Month: February 2021

Categories
булангууд мэдээ шинжлэх-ухаан-технологи

ОХУ Илон Маскийн цахим сүлжээг ашигласан иргэдээ торгоно

АНУ-ын Space X буюу Илон Маскийн эзэмшдэг компанийн хөгжүүлсэн Starlink цахим сүлжээг ашигласан иргэд болон албан байгууллагуудаа ОХУ торгож магадгүй талаар эх сурвалжууд мэдээлэх болжээ.

ОХУ-ын хууль тогтоох байгууллага иргэдийг Илон Маскийн сансарт хөөргөсөн хиймэл дагуулуудын санал болгож буй цахим сүлжээг хэрэглэхээс татгалзахыг уриалж буй аж.

Шинэ хуулийн дагуу “Starlink” цахим сүлжээг хэрэглэсэн хувь хүнийг хүндрүүлэх нөхцөлгүй бол 10 мянгаас 30 мянган рубль, цаашлаад зарим нөхцөл бүрдвэл нэг сая рубль хүртэлх мөнгөөр торгох аж.

Тус мэдээг сонсоод Илон Маск өөрийн твиттер дээрээ “Бид ердөө л хүмүүсийг Ангараг руу нүүлгэх хэтийн зорилготой. Тусалбал баярлахсан” хэмээн бичжээ. Илон Маск дэлхийг тойруулан нийт 42 мянган хиймэл дагуул байрлуулж, бөмбөрцөг даяар өндөр хурдны цахим сүлжээ нэвтрүүлэхийг зорьж байгаа билээ. Хамгийн сүүлд тэрбээр өнгөрсөн долоо хоногт нэг нислэгээр 143 хиймэл дагуул сансарт гаргаж дээд амжилт тогтоосон юм. Ийнхүү өдгөө Space X компани дахин ашиглах боломжтой есөн ширхэг пуужингаа ашиглан 944 хиймэл дагуулыг дэлхийн эргэн тойронд байрлуулаад буй.

Гэвч ийнхүү сансарын уудмыг эзэгнэж байгаа нь ОХУ мэт авторитар дэглэмд аюул заналхийлж байгаа юм. Global Data компанийн харилцаа холбооны технологид мэргэшсэн үйлчилгээний захирал Жон Бирн “ОХУ-ын хувьд цахим сүлжээний үйлчилгээ үзүүлж буй барууны компанийг шийтгэх аргагүй. Харин оронд нь өөрийн ард иргэдээ торгох, эсвэл ядаж л торгоно хэмээн айлгах нь хялбар юм” хэмээн ярьжээ.

Түүний хэлснээр улс орнуудын Засгийн газрууд дотооддоо цахим сүлжээний хэрэглээг хүссэнээрээ хязгаарлах эрхтэй байдаг бөгөөд хамгийн тод жишээ бол БНХАУ аж. Гэвч аль ч улсын Засгийн газар сансрын уудмыг захирдаггүй тул хиймэл дагуулыг зохицуулна гэдэг бол боломжгүй зүйл аж.

Улс орон бүрийн Засгийн газар эгц дээшээгээ чиглэлд байрлаж буй агаарын орон зай, тэнгэрийг эзэмшиж байдаг бөгөөд тэрхүү орон зайд байх гадаад орны биетийг хэрхэхээ шийдэх бүрэн эрхтэй юм. Харин Starlink цахим сүлжээний хиймэл дагуулууд дунд нам өндөрийн хиймэл дагуулууд бий аж. Тэдгээр нь бусад хиймэл дагуулын байрладаг уламжлалт өндөрөөс илүү дэлхийтэй ойр байрлах ч агаар мандалд хараахан орохгүй юм. Тиймээс тэдгээр нам өндөрийн хиймэл дагуулуудад халдах эрх Засгийн газруудад байгаа эсэх талаар асуудал өдгөө маргаан дагуулж байгаа аж.

