Month: May 2021

Categories
гадаад мэдээ

Энэтхэгээс эх орондоо буцаж ирсэн Австраличуудыг 66 мянган доллараар торгох, эсвэл таван жил хорих ялаар шийтгэнэ


Австрали улсын засгийн газар цар тахлын гамшигт хүнд нэрвэгдсэн Энэтхэг улсаас эх орондоо буцаж ирэхийг оролдсон иргэдэд хатуу шийтгэл оноохоор болжээ.

Тус улс энэ долоо хоногийн эхээр Энэтхэгээс иргэдээ татаж авах тусгай үүргийн нислэг болон ердийн нислэгийг тавдугаар сарын дунд хүртэл зогсоох шийдвэр гаргасан юм. Ингэснээр Энэтхэгт байгаа Австралийн 9000 гаруй иргэн хүнд байдалд орсон байна. Тэдгээрийн 650 нь эрсдэлтэй бүлэгт багтаж байгаа ажээ.

Гэтэл Пүрэв гарагт Австралийн крикетийн хоёр тамирчин Катараар дамжин эх орондоо буцаж ирсэн нь засгийн газрынхаа хоригийг зөрчсөн хэрэг болсон байна. Тиймээс Даваа гарагаас эхлэн Австралийн засгийн газар Био Аюулгүй байдлын хуулийн хүрээнд онцгой арга хэмжээ авч, хилийн хоригоо улам чангатгахаар болсноо өчигдөр зарлажээ.

Тодруулбал Австралид ямар нэг замаар буцаж ирэхийг оролдсон хүн бүрт 66.000 австрали долларын торгууль оноох, эсвэл тав хүртэл жил шоронд хорих ял оноохоор болсон байна.

Хэрвээ улс орныхоо био аюулгүй байдалд ноцтой хохирол учруулсан гэж үзвэл дээрх хоёр шийтгэлийг давхар оногдуулахаар болжээ.

“Засгийн газарт энэ шийдвэрийг гаргахад хэцүү байлаа. Гэхдээ Австралийн ард иргэдийн эрүүл мэндийг хамгаалах, коронавирусийн цар тахлыг хяналтаасаа алдахгүй байхын тулд ингэх шаардлагатай юм” гэж тус улсын холбооны засгийн газрын эрүүл мэндийн сайд Грэг Хант өчигдөр орой мэдэгдсэн байна.

Хатуу хориг ирэх долоо хоногийн Даваа гарагаас эхлэн тавдугаар сарын 15-ны өдөр хүртэл үргэлжлэх ажээ.

Categories
мэдээ нийгэм цаг-үе

ГХЯ: ОХУ-ын Спутник V вакцины 20 мянган тунг хүлээн авлаа

Гадаад харилцааны сайд Б.Батцэцэг өнөөдөр 20 мянган тун Спутник вакцин хүлээн авч байгааг цахим хуудсаараа дамжуулан мэдээллээ.

Тэрбээр албан ёсны фэйсбүүк хаягаараа дамжуулан “Засгийн газрын холбогдох байгууллагууд вакцины татан авалтыг нэмэгдүүлэх чиглэлээр яриа хэлэлцээг үргэлжлүүлж, идэвхтэй ажилласаар байгаа. ОХУ-ын Спутник вакцины эхний ээлжийн 20 мянган тунг бид яг одоо хүлээн авч байна. Манай хувийн хэвшлийн зүгээс мөн 20 мянган тунг татан аваад байгаа. Веросел вакцины ээлжит 334.400 тунг өнөөдөр шөнө тээвэрлэн авчирна” хэмээн мэдээлжээ.

Спутник вакциныг тээвэрлэн ирж буй онгоц 19:00 цагийн орчимд МИАТ компанийн агаарын хөлгөөр Буянт-Ухаа олон улсын нисэх буудалд газардсан байна.

Categories
мэдээ соёл-урлаг

“Кардифф” дуурийн тэмцээнд манай улсаас Э.Анхбаяр оролцож байна

BBC” агентлагаас жил бүр тодруулдаг шилдэг дуурийн дуучин шалгаруулах “Cardiff singer of the world” буюу “Дэлхийн дуучин” уралдааны 2021 ээлжит тэмцээнд оролцох шилдэгүүд шалгарчээ. Тэмцээн “St David’s Hall” танхимд зургаадугаар сарын 12-19-ний хооронд явагдах бөгөөд энэ жил Covid-19-той холбоотойгоор үзэгчидгүй болох аж.

