Month: February 2021

Нийслэлд өнөөдрөөс “Нэг хаалга-нэг шинжилгээ” арга хэмжээ эхэлж байгаа талаар УОК-ын гишүүн, Засгийн газрын Хэвлэл, мэдээлэлтэй харилцах хэлтсийн дарга Ц.Ганзориг мэдээллээ.

Бүх нийтийн бэлэн байдлын зэрэгт шилжсэнээс хойш буюу энэ сарын 11-13-нд халдвар голомтлон тархсан эрсдэл бүхий нутаг дэвсгэрт өргөтгөсөн тандалтын шинжилгээ явуулж 109 068 хүнийг хамруулжээ. Эдгээр иргэдээс зургаан хүн болон ойрын хавьтлын 5 хүнд халдвар илэрчээ.

Харин хөл хорионы үлдсэн ес хоногт “Нэг хаалга-нэг шинжилгээ” арга хэмжээг явуулах бөгөөд өнөөдрөөс Сонгинохайрхан дүүргийн өрх бүрээс шинжилгээ авч эхлээд байна. Тус дүүрэгт энэ сарын 16-ныг дуустал 54 261 өрхөөс шинжилгээ авах юм. Харин Баянгол дүүрэгт хоёрдугаар сарын 17-нд, Хан-Уул дүүрэгт хоёрдугаар сарын 18-нд, Чингэлтэй дүүрэгт хоёрдугаар сарын 19-нд, Сүхбаатар дүүрэгт хоёрдугаар сарын 20-нд, Баянзүрх дүүрэгт хоёрдугаар сарын 21, 22-нд, Багахангай дүүрэгт хоёрдугаар сарын 17, 18, 19-нд, Багануур дүүрэгт хоёрдугаар сарын 17, 18, 19-нд, Налайх дүүрэгт хоёрдугаар сарын 17, 18, 19-нд “Нэг өрх-Нэг шинжилгээ”-г зохион байгуулна. Ингэснээр нийслэлд нийт 247 674 иргэн шинжилгээнд хамрагдана.

Хөвсгөл аймагт сүүлийн 14 хоногийн хугацаанд голомтот бүс нутаг болох Улаанбаатар хотоос 2283 иргэн ирж, өнөөдрийн байдлаар 2017 хүн гэрийн ажиглалт тусгаарлалтад байна.

Улаанбаатар хотоос ирж буй иргэдийг сүүлийн 72 цагийн дотор PCR шинжилгээнд хамрагдсан эсэхийг үндэслэн түргэвчилсэн шинжилгээнд хамруулан аймаг орон нутагт нэвтрүүлж байна. Гэвч эдгээр шинжилгээ нь иргэн таныг халдваргүй гэдгийг бүрэн дүүрэн батлахгүй. Учир нь өвчний нууц үеийн хугацаа 1-14 хоног ба дундаж нууц үеийн хугацаа 5-7 хоног юм. Шинжилгээ өгөх цаг хугацаанд та халдваргүй гэж гарсан ч шинжилгээнд хамрагдсаны дараа болон өмнөх мөч 1-2 хоногт халдвар авсан байхыг үгүйсгэх аргагүй юм. Орон нутагт ирсэн иргэдийг 14 хоногийн хугацаанд гэрийн ажиглалт тусгаарлалтын хяналтад байлгах ба 6 болон 13 дахь хоногт түргэвчилсэн оношлуураар шинжилгээнд хамруулж байна.

Өнөөдрийн байдлаар 6 дахь хоногийн шинжилгээнд хамрагдсан 778 хүн байна. Эдгээр иргэдийн шинжилгээнд коронавирусний халдвар илрээгүй хэдий ч вирус эрсдэл өндөр байгаа цаг үед хэрэгжүүлж хэвшсэн халдвар хамгааллын дэглэмээс гадна хорио цээрийн дэглэмээ сулруулалгүй үргэлжлүүлэн мөрдөх нь туйлын чухал байна гэдгийг Хөвсгөл аймгийн Эрүүл мэндийн газраас анхааруулж байна.