ОХУ-ын хувьд өөрсдийн гэсэн хиймэл дагуул бүхий өндөр хурдны Сфера цахим сүлжээг 2024 он гэхэд нэвтрүүлэх төлөвлөгөөтэй байгаа аж. Тус төсөлд нийт 1.5 их наяд рубль зарцуулагдаж байгаа бөгөөд нэгэнт хэрэгжвэл дотоодын бүх цахим сүлжээний хэрэглээг Засгийн газар хянах боломжтой болох юм.

Бирний хэлснээр хэрвээ ОХУ-ын иргэн Starlink сүлжээг ашиглавал түүний хэрэглээг Засгийн газар хянах боломжгүй. Тиймээс энэ нь АНУ, ОХУ-ын үл ойлголцлыг гүнзгийрүүлэх ноцтой аюултай ажээ.

Categories
мэдээ нийгэм

Э.Эрдэнэбаатар: Нийслэлд хөл хорио тогтоох эсэхийг энэ долоо хоногт шийдвэрлэнэ

Монгол Улсын Шадар сайдын 156 дугаар тушаалаар баталсан зорчигч тээврийг зохион байгуулах тухай түр журмыг баримтлан Улаанбаатар хотоос гарах хөдөлгөөнийг зохицуулж байна. Уг журмын дагуу ар гэрийн гачигдал, оршуулгын үйл ажиллагаа, эрүүл мэндийн тусламж үйлчилгээ, албан томилолттой иргэд хотоос гарах боломжтой юм. Мөн хүнс, шатахуун, эм, эмнэлгийн хэрэгсэл, хадлан тэжээлийн ачаа тээвэрлэлт хэвийн нэвтэрнэ.

Коронавируст цах тахлын батлагдсан тохиолдол Улаанбаатар хотод нэмэгдэж, нийслэл хотын хэмжээнд томоохон голомтууд нэмж бүртгэгдэж байгаатай холбогдуулан орон нутгийн иргэдийг буцаах ажлыг тодорхойгүй хугацаагаар зогсоосон.

Мөн сар шинийн баярын өдрүүдэд нийслэлд хөл хорио тогтоох эсэхийг эрсдэлийг үнэлгээ, судалгаанд тулгуурлан энэ долоо хоногт шийдвэрлэнэ гэдгийг НОК-ын Шуурхай удирдлагын багийн гишүүн, дэд хурандаа Э.Эрдэнэбаатар хэллээ.

Categories
мэдээ нийгэм

Зах худалдааны төвүүдэд халдвар хамгааллын дэглэм сахиж ажиллах үүрэг өглөө

Нийслэлийн онцгой байдлын газрын алба хаагчид Баянгол, Баянзүрх, Чингэлтэй, Сонгинохайрхан дүүргийн нутаг дэвсгэр дэх томоохон худалдааны төв, захад халдвар хамгааллын дэглэм сахиулж байгаад хяналт шалгалт хийсэн байна. Шалгалтаар хүний бөөгнөрөл ихтэй, QR код уншуулахгүй байх, ариутгал халдваргүйжүүлэлтийг хангалтгүй хийдэг, агаар сэлгэлт муу, зай барих тэмдэглэгээ хийгээгүй зэрэг зөрчил зарим худалдааны төвд илэрсэн байна.

Мөн бага насны хүүхдүүд захаар үйлчлүүлэх, халуун хэмжих ажилтан тогтсон байршилдаа сууж ажиллахгүй байх, гар ариутгалыг хүн бүрээр хийлгэдэггүй нь шалгалтаар тогтоогджээ. Иймд дээрх зөрчлүүдийг арилгаж, халдвар хамгааллын дэглэмийг сайтар сахиж ажиллах үүргийг зах, худалдааны төвүүдийн менежер, удирдлагуудад өгөв.

