймаг, сум, нийслэл, дүүргийн татварын алба тухайн нутаг дэвсгэрт үйл ажиллагаа явуулж хувиараа хөдөлмөр эрхэлж, цахим худалдаа явуулж буй болон зах, худалдааны төвд худалдаа хийж буй иргэдийн татварын байдлыг тандан судалж, тайлан бүртгэл болон мөн хөндлөнгийн байгууллага, этгээдийн мэдээллийг үндэслэн татварын тооцоог нийлж хийдэг байна. Хувь хүний орлогын албан татвар буюу хувиар хөдөлмөр эрхлэлт дотроо газар тариалан хувиараа эрхлэх, ном, сонин сэтгүүл эрхлэн гаргах зэргээр долоон төрөл байна.

Энхтайваны гүүрний заадасны таг хөдөлж зорчих хэсэг рүү орж тээврийн хэрэгслээр зорчигчдод аюул учраад байсныг Нийслэлийн автозамын хөгжлийн газраас шуурхай арга хэмжээ авч хэвийн болгосон байна.

Тээврийн хэрэгслийн жолооч та бүхэн аюулгүй байдлаа ханган, анхаарал, болгоомжтой, хөдөлгөөнд оролцоорой.

Ерөнхий сайд Л.Оюун-Эрдэнэ болон Баянзүрх дүүргээс сонгогдсон УИХ-ын гишүүд, Нийслэлийн Засаг дарга бөгөөд Улаанбаатар хотын Захирагч Д.Сумъяабазар нар тус дүүргийн гэр хорооллын дахин төлөвлөлтийн төслүүдтэй танилцлаа. Нийслэлийн Хот байгуулалтын асуудал хариуцсан төслүүдийн удирдагч Б.Сүхбаатар “2000 айлын орон сууц ашиглалтад оруулсан. Ирэх жил мөн 2000 айлын орон сууц ашиглалтад оруулахад бэлэн болоод байна” хэмээн ярьж, газар чөлөөлөлт сайн явааг танилцууллаа. Тэрбээр мөн “Орон сууцжуулах ажил удаашралтай байна гэж иргэд ярьдаг ч өмнө нь жилд 1500-2000 айлын орон сууц ашиглалтад ордог байсан бол сүүлийн хоёр жилд 3000-4000 айлын орон сууц ашиглалтад орж байгаа. Таван компанийн барилга хүнд байдалтай байна. 27 байршлын 84 хэсэгчилсэн талбайд төсөл хэрэгжихээс 17 байршлын 37 хэсэгчилсэн талбайд тендер зарласан, 32 талбайд орон сууцжуулах ажил үргэлжилж байна. Нийт 45 мянган айлын орон сууц барихаар төлөвлөснөөс 10473 айлын оройн сууц ашиглалтад орсон. Ирэх 2022 онд 4000 гаруй айлын орон сууц хүлээж авах хүлээлттэй байна” гэв.

Дахин төлөвлөлтийг хэрэгжүүлэхэд инженерийн шугам, сүлжээнээс гадна борлуулалтад анхаарал хандуулах хэрэгтэй байдаг. Сүүлийн үед Засгийн газар үүнд ихээхэн анхаарал хандуулснаар борлуулалт нэмэгджээ. Гүйцэтгэгч компанийнхан “Иргэдийн газрыг шууд орон сууцаар сольж, байранд оруулж байгаа. Анх төсөл хэрэгжихэд түрээсийн байранд байлгаж байгаад, байр ашиглалтад орохоор оруулдаг байсан. Гэхдээ иргэд хашаа байсан газраа орон сууцанд орох сонирхолтой байдаг” гэлээ.

Гэр хорооллын дахин төлөвлөлт Баянзүрх дүүрэгт хамгийн сайн хэрэгжиж байгаа гэнэ. Албаныхан дахин төлөвлөлтийг хийхэд Хот, суурин газрыг дахин хөгжүүлэх тухай хуульд нэмэлт өөрчлөлт оруулах шаардлагатай байгааг хэлж байлаа. Тухайлбал, барилгын компани газраа чөлөөлөөд явж байтал дунд нь ганц нэг айл газраа чөлөөлдөггүй. Миний өмч гээд тэр газраа барилга барих зөвшөөрөл авч, төлөвлөлтийг эвддэг. Хэрэв тухайн иргэн орон сууцжуулах төсөлд хамрагдахгүй бол хэрхэх вэ гэдгийг шийдэх хэрэгтэй гэнэ. Мөн зарим иргэн газар худалдан авч, газраа чөлөөлж өгдөггүй. Нийслэл дээр саналаа нэгтгэж, болохгүй байгаа зүйлсийг салбар яамдаа хүргүүлсэн аж.

Баянзүрх дүүргээс сонгогдсон гишүүд ч мөн 100 гаруй иргэн газраа чөлөөлье гэтэл хоёр иргэн газраа чөлөөлөхгүй гэдэг. Үүнээс болж компани ажлаа эхэлж чадахгүй, хүнд байдалд ордог. Газар чөлөөлөлтөд төсөв хүндрэлтэй байдаг. 960 хүүхдийн сургууль барья гэхэд газар чөлөөлөлтөд л нэг тэрбум төгрөг хэрэгтэй болдог. Гэтэл нийслэлийн төсөвт 1.5 тэрбум төгрөг төсөвлөдөг. Тэгэхээр сургууль, цэцэрлэгээ барьж чадахгүйд хүрээд байна гэдгийг ярьж байлаа.