Хөл хорио тогтоож иргэн бүр бүх нийтийн бэлэн байдлын зэргийн дүрэм, журмыг сайтар сахиж байгаа эдгээр өдөр зарим иргэд хууль, дүрэм журмыг зөрчиж байгаа үйлдлийг алба хаагчид илрүүлэн таслан зогсоожээ.
Тодруулбал Сонгинохайрхан дүүргийн 29 дүгээр хороонд байрлах Драгон худалдааны төвөөс хувиараа такси үйлчилгээ хийж орон нутаг руу явдаг жолооч нар зохион байгуулалтайгаар Улаанбаатараас Дархан, Дарханаас Улаанбаатар чиглэлд нэг иргэнээс төлбөр авч хулгайн гэх тодотголтой замаар тээвэр хийж нэвтрүүлж байсан үйлдлийг илрүүллээ.
Жолоочид болох Сонгинохайрхан дүүрэгт оршин суух хаягтай 49 настай эрэгтэй “П”, 40 настай “А” нар Улаанбаатараас Дархан хүртэлх иргэдийг хулгайн замаар тээвэрлэж харин Дархан уул аймгийн харьяат 43 настай “Э”, 37 настай “Ж” нар Дарханаас Улаанбаатар хүртэлх хулгайн замаар иргэдийг тээврийн хэрэгсэлдээ солилцон өртөөчилсөн байдлаар тээвэрлэдэг гэх нөхцөл байдал тогтоогдсон байна.
Хулгайн замаар хулгайн тээвэрт суусан иргэдийн шинжилгээний хариуны хүчинтэй хугацаа дууссан мөн тэдгээр дундаас нэг иргэн сүүлийн 21 хоног огт шинжилгээнд хамрагдаагүй гэх эрсдэлтэй нөхцөл байдал тогтоогдсон байна.
Уг зөрчлийг Сонгинохайрхан дүүрэг дэх цагдаагийн газрын гуравдугаар хэлтсийн алба хаагчид илрүүлэн таслан зогсоож нийт уг хулгайн тээврээр хичнээн иргэд нэвтэрсэн үйлдийг тогтоохоор шалгалтын ажиллагаа үргэлжилж байна.
Иймд иргэд та бүхэн өөрийн болон бусдын амь нас, эрүүл мэндээр дэнчин тавихгүй байж, Улсын онцгой комиссоос гаргасан дүрэм журмыг хэрэгжүүлэхийг цагдаагийн байгууллагаас анхааруулж байна.

Говь-Алтай аймгийн Чандмань суманд 3.6 магнитудын хүчтэй газар хөдлөв.

Тодруулбал, Говь-Алтай аймгийн Чандмань сумын Өлзийбулаг багийн “Алагийн гол” гэдэг газар /аймгийн төвөөс зүүн урд зүгт 216 км, сумын төвөөс баруун зүгт 27 км-т, Ө-45°22’ У-97°39’00″/ хоёрдугаар сарын 12-ны өдрийн 00.06 цагт 3,6 магнитудын хүчтэй газар хөдлөлт болсон тухай холбогдох албанаас мэдээлэв.

Иргэдэд чичирхийлэл мэдрэгдээгүй, хохирол учраагүй байна.

Онцгой байдлын ерөнхий газраас Дорнод аймагт болсон газар хөдлөлтийн талаар мэдээллээ. Дорнод аймгийн Халхгол сумын Ташгай багийн “Ёнгор” гэдэг газар хоёрдугаар сарын 14-ний 04:09 цагт 4 магнитудын хүчтэй газар хөдлөлт болсон талаар бид өмнө нь мэдээлсэн.

Газар хөдлөлтийн улмаас иргэдэд ямар нэг хохирол учраагүй бөгөөд шаардлагатай арга хэмжээг авч, мэдээллийг шуурхай солилцож байгаа гэдгийг ОБЕГ-аас мэдээллээ. Түүнчлэн Хөвсгөл аймагт олон удаагийн газар хөдлөлт болсон бөгөөд, хүнд мэдрэгдэхүйц 300 орчим удаа газар хөдөлсөн байна. Сүүлийн үеийн судалгаагаар газар хөдлөлт болох магадлал буурсах аж. Мөн иргэд айж сандралгүй, өгч буй заавар зөвлөмжийг дагах хэрэгтэйг анхааруулав.