НЗДТГ-ын Хэвлэл мэдээлэлтэй харилцах хэлтэс

Categories
мэдээ онцлох-нийтлэл соёл-урлаг туслах-ангилал

DNN-Lifestyle: Хуучин загвартай хувцсаар гангардаг “Vintage” шинэ урсгал залуусын дунд ихээхэн дэлгэрч байна

Хүмүүс бид хоорондоо яг адилхан боловч өмссөн хувцсаараа л ондоошиж дээр, доор хэмээн ялгагддаг. Гэвч шинээр нэг даавуун подволк үйлдвэрлэхэд 2700 литр ус зарцуулдаг. Хувцас үйлдвэрлэл дангаараа дэлхийн нийт агаарын бохирдлын 10 хувийг үүсгэж,жилд 20 тэрбум тонн хувцасны хаягдал гарч байгаль орчныг бохирдуулдаг. Шинээр хувцас худалдаж авах сайхан ч байгаль дэлхийд үлэмж хор хөнөөлтэй байх нь. Тиймээс орчин цагт хуучин хувцсыг төрөл бүрийн загвартай хослуулан дахин өмсч, гангардаг “vintage” хэмээх загварын шинэ урсгал залуусын дунд ихээхэн дэлгэрч, энэ чиглэлийн зах зээл хүчээ авах болсон.

Монголд ч бас ийм дэлгүүр байдгийг та мэдэх үү? 70, 80, 90-ээд оны хуучны цор ганц хувцаснуудыг оруулж ирэн,хувцас загварын шинэ соёлыг монгол залууст түгээж буй “Tako vintage clothing” дэлгүүрийн талаар сурвалжиллаа.

Энэ төрлийн хуучин хувцас нь хямд үнэтэй “комиссын бараа” гэдэг ойлголтоос ялгаатай бөгөөд байгаль орчноо хамгаалж буй ухаалаг сонголт болдог гэдэгт гол агуулга нь оршдог гэнэ.

“Tako vintage clothing” дэлгүүр нь 2019 оны наймдугаар сард хуучны хувцсыг борлуулах чиглэлээр Монголд анх удаа үүд хаалгаа нээжээ. Тус дэлгүүрт бүх төрлийн хувцас, бөгж, ном, пянз тоглуулагч гэх мэт ховор нандин бараанууд цөм онлайнаар худалдаалагддаг. Үнэ ханшийн хувьд барааны нэр төрлөөс хамаарч 30 мянгаас 350 мянган төгрөгийн үнэтэй. Тэр тусмаа 70, 80-аад оны тренд хувцаснуудыг одоо үед аль ч зах, дэлгүүрээс олохгүй.Тиймээс ч хамгийн үнэтэй хувцас 350 мянган төгрөгөөр үнэлэгдэж байжээ. Нээгдээд удаагүй ч тогтмол худалдан авалт хийдэг байнгын үйлчлүүлэгчидтэй болж амжсан гэлээ.

Энэ талаар тус дэлгүүрийн үүсгэн байгуулагч Г.Цэлмэнтэй ярилцлаа.


-Хуучны хувцаснуудыг борлуулдаг “thrift shop” бол гадны орнуудад түгээмэл боловч Монголд харьцангуй шинэ ойлголт. Яагаад энэ дэлгүүрийг нээх болов?

-Анх Playtime наадамд оролцоод өвөрмөц, донжтой хувцасласан олон залуусыг харсан. Нөгөөтэйгүүр тухайн хувцасныхаа соёл, үнэ цэнийг нь мэдэхгүй зөвхөн яавал бусдад гоё харагдах вэ гэж боддог юм шиг санагдсан. Монголд хуучин хувцас гэхээр комисс буюу хямдхан хувцас гадаадаас оруулж ирээд амьдралын түвшин доогуур хүмүүс авдаг зүйл гэж ойлгодог. Гэтэл “thrift shop” бол коммисын дэлгүүрээс агуулгаараа арай өөр. Би хуучин хувцсанд хүний муу энерги шингэдэг гэж огтхон ч боддоггүй. Монголд л ийм ойлголт, мухар сүсгийн шинжтэй зүйл яваад байдаг. Англи, Америк, Японд гэтэл хуучин хувцасны зах зээл загварын салбарынх нь том хэсэг болчихсон. Тиймээс авсан хувцсаа хайрлаж хэрэглэдэг, байгальдаа ээлтэй сонголт хийдэг энэ зүйлийг монгол залуучууддаа таниулъя гэж зорьж, хоёр найзтайгаа хамтраад эхлүүлсэн.