Тус тэмцээний урьдчилсан шатны шалгаруулалтууд Уэльсийн Хатан хааны Хөгжимт Драмын коллежийн Дора Стоцкер танхимд явагдсан аж. Хоёр жилд нэг удаа зохиогддог энэхүү тэмцээн нь 20 дахь удаагаа зохиогдож байгаа бөгөөд энэ жилийн арга хэмжээнд Австри, Хятад, Дани, Англи, Гүрж, Исланд, Монгол, БНСУ, ОХУ, Өмнөд Африк, АНУ, Венесуэл, Уэльс зэрэг 15 орны дуучид оролцож байгаа юм.

Харин манай улсаас тус тэмцээнд дуурийн дуулаач Э.Анхбаяр оролцож байна. Түүний хувьд 32 настай бөгөөд шигшээд шалгарсан дуучид бүгд 26-32 насны хооронд байгаа юм. Тэмцээнд оролцогчдын аль нь ч өмнө нь энэ тэмцээнд оролцож байгаагүй юм байна. МУГЖ Г.Ариунбаатар өмнө нь тус уралдааны романс төрөлд тэргүүн байр эзэлж байсан билээ.

Categories
мэдээ нийгэм

Уурхайчид маргааш дархлаажуулалтын хоёрдугаар тунд хамрагдана

Коронавируст халдвар /SARS-CoV-2/-ын эсрэг дархлаажуулалтын нэгдүгээр тунд уул уурхай, хүнд үйлдвэрийн салбарын 25 мянга орчим ажилтан хамрагдсан бол хоёрдугаар тунд Тавантолгой, Нарийн сухайт, Айл баяны уурхайн ажилчдыг эхний ээлжинд хамруулахаар боллоо.

ЗХЖШ-ын явуулын баг дархлаажуулалтыг гурван чиглэлд хийх бөгөөд нэгдүгээр баг тавдугаар сарын 2-ны өдөр, хоёр ба гуравдугаар баг тавдугаар сарын 4-ний өдөр дээрх чиглэлийн уурхайнуудад дархлаажуулалтыг эхлүүлэх юм байна.

Чиглэл бүрт эмнэлгийн 10 ажилтантай бүрэлдэхүүн, түргэн тусламжийн нэг машин вакциныг тээвэрлэх ба түргэний гурван машиныг ЗХЖШ-аас гаргах юм байна. Дээрх уурхайнуудын ажилчдыг дархлаажуулалтад хамруулсны дараа бусад чиглэлийн уурхайн ажилчдад вакцин хийх ажил үргэлжилнэ.

Categories
мэдээ нийгэм

Хүчилтөрөгчийн үйлдвэр 2 хоногийн дараа ашиглалтад орно

Шадар сайд С.Амарсайхан ХӨСҮТ-д барьж буй хүчилтөрөгчийн үйлдвэрийн үйл ажиллагаатай өнөөдөр тавдугаар сарын 1-нд танилцлаа. Тус үйлдвэрт 1-2 хоногийн дараа шугам сүлжээний холболт хийж, бүрэн ашиглалтад оруулахаар ажиллаж байгаа юм байна.

Тодруулбал, ХӨСҮТ-ийн хүчилтөрөгч дамжуулах төв нь одоогоор өдөрт өндөр даралтын 100 ширхэг баллон буюу 600 метр куб хүчилтөрөгч нийлүүлдэг, ханган нийлүүлэлт тасалдах эрсдэлтэй өндөр даралттай баллон зөөвөрлөдөг байжээ. Харин тус үйлдвэр бүрэн ашиглалтад орвол өндөр даралттай баллон зөөвөрлөхгүй, газар доогуурх сүлжээгээр дамжуулан сэхээн амьдруулах, эрчимт эмчилгээний тасаг болон Covid-19-ийн эмчилгээний өрөөнүүдэд хананы холбоосоор хүчилтөрөгчийг шууд дамжуулах нөхцөл бүрдэж, хүчилтөрөгчийн дутагдалд орохгүй нөхцөл бүрдэх гэнэ.

Categories
мэдээ нийгэм цаг-үе

Иргэдэд хууль зүйн үнэ төлбөргүй зөвлөгөө өгч байна

НЗДТГ, Монголын Хуульчдын холбоотой хамтран иргэдийн эрх, хууль ёсны ашиг сонирхлыг хамгаалах зорилгоор хуульчийн нийтэд тустай мэргэжлийн үйл ажиллагаа буюу “Хуульчийн Про Боно өдөр”-ийг жил бүрийн тавдугаар сарын 1-ний өдөр уламжлал болгон зохион байгуулдаг.