-“Vintage” хувцасны соёл бол коммисын хувцаснуудаас агуулгаараа ялгаатай гэлээ. “Vintage” гэдэг нь ямар утгыг илэрхийлдэг вэ. Энэ талаар тайлбарлавал?

-Thrift shop анх Америкт хандивын хувцаснаас үүсэлтэй. 1990 оноос бизнес болон загварын урсгалд хүч түрэн орж ирсэн байдаг. Vintage гэдэг үг сонгодог гэж орчуулагддаг боловч урсгалынх нь хувьд аваад үзвэл “хуучны загварын мөртлөө хуучин хувцас” гэж ойлгож болно. 1960 оны загвар дахиад давтагдахгүй. Өөрийн гэсэн үнэ цэнэтэй, 1960 оноос хойш өдийг хүртэл цэвэрхэн хадгалагдаад ирсэн тэдгээр хувцаснууд бидний мэдэхгүй тухайн цаг үеэ өгүүлдэг. Түүнчлэн дахин шинээр хувцас авах сонголтыг нэгээр ч болов багасгаж байгаа гэдэг үүднээс нэмж хог хаягдал үүсгэхгүй байгальд ээлтэй гэсэн үг. Товчоор хэлэхэд “хувцасны үнэ цэнийг хүмүүст ойлгуулах салбар” гэж тодорхойлмоор байна.

-Бараануудаа хаанаас, яаж татдаг вэ?

-Миний хувьд Япон улсад долоон жил амьдарсан. Тиймээс энэ төрлийн Япон дэлгүүрүүдээс сардаа 30-50 бараа татаж авдаг. Монголд шинэлэг зүйл болохоор хэт үнэтэй биш, загварын хувьд монгол залуусын сонирхолд нийцсэн, шинэвтэр хэрэглэсэн зүйлсийг оруулж ирэхийг хичээдэг.

-Залуус хэрхэн хүлээж авч байна?

-Мэдээж шинэ болохоор хүмүүс эхэндээ ойлгохгүй хуучин хувцас юм уу гээд буцааж байсан тохиолдлууд бий. Гэсэн ч залуус маань эерэгээр хүлээж авч, байнга юм авдаг хүүхдүүд ч бий. Зүгээр гаднаас хувцас оруулж ирээд зарж байгаа гэхээс илүү ач холбогдлыг нь нийгэмдээ таниулахыг зорьж ажилладаг. Борлуулалт их хийх гэхээсээ илүү эхлээд таниулах нь чухал юм байна гэдгийг ойлгосон.

-Хувцасны загвараа сонгоно гэдэг мэдрэмж шаардсан ажил. Таны хувьд тэгэхээр урлагтай ойрхон ажилладаг хүн бололтой?

-Манай аав, ээж хоёр хувцасны чанар, загварт анхаардаг угаас хувцасны мэдрэмж өндөртэй хүмүүс бий. Миний хувьд Япон улсад архитектурийн чиглэлээр суралцаж төгссөн. Одоо бол контент үйлдвэрлэлийн “Vadda” компанид дэлгүүрийнхээ хажуугаар ажиллаж байна. Түүнчлэн дэлхийн улсуудын өглөөний цайг туршиж үзүүлэнгээ тухайн орныхоо талаар мэдээллийг өгдөг “Өглөөний цай” нэртэй контентыг найз охиныхоо хамт хийдэг. Өглөөний цайгаа ууж хэвшье гэдэг уриатай. Монгол залуустаа шинэ соёлыг түгээе гэж гадаадад суралцах хугацаандаа тээж явсан зорилгынхоо дагуу төлөвлөсөн ажлуудаа цэвэр өөрийн хүсэл тэмүүлэлдээ хөтлөгдөөд л хийж явна даа.

Ч.БИНДЭРЪЯА

Categories
мэдээ нийгэм

Хотын дарга Д.Сумъяабазар барилгын компаниудын үйл ажиллагааг эхлүүлж, ажлын байр хадгалах санал гаргав

УОК-ын Шуурхай штаб өнөөдөр цахимаар хуралдав. Хуралдаанд нийслэлийн Засаг дарга бөгөөд Улаанбаатар хотын захирагч Д.Сумъяабазар оролцлоо. Тэрбээр коронавируст цар тахлаас урьдчилан сэргийлэх, шинээр үүсэж буй халдварын голомтуудыг яаралтай тогтоох, тандалт илрүүлгийн шинжилгээг хийх, цэгүүдийг нэмэх талаар авч хэрэгжүүлж буй арга хэмжээнүүдийн талаар мэдээлэл өглөө.

Энэ үеэр цар тахлын нөхцөл байдал нь эдийн засгийн болон нийгмийн бусад салбарт хүндрэл учруулж, улмаар нийгэмд ялгавартай, тэнцвэргүй байдал үүсгэж байгаа асуудлыг хөндөв. Тухайлбал, боловсрол, эрүүл мэнд, төрийн зарим үйлчилгээг цахимаар шийдвэрлэж байгаа ч цахим хэрэглээнд бүрэн шилжих боломжгүй иргэд, оюутан сурагчид хоцрогдож байгаа юм. Иймд нийслэлийн зүгээс БШУЯ-тай хамтран гуравдугаар сарын 1-нээс танхимын сургалтыг эхлүүлэх бэлтгэлийг ханган ажиллаж байгааг хэлсэн юм.

Түүнээс гадна нийслэлд хөл хорио хэвээр үргэлжилсээр байвал дөрөвдүгээр сарын 1-н гэхэд 500 мянган ажлын байр эрсдэлд орох тооцоог салбарын эрдэмтэн, судлаачидтай хамтран гаргасан. Тиймээс хот эрсдэлийн зэргийг тооцож үзээд хөл хориог үе шаттай бууруулан, аж ахуйн нэгж, үйлчилгээний байгууллагуудын үйл ажиллагааг хэвийн үргэлжлүүлэх боломжийг бүрдүүлэн ажиллаж байгаа. Мөн барилгын компаниудын үйл ажиллагааг эхлүүлж, ажлын байр хадгалах саналыг Нийслэлийн Засаг дарга Д.Сумъяабазар гаргав.

Улмаар коронавируст цар тахлын хүнд үед барилгын салбарын борлуулалтыг дэмжих үүднээс 87 тэрбум төгрөгөөр НОСК орон сууц худалдан авч түрээслээд-өмчлөх хэлбэрээр төрийн албан хаагчид, иргэдэд олгож байгаа аж. Тэр тусмаа цар тахлын голомт дээр ажиллан, үүрэг гүйцэтгэж буй албан хаагчдыг энэхүү түрээслээд өмчлөх хэлбэрийн орон сууцад хамруулах бодлогыг хот баримталж байгаа юм. Түүнчлэн сайжруулсан шахмал түлшний хэрэглээтэй холбоотой аюулгүй байдлыг хангуулж, “Угаарын удирдлагын төв” байгуулан иргэдэд зөвлөмж, мэдээлэл өгөх, угаарын аюулаас урьдчилан сэргийлэх ажлыг зохион байгуулж байна.

Мөн Улаанбаатар хотод тусгаарлах байруудыг яаралтай шинээр нэмж байгуулахаар ажиллаж байна.

Эцэст нь коронавируст халдварын тохиолдол бүртгэгдэж, хөл хорио тогтоох үед нийслэл хотод нэгдсэн дата бааз байдаггүйгээс нийслэлийн аль хэсэгт хэр түвшний хөл хорио тогтоож, ямар арга хэмжээ авах талаар төлөвлөгөө боловсруулахад мэдээлэл хангалтгүй байсныг хэллээ. Тиймээс Нийслэлийн Инновац, технологийн газар бусад албатай хамтран нийслэлийн хэмжээнд мэдээллийн цогц дата бааз үүсгэн ажиллаж буйг танилцуулав.