Энэ жилийн өдөрлөгт Монголын Хуульчдын холбооны Хуульчийн нийтэд тустай мэргэжлийн үйл ажиллагаа эрхэлсэн хороо, Улсын Ерөнхий прокурорын газар, Хүний Эрхийн Үндэсний комисс, Шүүхийн ерөнхий зөвлөл, Шүүхийн шийдвэр гүйцэтгэх ерөнхий газар, Хууль зүйн үндэсний хүрээлэн, Монголын Нотариатчдын танхим зэрэг байгууллагууд хамтран оролцоно.

Нийслэл хот “Ковид-19” цар тахлаас шалтгаалан гамшгаас хамгаалах бүх нийтийн бэлэн зэрэгт шилжсэн байгаа тул иргэдэд хууль зүйн үнэ төлбөргүй зөвлөгөө, мэдээлэл өгөх ажлыг цахим хуудас болон iLaw аппликейшн, оролцогч байгууллагуудын дараах утсаар зохион байгуулна.

Categories
мэдээ нийгэм цаг-үе

“Нийслэлд вакциндаа огт хамрагдаагүй 470 мянган хүн байна” гэв

2021 оны тавдугаар сарын 1-ний өдрийн 16:00 цагийн байдлаар нийслэлийн хэмжээнд шинэ коронавирусээс урьдчилан сэргийлэх вакциндаа огт хамрагдаагүй 470 мянган хүн байгаа болохыг УОК-ын хэвлэлийн төлөөлөгч Ц.Ганзориг мэдээллээ.

Нийслэлд оршин суугаа насанд хүрсэн иргэдийн 59 хувь нь вакцинаа тариулсан гэсэн үг бөгөөд нийслэлийн 112 цэгт 1900 эмч, эмнэлгийн ажилтан вакцинжуулалтад ажиллаж байна.

Улаанбаатар хотын хэмжээнд вакцинжуулалтын эдгээр цэгийг тавдугаар сарын 8-ныг хүртэл ажиллуулах бөгөд 9-нөөс эхлэн цэгүүдийг хумих шийдвэр гарсан. Тавдугаар сарын 8-ныг хүртэл тогтоож буй хатуу хөл хорионы зорилго нь вакцинжуулалтад хамруулах юм гэдгийг тэрбээр тодотгожээ.

Categories
мэдээ нийгэм

ШӨХТГ-аас шалгалт хийж, зарим байгууллага, хувь хүнд хариуцлага тооцжээ

ШӨХТГ-аас дөрөвдүгээр сарын 30-нд ээлжит шалгалтаа хийж, зарим байгууллага, хувь хүнд хариуцлага тооцжээ. Тухайлбал, “Содон” бөмбөгөр худалдааны төв 2021 оны дөрөвдүгээр сарын 27-ны өдөр зоорийн үхрийн цул махыг 15500 төгрөгөөр худалдаж байсан байна. 2021 оны 4 дүгээр сарын 30-ны өдөр “Хүчит шонхор” захаас 17кг үхрийн нойтон махыг 15000 төгрөгөөр бөөндөж аваад жижиглэнгийн үнэ 16000 төгрөгөөр худалдаж байсныг Улсын байцаагчын шаардлага тавьж, үхрийн шинэ нойтон махыг 500 төгрөгөөр буулгаж 15500 төгрөг болгожээ.

“Бөмбөгөр” худалдааны төвийн махны лангуу нь 2021 оны дөрөвдүгээр сарын 10-ны өдрөөс эхлэн өвлийн үхрийн цул махыг 16000 төгрөг, үхрийн сээр, өвчүүний мах 13500-14500 төгрөгөөр худалдаалагдаж байсан байна. 2021 оны дөрөвдүгээр сарын 30-ны өдөр үхрийн нойтон махыг 16000 төгрөгөөр худалдаж байсныг Улсын байцаагчийн албан шаардлага тавьж 200 төгрөгөөр буулгаж 15800 төгрөг болгож бууруулсан.

“Таван-Эрдэнэ” захын махын лангуу түрээслэгч иргэн Б.Э, Н.Н нарт үхрийн махны цул махыг зах зээлийн дундаж ханшнаас хэт өндөр үнээр борлуулсан, улсын байцаагчийн тавьсан шаардлагыг биелүүлээгүй зэрэг нөхцөл байдлыг харгалзан Өрсөлдөөний тухай хуулийн 12 дугаар зүйлийн 12.1.10-т заасан хууль бус худалдааны арга хэрэглэж, хэрэглэгчийг хохироосон гэж үзэн Зөрчлийн тухай хуулийн тусгай ангийн 10.7 дугаар 4.7 дахь хэсэгт заасны дагуу тус бүр 2000 нэгжтэй тэнцэх буюу 2.000.000 /хоёр сая/ төгрөгийн торгох шийтгэлийг ногдуулсан.