Categories
мэдээ улс-төр

Ерөнхийлөгч Х.Баттулга УИХ-ын ээлжит бус чуулганыг хуралдуулах тухай саналаа хүргүүллээ

Монгол Улсын Ерөнхийлөгч Х.Баттулга Улсын Их Хурлын ээлжит бус чуулганыг хуралдуулах тухай саналаа хүргүүллээ

Монгол Улсын Ерөнхийлөгч Халтмаагийн Баттулга Улсын Их Хурлын ээлжит бус чуулганыг хуралдуулах тухай саналаа УИХ-ын дарга Г.Занданшатарт өнөөдөр албан бичгээр хүргүүллээ.

АЛБАН БИЧИГТ:

“Миний бие цар тахлын хүнд үед өрх бүрт нэг сая төгрөг олгох, айл өрхүүдээрээ дамжуулан үндэсний үйлдвэрлэл, аж ахуйгаа дэмжих зорилгоор “Коронавируст халдварын цар тахлаас үүдэлтэй амьдралын доройтол, нийгэм, эдийн засгийн бэрхшээлийг даван туулах онцгой арга хэмжээний тухай” Улсын Их Хурлын тогтоолын төслийг 2021 оны 01 дүгээр сарын 08-ны өдөр өргөн мэдүүлсэн боловч Улсын Их Хурал авч хэлэлцэхгүйгээр 2020 оны намрын ээлжит чуулганаа өндөрлүүллээ.

Мөн стратегийн ач холбогдол бүхий ашигт малтмалын ордыг эзэмшдэг, их хэмжээний гадаад валютын орлоготой үндэсний болон гадаадын хөрөнгө оруулалттай компаниудын мөнгөн гүйлгээ, төлбөр тооцоог Монгол Улсын банкаар гүйцэтгэдэг болгох зорилго бүхий “Валютын зохицуулалтын тухай хуульд нэмэлт оруулах тухай” хуулийн төслийг удаа дараа өргөн мэдүүлж, 2018 оны 10 дугаар сарын 19-ний өдрийн чуулганаар дэмжүүлсэн боловч тухайн хуулийн төслийг эцэслэн батлах талаар Улсын Их Хурал өнгөрсөн 2 жил 3 сарын хугацаанд ямар ч арга хэмжээ авсангүй.

Цар тахлаас урьдчилан сэргийлэх, тэмцэх чиглэлд авч хэрэгжүүлсэн хорио цээрийн дэглэм, хязгаарлалтаас үүдэн ард иргэдийн амьдрал өдрөөс өдөрт дордож, нийгэм эдийн засгийн байдал эрс хүндэрч байгаа энэ цаг үед Улсын Их Хурал холбогдох хууль, тогтоомжийн төслийг цаг алдалгүй хэлэлцэн шийдвэрлэж, шуурхай ажиллах шаардлагатай юм.

Иймд Монгол Улсын Үндсэн хуулийн Хорин долдугаар зүйлийн 3 дахь хэсэг, Монгол Улсын Ерөнхийлөгчийн тухай хуулийн 12 дугаар зүйлийн 1 дэх хэсэг, Монгол Улсын Их Хурлын тухай хуулийн 19 дүгээр зүйлийн 19.2 дахь хэсэгт тус тус заасны дагуу Улсын Их Хурлын ээлжит бус чуулганыг нэн даруй зарлан хуралдуулах, ээлжит бус чуулганаар “Валютын зохицуулалтын тухай хуульд нэмэлт оруулах тухай” хуулийн төсөл болон “Коронавируст халдварын цар тахлаас үүдэлтэй амьдралын доройтол, нийгэм, эдийн засгийн бэрхшээлийг даван туулах онцгой арга хэмжээний тухай” Улсын Их Хурлын тогтоолын төслийг тус тус хэлэлцүүлэн шийдвэрлүүлэх саналтай байна” гэжээ.

Categories
мэдээ нийгэм

СХД-ийн “21” худалдааны төвөөр үйлчлүүлсэн иргэд шинжилгээнд хамрагдахыг анхаарууллаа

Сонгинохайрхан дүүргийн нутаг дэвсгэрт байрлах “21″ худалдааны төвөөр 2021 оны нэгдүгээр сарын 28, 29, 30-ны өдрүүдэд үйлчлүүлсэн иргэд коронавирус илрүүлэх шинжилгээнд яаралтай хамрагдахыг анхааруулж байна.

Шинжилгээнд хамрагдах байршлууд:

9-р сургууль

12-р сургууль

62-р сургууль

67-р сургууль

Categories
мэдээ нийгэм

Товчоодоор 1641 тээврийн хэрэгслээр 5671 зорчигч хотоос гарчээ

Нийслэлийн авто тээврийн шалган нэвтрүүлэх товчоодоор өнгөрсөн 24 цагийн хугацаанд албан ажил, эмнэлэг, эрүүл мэнд, ахуйн гачигдал, оршин суух гэрийн хаягаар, хүнс, шатахуун тээвэрлэлт хийх зорилгоор 8483 хүн нэвтэрчээ.

Товчоодоор 1210 тээврийн хэрэгслээр 2812 зорчигч хот руу нэвтэрч, 1641 тээврийн хэрэгслээр 5671 зорчигч хотоос гарсан байна.

Авто тээврийн шалган нэвтрүүлэх есөн товчоонд Эрүүл мэнд, Онцгой байдал, Цагдаа, Мал эмнэлэг, Мэргэжлийн хяналтын 84 ажилтан, алба хаанч үүрэг гүйцэтгэлээ гэж Нийслэлийн Эрүүл мэндийн газраас мэдээллээ.

Categories
мэдээ спорт

Монголын хөлбөмбөгчин Г.Ганбаяр 100 мянган еврогоор үнэлэгджээ

Германы хөлбөмбөгийн “Transfermarkt.mn” вебсайт Азийн улс орон бүрийн хамгийн үнэтэй хөлбөмбөгчдийн зах зээлийн ханшийг гаргасан байна.

Тэгвэл тус үнэлгээнд Монголын хамгийн үнэтэй хөлбөмбөгчин Г.Ганбаярын зах зээлийн ханш 100 мянган евро буюу монгол мөнгөөр 350 сая орчим төгрөгийн үнэлгээтэй гэж тооцсон байна. Тэрээр Унгарын домогт хөлбөмбөгч Ференц Пушкашийн нэрэмжит акедемид суралцаж байгаа бөгөөд Унгарын дээд лигийн “Активал Чаквар” клубийн довтлогчоор тоглож байгаа юм.

Ердөө 15 насандаа Монголын дээд лигт “Хоромхон” багийн өмсгөлтэй талбайд гарч тоглож байсан Г.Ганбаяр одоогийн байдлаар “Активал Чаквар” клубийн төлөө 18 тоглолтод оролцож, нэг гоол оруулаад байна.

Categories
мэдээ нийгэм цаг-үе

ҮСХ: Хүн амын амьжиргааны доод түвшин нийслэлд 238 мянган төгрөг байна

ҮСХ-ноос 2021 оны “Хүн амын амьжиргааны доод түвшний тооцоо”-г хэлэлцэн баталжээ.

Шинэчилсэн тооцооллоор хүн амын амьжиргааны доод түвшин:

  • Улаанбаатар хотод 238 700 төгрөг,
  • Хангайн бүсэд 213 800 төгрөг,
  • Баруун бүсэд 212 600 төгрөг,
  • Зүүн бүсэд 210 300 төгрөг,
  • Төвийн бүсэд 207 400 төгрөг болсон байна.

Хүн амын амьжиргааны доод түвшинг хөдөлмөрийн хөлс, нийгмийн даатгалын болон нийгмийн халамжийн сангаас олгох тэтгэвэр, тэтгэмж, халамжийн хэмжээг тогтоох, төрөөс иргэдэд эд, мөнгөний туслалцаа үзүүлэхэд жишиг үзүүлэлт болгон ашигладаг.

Монгол Улсын Хүн амын амьжиргааны доод түвшинг тодорхойлох тухай хуулийн 5 дугаар зүйлд “Хүн амын амьжиргааны доод түвшинг хэрэглээний доод хэмжээг үндэслэн Үндэсний Статистикийн хороо тодорхойлно” гэж заасны дагуу 2021 онд мөрдөх Хүн амын амьжиргааны доод түвшинг ийнхүү шинэчлэн тогтоолоо.