Сүхбаатар дүүргийн Баян-Уул төвд 5500 төгрөгөөр худалдаалагдаж байсан сонгиныг 5000 төгрөгөөр худалдаалах шаардлага тавьж бууруулав. Мөн 550 төгрөгөөр худалдаалагдаж байсан өндөгийг 520 төгрөгөөр худалдаалах шаардлага тавьж бууруулсан. Сүхбаатар дүүргийн “Бүрд” худалдааны төвд монгол төмс 1100 төгрөгөөр худалдаалж байсныг 1000 төгрөгөөр худалдаалах шаардлага тавьж бууруулжээ.

Categories
мэдээ нийгэм

Долоон сартай хүүхэд хойд эцгийнхээ гарт зодуулан ГССҮТ-д хүргэгдэн иржээ

Гэр бүлийн хүчирхийллийн гэмт хэрэг 2021 оны эхний гурван сард өнгөрсөн оны мөн үеэс 39 хувиар өссөн тоон үзүүлэлт байгааг ЦЕГ-аас мэдээлсэн.

Цагдаагийн байгууллагын 102 дугаарт залган гэр бүлийн хүчирхийлэлд өртсөн бүсгүй тусламж хүсжээ. Дуудлагын дагуу цагдаагийн байгууллагаас, хойд эцгийнхээ зодуурын золиос болсон хүүхдийг ГССҮТ-д хүргэсэн бөгөөд долоон сартай нялх хүүхэд тус эмнэлэгт долоо хоногийн зайтай хоёр удаа хүргэгдэн ирсэн байна. Хүүхдийн хөл хугарсан, толгой доргилттой хүнд гэмтэлтэй ГССҮТ-д хүргэгдсэн байна.

Хөл хориотой холбоотойгоор гэр бүлийн хүчирхийллийн улмаас гэмтэж эмнэлэгт ирж буй хүүхдийн тоо энэ жил өмнөх жилээс хоёр дахин буурсан ч 2021 он гарсаар 40 гаруй хүүхэд гэр бүлийн хүчирхийллийн улмаас гэмтэж эмнэлэгт ирсэн байна!! Харамсалтай нь хөл хорионы энэ үед удаан хугацаанд хүчирхийлэлд байсны улмаас илүү хүнд гэмтэл аваад ирж байгаа дуудлагууд бүртгэгдэж байна.

Сургууль, цэцэрлэг ажиллахгүй байгаа энэ үед гэр бүлийн хүчирхийлэл далд хэлбэрт шилжиж, хүүхдүүд хүнд гэмтэл аваад ирж байгааг ГССҮТ-өөс мэдээлж байна.

Categories
мэдээ энтертаймент-ертөнц

Онгоцноос үнэтэй “LV”-ийн шинэ цүнх

Францын тансаг зэрэглэлийн “Louis Vuitton” брэндийн 2021 оны өвөл, намрын коллекцид багтсан нисэх онгоцны хэлбэртэй цүнх цахим сүлжээ хэрэглэгчдийн анхаарлыг ихэд татжээ. Дэлхийн хэвлэлүүд ч уг цүнхний талаар бичиж эхэлсэн байна.

Эрчүүдэд зориулсан энэ цүнхний үнэ хэрэглэгчдийг ихэд гайхшруулсан байна. Америкийн загвар зохион бүтээгч Биржил Аблогийн бүтээсэн энэ цүнх 39 мянган ам.долларын үнэтэй аж.

Онгоцноос үнэтэй “LV”-ийн шинэ цүнх

Нэгэн твиттер хэрэглэгч онгоцны зураг тавиад “Жинхэнэ онгоц үүнээс хамаагүй хямд үнээр авах боломжтой” хэмээн жиргэсэн бол өөр нэгэн хэрэглэгч “Энэ жил гар цүнхний үнэ нисч өгч дээ” хэмээн хошигносон байна.

Гэхдээ үүнээс илүү үнэтэй тансаг брэндийн цүнх олон байдаг. Тухайлбал, дэлхийн хамгийн үнэтэй цүнхнүүдийг худалдаалдаг “Hermes” брэндийн “Birkin” коллекцийн цүнхнүүд загвараасаа шалтгаалаад 40-500 мянган ам.доллараар худалдаалагддаг. Эдгээр цүнхийг хийхэд тугал, тэмээн хяруул, матрын арьсыг ашиглажээ. Мөн “Fendi”-ийн “Peekaboo Iconic Mini” хэмээх цүнх 40 мянган ам.доллараар зарагдаж байв.